ජීවිත ආරක්ෂා කරනු වෙනුවට ආණ්ඩුව ‘අත්තනෝමතික’ හැසිරීමක

වසංගත ව්‍යාප්තිය කළමනාකරණය පිළිබඳව සෞඛ්‍ය අංශ හා එයට සම්බන්ධ වෘත්තීය සමිති විසින් පළ කරන අදහස් නොසලකා ක්‍රියා කරමින් සිටින බවට ආණ්ඩුවට චෝදනා එල්ල වී ඇති අතර ශ්‍රී ලංකාවේ කෝවිඩ් මරණ සංඛ්‍යාව නෑසූ විරූ මට්ටමකට ඉහල නගින්නට තිබෙන අවදානම ගැන දිවයිනේ ඉහළම වෛද්‍ය විශේෂඥයන් එක හඬින් රජයට අනතුරු අඟවා තිබේ.

එයට අමතරව සෞඛ්‍ය ක්ෂේත්‍රය පිළිබඳ මනා දැනුමක් ඇති වෘත්තීය සමිති විසින් පළකරන නිදහස් හා වෘත්තීයමය මත ප්‍රචාරය වීමට ආණ්ඩුව බාධා පමුණුවන බවත් රාජ්‍ය හා පුද්ගලික අංශයේ වෘත්තීය සමිති 20 ක් නියෝජනය කරන පොදු දේපළ හා මානව හිමිකම් සුරැකීමේ සංවිධානය පවසයි.

මෙවන් අසීරු මොහොතක ආණ්ඩුවේ වගකීම විය යුත්තේ යථා තත්වය නිවැරදිව තේරුම් ගනිමින් සියලු පාර්ශවවල සහාය ලබාගෙන මෙම වසංගත ව්‍යාප්තිය මැඩලමින් ජනතාවගේ ජීවිත ආරක්‍ෂා කිරීමට කටයුතු කිරීම වුවද ආණ්ඩුව එයට පටහැනිව අත්තනෝමතික ස්වභාවයකින් කටයුතු කරන බවටත් එම සංවිධානය චෝදනා කරයි.

එම සංවිධානයේ සම කැඳවුම්කරු රන්ජන් සේනානායකගේ අත්සනින් නිකුත් කර තිබෙන නිවේදනයක් මගින් අවධාරණය කර ඇත්තේ වසංගතය කළමනාකරණය කිරීම සඳහා ආණ්ඩුව නිවැරැදි තීරණ ගත යුතු බවයි.

“රාජ්‍ය හා පෞද්ගලික අංශයේ ස්වාධීන වෘත්තීය සමිති නියෝජනය කරන අප සංවිධානය රටේ වැඩ කරන ජනතාවගේ බහුතරය නියෝජනය කරන අතර ඔවුන් වෙනුවෙන් පමණක් නොව රටේ සමස්ත මහජනතාවගේ සුරක්‍ෂිත භාවය වෙනුවෙන් නිරන්තරව පෙනී සිට ඇත.”

එබැවින් මේ තීරණාත්මක මොහොතේ කෝවිඩ් 19 වසංගතය කළමනාකරණය සඳහා නිවැරදි තීන්දු තීරණවලට එළඹෙන මෙන් ආණ්ඩුවට තරයේ බලකර සිටින පොදු දේපළ හා මානව හිමිකම් සුරැකීමේ සංවිධානය ආණ්ඩුවට යෝජනා හතක් ඉදිරිපත් කර තිබේ.

01 – මේ වන විට රටේ ප්‍රධාන පෙලේ වෛද්‍ය සංගම් හතරක් විසින් ඉදිරිපත්කර ඇති යෝජනා වහා ක්‍රියාත්මක කිරීම,
02- මහජන සෞඛ්‍ය පරීක්ෂකවරුන්ගේ සංගමය, වෛද්‍ය රසායනාගාර කාර්මික වෘත්තීයවේදීන්ගේ සංගමය, රාජ්‍ය සේවා එක්සත් හෙද සංගමය ඇතුළු සෞඛ්‍ය ක්‍ෂෙත්‍රයේ අනිකුත් වෘත්තීය සංගම් විසින් පෙන්වා දෙන කරුණු කෙරෙහි දැඩි අවධානය යොමු කිරීම,
03 – සෞඛ්‍ය ක්ෂෙත්‍රයේ වෘත්තීය සමිති විසින් පෙන්වාදෙන කරුණු කෙරෙහි අවධානය යොමුකරනු වෙනුවට ඔවුන්ගේ වෘත්තීයමය හා නිදහස් අදහස් මර්දනය කිරීමට කටයුතු කිරීම වහා අත්හිටුවීම,
04 – සීඝ්‍රයෙන් ව්‍යාප්ත වෙන කෝවිඩ් – 19 වසංගත තත්වය පාලනය සඳහා රට තුළ තාවකාලිකව සංචරන සීමා පැනවීමක් වහා සිදු කිරීම,
05 – වයිරස පාලනය සඳහා මූලික පියවරක් වන එන්නත්කරණය රට තුළ ක්‍රියාත්මක කිරීමේ දී ලෝක සෞඛ්‍ය සංවිධානයේ මගපෙන්වීම් ද සළකමින් පිළිගත් හා සාධාරණ ක්‍රමවේදයන් අනුව විධිමත් ලෙස වීම වැඩ පිළිවෙළ ක්‍රියාත්මක කිරීම,
06 – රෝග ව්‍යාප්තිය තුළ වැඩ කරන ජනතාව මුහුණ දී ඇති ගැටලු විසඳීම සඳහා කම්කරු අමාත්‍යවරයාගේ මූලිකත්වයෙන් විශේෂ කාර්ය සාධන බලකායක් සියලු ක්‍ෂෙත්‍ර වල වෘත්තීය සමිතිවල සහභාගීත්වයෙන් පිහිටුවීම,
07 – වැඩ කරන ජනතාවට සේවයට පැමිණීමට ඇති බස්, දුම්රිය වැනි පොදු ප්‍රවාහන සේවා බිඳ වැටී ඇති බැවින් සෞඛ්‍යාරක්ෂිතව පොදු ප්‍රවාහනය භාවිත කිරීමට නොහැකි තත්වයක් උද්ගතව ඇති බැවින් ඒ සඳහා කඩිනම් විසඳුමක් ලබාදීම.

ශ්‍රී ලංකාවේ සියලුම වෛද්‍ය වෘත්තිකයන්ගේ ආයතන නියෝජනය කරන ශ්‍රී ලංකා වෛද්‍ය සංගමයේ අන්තර්විද්‍යාල කමිටුව සමග එක්වී ශ්‍රී ලංකා වෛද්‍ය සංගමය, රජයේ වෛද්‍ය නිලධාරීන්ගේ සංගමය හා විශේෂඥ වෛද්‍යවරුන්ගේ සංගමය අනතුරු අඟවා ඇත්තේ සෞඛ්‍ය ක්ෂේත්‍රයේ උපදෙස් නොතකා කටයුතු කළොත් ඉදිරි සති තුන සහ ඉන් අනතුරුව එළඹෙන කාල සීමාවේදී කොවිඩ් ආසාදිත මරණ ඉහළ යාම වැළැක්විය නොහැකි බවයි.

“කෝවිඩ් මරණ සංඛ්‍යාව නෑසූ විරූ මට්ටමකට නගින්නට ඉඩ තිබෙන අතර නුදුරු අනාගතයේ මරණීය ජාතික ව්‍යසනයක් බවට පත්වීමේ සැබෑ අවදානමක් මතු කර ඇති,” බව වෛද්‍යවරුන්ගේ ආයතන විසින් ජනාධිපතිවරයාට යවා ඇති ලිපියක දැක්වේ.

වසංගතය පැතිර යාම වහාම පාලනය කිරීම සඳහා කඩිනමින් ක්‍රියාත්මක කළ යුතු නිර්දේශ හතක් එම වෛද්‍ය සංගම් විසින් රජයට ඉදිරිපත් කර තිබේ.

01- කොවිඩ් 19 පාලනය කිරීම සඳහා 2020 ඔක්තෝම්බර් මාසයේ පළ කරන ලද රජයේ අති විශේෂ ගැසට් නිවේදනයේ සඳහන් රෙගුලාසි දැඩි අධීක්ෂණයක් යටතේ අකුරටම ක්‍රියාත්මක කරමින් මහාජනතාවගේ සංචරණයට දැඩි සීමා පැනවීම.

02- ආසාදිත පුද්ගල ඝනත්වය පිළිබඳ විද්‍යාත්මක සාක්ෂි මත පමණක් පදනම්ව තෝරාගත් ඇතැම් ප්‍රදේශ අගුලු දැමීමේ ක්‍රියාවලිය පවත්වාගෙන යාම තීරණ ගැනීම. අවශ්‍ය නම් හා පෙන්වා දෙන අවස්ථාවල දිස්ත්‍රික්ක අතර ජනතා සංචරණය සීමා කිරීම ද වැදගත් වේ.

03- කොවිඩ් 19 අසාදිතයන් දැඩි ලෙස අධීක්ෂණය කරමින් රෝගය වැළැක්වීමට අදාළ සුවිශේෂී උපාය මාර්ග වලට යොමුවෙමින්, අවශ්‍ය නම් තෝරාගත් අත්‍යාවශ්‍ය සේවා අංශ හා ආර්ථිකයට දායක වන සේවා පවත්වාගෙන යාමට පියවර ගැනීම.

04- සෞඛ්‍ය සේවා වෘත්තිකයන්ගේ සමීප හා දැඩි අධීක්ෂණය යටතේ, රෝග ලක්ෂණ නොමැති ආසාදිතයන් සිය නිවාස වලම හුදකලා කිරීම හා එම පවුලේ සාමාජිකයන් එම නිවසේම නිරෝධායනය කිරීම. මෙහිදී ආසාදිත පුද්ගලයන් නිව්මෝනියා රෝග ලක්ෂණ පෙන්නුම් කරන්නේ නම් දැඩි අධීක්ෂණය යටතේ එම රෝගීන් හැකි ඉක්මනින් ආසන්නයේ ඇති නම් කළ රෝහල වෙත යොමු කිරීමට විධි විධාන යෙදීම.

05- ඇඳන්, ඔක්සිජන්, දැඩි සත්කාර ඒකක පහසුකම් ආදිය ප්‍රමාණවත් ලෙස සපයමින් ප්‍රතිකාර සේවා තවදුරටත් ශක්තිමත් කිරීම.

06- කෝවිඩ් 19 රෝග නිර්ණය ස‍ඳහා PCR පරීක්ෂණ සහිතව දිවයින පුරා රසායනාගාර සේවා ශක්තිමත් කිරීම හා ස්ථාවර හා අඛණ්ඩ සැපයුම් දාමයක් සහතික කිරීම.

07- හැකි ඉක්මනින් රට පුරා ප්‍රමාණවත් මාත්‍රාවලින් යුක්තව නිසි එන්නත්කරණ ක්‍රියාවලියක් දියත් කිරීම.

කෝවිඩ් – 19 වසංගත කළමනාකරණයේ පවතින අඩුපාඩු නිවැරදි කර ගනිමින් නිසි කළමනාකරණ වැඩ පිළිවෙළක් කරා නොගියහොත් රටතුළ බරපතල ව්‍යසනකාරී තත්වයක් ඇතිවීම නොවැලැක්විය හැකිවනු ඇති බවටත් පොදු දේපළ හා මානව හිමිකම් සුරැකීමේ සංවිධානය සිය නිවේදනයෙන් රජයට අනතුරු අඟවා සිටි.

ලංකා බැංකු සේවක සංගමය, ලංකා වෙළද කාර්මික හා පොදු කම්කරු සංගමය, මාධ්‍ය සේවක වෘත්තිය සමිති සම්මේලනය, එක්සත් කම්කරු සම්මේලනය, තැපැල් හා විදුලි සංදේශ නිලධාරීන්ගේ සංගමය, ශ්‍රී ලංකා වෘත්තිය ජනමාධ්‍යවේදීන්ගේ සංගමය, එක්සත් පොදු සේවා සංගමය, වාණිජ හා කාර්මික සේවක සංගමය, රක්ෂණ සේවක සංගමය, තොරතුරු හා විදුලි සංදේශ සියලු සේවක සංගමය, ලංකා ගුරු සංගමය, ලංකා වතු සේවා සංගමය, දුම්රිය ශ්‍රේණිගත වෘත්තිය සමිති එකමුතුව, ටෙලිකොම් ඉංජිනේරුමය ඩිප්ලෝමාධාරීන්ගේ සංගමය, ආහාර, බීම සහ දුම්කොළ කර්මාන්ත සේවක සමිතිය, ස්වාධීන තටාක සේවක සංගමය, ජාතික නිදහස් වෘත්තිය සමිතිය, රජයේ මුද්‍රණ ශිල්පීන්ගේ සංගමය, ලංකා වැවිලි සේවා සංගමය, ඉඩම් හා කෘෂිකර්ම ප්‍රතිසංස්කරණ ව්‍යාපාරය යන වෘත්තීය සමිති 20 පොදු දේපළ හා මානව හිමිකම් සුරැකීමේ සංවිධානය නියෝජනය කරයි.