යෝජිත නව ව්‍යවස්ථාව මඟින් බුද්ධාගම පමණක් රාජ්‍ය ආගම කරන බවටත්, උතුරු නැගෙනහිර ඒකාබද්ධ නොකරන බවටත් රජය නිවේදනය කර තිබියදී දෙමළ ජාතික සන්ධානයේ නායක හා විපක්ෂ නායක ආර්.සම්බන්ධන් සහ මන්ත්‍රී එම්.ඒ.සුමන්තිරන් ව්‍යවස්ථා සම්පාදක මණ්ඩලයෙන් තවදුරටත් රැඳි සිටින්නේ මන්ද යන්න දෙමළ ජාතික සන්ධානයේ හිටපු පාර්ලිමේන්තු මන්ත්‍රී සුරෙෂ් ප්‍රේමචන්ද්‍රන් ප්‍රශ්න කරයි.
එම යෝජනා මඟින් දෙමළ ජනතාවගේ අපේක්ෂාවන් බිඳ වැටෙන බව පෙන්වා දෙන සුරේෂ් ප්‍රේමචන්ද්‍රන් විපක්ෂ නායක ආර්. සම්බන්ධන් සහ දෙමළ ජාතික සන්ධානයේ පාර්ලිමේන්තු මන්ත්‍රි එම්.ඒ. සුමන්දිරන් හට බල කර සිටින්නේ වහාම ව්‍යවස්ථා සම්පාදක මණ්ඩලයෙන් ඉල්ලා අස්වී රජය සමඟ නැවතත් සාකච්ඡා කල යුතු බවටයි.
දෙමළ ජනතාව අපේක්ෂා කරන්නේ උතුරු නැගෙනහිර එකතු කොට දෙමළ ජනතාවගේ අයිතිවාසිකම් ආරක්ෂා වන අන්දමේ බලය බෙදාහැරීමේ ක්‍රමයක් බවට දෙමළ ජාතික සන්ධානය රජයට දැනුම්දී තිබියදීත් රජයේ මේ ආකාර ස්ථාවරය හේතුවෙන් දෙමළ ජනතාවගේ ඉල්ලීම් වලට රජය ඇහුම්කන් නොදී දෙමළ ජනතාව නොසළකා හැරීමක් පෙන්ම් කරන බවද ඔහු වැඩි දුරටත් පෙන්වා දී තිබේ.
රජයේ ස්ථාවරය මෙලෙස දැනුම්දී තිබියදී ව්‍යවස්ථා සම්පාදන මණ්ඩලයේ දෙමළ ජනයාගේ නියෝජිතයන් වන විපක්ෂ නායකයා සහ පාර්ලිමේන්තු මන්ත්‍රී සුමන්තිරන් ඒ සම්බන්ධව කතා නොකලේ මන්ද යන්න ප්‍රශ්න කර සිටින සුරේෂ් ප්‍රේමචන්ද්‍රන් පවසන්නේ ආර්.සම්බන්ධන් වැනි දෙමළ නායකයෙක් විපක්ෂ නායක ධුරය දරන මොහොතක දෙමළ ජනයාගේ ගැටලු විසඳිමට පියවර ගැනීම අතවශ්‍යය බවයි.
වත්මන් ජනාධිපතිවරයා බලයට පත් කිරීමේදී මෙන්ම නව රජයට බලය ලබා ගැනීම සඳහා දෙමළ ජනතාවගේ සහාය ලබාදීමේත් අරමුණ වූයේ මෙම ඉල්ලීම් දිනා ගැනීම බවත් ව්‍යවස්ථා සංශෝධනයේදී එසේ කරන බවට රජය පොරොන්දු වී දැන් එය ඉටු නොකිරීම දෙමළ ජනයාට සිදු කරනු ලබන බරපතල අසාධාරණයක් බවත් හිටපු මන්ත්‍රීවරයා වැඩිදුරටත් පවසා ඇත.
Facebook Comments
