අතුරුදහන් අය මැරුනු හැටි කියන ලෙස ජනපතිට අභියෝගයක්

යුද්ධාවසානයේ ශ්‍රී ලංකා රජයේ ආරක්ෂක අංශ වෙත බාර විමෙන් අනතුරුව අතුරුදහන් වු පුද්ගලයන් මරණයට පත්වුයේ කෙසේ දැයි ජනාධිපතිවරයා හෙළි කළ යුතු බව මුල් පෙලේ දෙමළ දේශපාලකයෙක් පවසා තිබේ.

ජනාධිපති ගෝඨාභය රාජපක්ෂ විසින් යුද්ධය පැවති සමයේ අතුරුදහන් වූ පුද්ගලයන් මරණයට පත්ව ඇති බවට එක්සත් ජාතීන්ගේ මුල් පෙලේ නියෝජිතවරියක් සමඟ කරන ලද ප්‍රකාශය උපුටා දක්වමින් දෙමළ ජාතික සන්ධාන මන්ත්‍රී ඒම්. ඒ. සුමන්තිරන් මේ බව ප්‍රශ්න කර ඇත.

“ජනාධිපති ගෝඨාභය රාජපක්ෂ යුද්ධය අවසානයේ හමුදාවට අය පවා මිය ගොස් ඇති බව දන්නා බවයි පේන්න තියෙන්නේ. උගත් පාඩම් හා ප්‍රතිසන්ධාන කොමිසම් වාර්තාවෙන් හෙළි කර ඇති පරිදි එම අතුරුදහන් වු 3000 ක පිරිස මිය ගියේ කෙසේ දැයි ඔහු ප්‍රසිද්ධියේ හෙළි කළ යුතුයි” යනුවෙන් මන්ත්‍රීවරයා සිය ට්විටර් ගිණුමේ සටහනක් තබා තිබේ.

අතුරුදහන් වු පුද්ගලයින් මිය ගිය බව ඔවුන්ගේ පවුල් වල උදවිය පවා දන්නා බව එක්සත් ජාතීන්ගේ නියෝජිතවරියක වන හැනා සිගර් සමඟ ජනාධිපතිවරයා පවසා ඇති බවත් එම පුද්ගලයන් වෙනුවෙන් මරණ සහතික නිකුත් කිරීම සඳහා පියවර ගනු ඇති බව ජනාධිපති කාර්යාලය නිකුත් කළ නිවේදනයක දැක්වේ.

“අතුරුදහන් වූවන්ගේ ගැටලුවට විසදුම් දීම සඳහා වන සිය සැලසුම ජනාධිපති රාජපක්ෂ පෙන්වා දුන්නා. මේ අතුරුදහන් වූ පුද්ගලයන් ඇත්ත වශයෙන්ම මිය ගොස් ඇති බව ඔහු පැහැදිලි කළා,” යනුවෙන් නිවේදනයේ සඳහන්ව ඇත.

දෙවසරකට වැඩි කාලයක් තිස්සේ උතුරේ ස්ථාන කිහිපයක විරෝධතාවයන් හි නිරත වන අතුරුදහන් වුවන්ගේ ඥාතීන් ජාත්‍යන්තර විමර්ශනයක් සිදු කර අතුරුදහන් වුවන් පිළිබඳ සත්‍ය හෙළි කරන ලෙස රජයට බල කරමින් සිටි.

අතුරුදහන්වුවන් වෙනුවෙන් යුක්තිය ඉෂ්ඨ කරන ලෙස වව්නියාව,කිලිනොච්චිය සහ මුලතිව් ජනයා වසරකට වැඩි කාලයක් තිස්සේ විරෝධතාවයේ නිරත අතර ඒ අතරින් මව්වරුන් පිරිසක් යුක්තිය නොලබාම මිය ගියේය.

උතුරු යුද්ධයේ අවසන් සමයේදී ශ්‍රී ලංකා යුද හමුදාවට බාර දීමෙන් හෝ බාර වීමෙන් පසු අතුරුදහන් වුවන් පිළිබඳව එම සේනාංක බාරව සිටි හමුදා නායකයන්ගෙන් ප්‍රශ්න කරන බවට අතුරුදහන් වුවන් පිළිබඳ කාර්යාලයේ ප්‍රධානී නීතිඥ සාලිය පීරිස් පවසා තිබුන ද එසේ ප්‍රශ්න කළ බවක් දැනගන්නට නැත.

ශ්‍රී ලංකාවේ අවසන් යුද සමයේ වැඩිම පිරිසක් අතුරුදහන් වී ඇත්තේ රජයේ ආරක්ෂක අංශ වෙත බාර දීමෙන් හෝ බාර වීමෙන් පසු බවද OMP සභාපතිවරයා කියා තිබුනි.

2009 මැයි 18 හෝ ඒ ආසන්න දිනකදී ශ්‍රී ලංකා යුද හමුදාවට බාර දීමෙන් පසු අතුරුදහන් කරන ලද 280 දෙනාගේ නම් ලැයිස්තුවක් 2018 වසරේ දී ශ්‍රී ලංකාවේ සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) එළි දක්වන ලදී.

එම ලයිස්තුවට තම දෙමව්පියන් සමඟ ශ්‍රී ලංකා හමුදාවට බාර වු දරුවන් 29 දෙනෙකුගේ නම් ඇතුලත්ව ඇති අතර ඉන් කිහිප දෙනෙකුම වයස අවුරුදු 5ට අඩු බිලිඳුන් බවයි ITJP සංවිධානය නිවේදනය කරන්නේ.

මානව හිමිකම් දත්ත විශ්ලේෂක සමූහය (HRDAG) හා ශ්‍රී ලංකාවේ සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) පසුගිය වසරේ දී එක්ව කරන ලද සංගණයකින් හෙළිව ඇත්තේ ශ්‍රී ලංකාවේ යුද්ධයේ අන්තිම පැය 48 තුල පමණක් අතුරුදහන් වූ සංඛ්‍යාව 500 ඉක්මවන බවයි.