සත් වසරක් තිබු GSP+ තහංචිය නිමයි

 

මහින්ද රාජපක්ෂ පාලන සමයේ පනවන ලදුව හත් වසරක් තිස්සේ යුරෝපා සංගමය විසින් ක්‍රියාත්මක කෙරුනු GSP+ වරණීය බදු සහන තහංචිය ඉවත් කිරීමට යුරෝපා කොමිසම නිර්දේශ කර ඇත.

මානව හිමිකම්, කම්කරු අයිතිවාසිකම්, පරිසරය සහ යහ පාලනය යන ක්ෂේත්‍ර වලට අදාළ ජාත්‍යන්තර සම්මුති 27ක් නීතිගත කොට ක්‍රියාවේ යෙදවීම සම්බන්ධයෙන් ශ්‍රී ලංකාව දක්වා ඇති කැපවීම මෙහිදී සැලකිල්ලට ගන්නා ලද බව යුරෝපා කොමිසම 11 බදාදා පැවසීය.

 

‘ශ්‍රී ලාංකික’ ජයග්‍රහණයක්

විශේෂ නිවේදනයක් නිකුත් කරමින් අගමැතිවරයා පවසා ඇත්තේ  මෙය යහපාලන රජය විසින් ලබා ගත් ජයග්‍රහණයක් පමණක් නොව,  මුළු මහත් ශ්‍රී ලාංකිකයන් විසින්ම ලද ජයග්‍රහණයක් බවයි.

“ජනතා අයිතිවාසිකම් හා හිමිකම් ආරක්‍ෂා කරමින්, ශ්‍රී ලංකාවේ ප්‍රජාතන්ත්‍රවාදය තහවුරු කරලීම සඳහා පසුගිය දෙවසර තුළ රජය සිදු කළ කැපවීමෙහි ප්‍රතිඵලයක්,” ලෙස ජීඑස්පී ප්ලස් සහනය යළි ලබා ගැනීමට හැකි වූ බවයි අග්‍රමාත්‍ය රනිල් වික්‍රමසිංහ නිවේදනයක් නිකුත් කරමින් පවසා ඇත්තේ.

ශ්‍රී ලංකාවේ අපනයන භාණ්ඩ සඳහා පනවා තිබූ රේගු බදු ඉවත් කෙරෙන GSP+ සහනය නැවත ක්‍රියාත්මක කිරීම සඳහා හාර මාසයක කාලයක් ගතවනු ඇත.

ඒ කාලය තුලදී යුරෝපා පාර්ලිමේන්තුවට සහ යුරෝපා සංගමයට ඊට එරෙහි කිසියම් විරෝධතාවක් වේ නම් ඉදිරිපත් කළ හැකිය.

 

අනතුරු ඇඟවීමක්

කෙසේ වෙතත්, නැවත GSP+ සහනය ලබා දීමෙන්, ශ්‍රී ලංකාව අදාළ ජාත්‍යන්තර සම්මුති 27 ම සපුරා ඇති බවට පූර්ණ වශයෙන් සෑහීමකට පත්වන බවක් අදහස් නොකෙරෙන බවට යුරෝපා සංගමය අනතුරු අඟවා තිබේ.

එයින් ප්‍රදර්ශනය කෙරෙන්නේ අදාළ සම්මුති මුළුමනින්ම ක්‍රියාත්මක කිරීම සම්බන්ධයෙන් ප්‍රගතියක් අත් කර ගැනීම සඳහා ශ්‍රී ලංකාවට දිරි දීම බවයි යුරෝපා සංගමය පවසන්නේ.

“GSP+ සහනය නිසා යුරෝපා වෙළෙඳපොළට අපනයන වැඩි කිරීමෙන් ශ්‍රී ලංකාවේ ආර්ථික වර්ධනයට සැලකිය යුතු වාසියක් අත්වනු ඇත. එසේ වුවද, මානව හිමිකම්, නීතියේ ආධිපත්‍යය සහ යහපාලන ප්‍රතිසංස්කරණ ක්‍රියාත්මක කිරීම සඳහා ශ්‍රී ලංකාවට අප සහයෝගය දක්වන ආකාරයද මෙයින් පෙන්නුම් කෙරේ,” යනුවෙන් සිසිලියා මල්ම්ස්ට්‍රොම් යුරෝපා වෙළෙඳ කොමසාරිස් වරිය පවසා තිබේ.

 

බරපතල අධීක්ෂණයක්

චිරස්ථායී සංවර්ධනය, මානව හිමිකම් හා යහපාලනය යන ක්ෂේත්‍රවල ශ්‍රී ලංකාව අත් කර ගන්නා ප්‍රගතිය ඉදිරියේදී  “බරපතල අධීක්ෂණයට” ලක් කෙරෙනු ඇති බව පවසන යුරෝපා සංගමය යෝජිත නව ත්‍රස්ත විරෝධී නීති ගැන දැඩි අවධානායක යොමු  කර ඇත.

ශ්‍රී ලංකාවේ ප්‍රතිසංස්කරණ වලදී ත්‍රස්ත විරෝධී අණ පනත් ජාත්‍යන්තර මානව හිමිකම් ප්‍රඥප්ති වලට මුළුමනින්ම අනුකූල විය යුතු බවයි යුරෝපා වෙළෙඳ කොමසාරිස් වරිය කියා ඇත්තේ.

 

19 ව්‍යවස්ථා සංශෝධනය

දහනම වැනි ව්‍යවස්ථා සංශෝධනය සම්මත කරගැනීම ශ්‍රී ලංකාව අත් කරගත් විශිෂ්ඨ ජයග්‍රහණයක් ලෙස යුරෝපා සංගමය විසින් හඳුන්වා තිබේ.

ස්වකීය පදවි ප්‍රාප්තියේ දෙවසර සමරමින් ජනාධිපති මෛත්‍රිපාල සිරිසේන පවසා සිටියේ ස්වාධීන කොමිසම් පත් කෙරුනු 19 වැනි ව්‍යවස්ථා සංශෝධනය සම්මත කර ගැනීම එක්සත් ජාතීන්ගේ මහ ලේකම්වරයාගේත් පැසසුමට ලක්වූ බවයි.

 

මානව හිමිකම් උල්ලංඝන සම්බන්ධයෙන් පියවර නොගැනීම නිසා GSP + බදු සහනය යුරෝපා සංගමය විසින් ශ්‍රී ලංකාවෙන් ඉවත් කරන ලද්දේ 2010 දීය.

ශ්‍රී ලංකාවේ විශාලතම අපනයන වෙළෙඳපොල වූ යුරෝපා සංගමයට 2015 යැවුනු ඇඟලුම්, රබර් නිෂ්පාදන සහ යන්ත්‍රෝපකරණ මුල් කොටගත් නිෂ්පාදන වල වටිනාකම යුරෝ කෝටි 26ක් විය.

ඇඟළුම් ඇතුළු දේශීය නිෂ්පාදනයන්ට පුළුල් ලෙස යුරෝපීය වෙළෙඳපොළට යළි ප්‍රවේශ වීමේ අවකාශ බදු සහන ලැබීමෙන් සැලසෙනු ඇති බව පෙන්වා දෙන අගමැති රනිල් වික්‍රමසිංහ නව රැකියා අවස්ථා ගණනාවක් මෙන්ම නව ආදායම් මාර්ග රැසක්ද රට තුළ නිර්මාණය වනු ඇති බවට විශ්වාසය පල කොට තිබේ.

(Radigagana)