සීමා නිර්ණය අභියාචනා කමිටු අවසන් වාර්තාව බාර ගැනීම පළාත් සභා හා පළාත් පාලන අමාත්‍ය ෆයිසර් මුස්තාපා විසින් ප්‍රතික්ෂේප කර ඇත.
එක්සත් ජනතා නිදහස් සන්ධානයෙන් හා එක්සත් ජාතික පක්ෂයෙන් අදාළ කමිටුවට පත් කළ නියෝජිතයන් එම අවසන් වාර්තාවට අත්සන් තබා නොතැබීම හේතුවෙන් තමන් එම වාර්තාව බාර ගැනීම ප්‍රතික්ෂේප කල බවයි ඇමතිවරයා අද (02) පැවති මාධ්‍ය හමුවකදී පවසා සිටියේ.
සීමා නිර්ණය අභියාචනා කමිටු අවසන් වාර්තාව තමන්ට නොලැබීම හේතුවෙන් ඊට අත්සන් තැබීමට නොහැකි වූ බවත් එම වාර්තාව කියවා නොබලා අත්සන් තැබීමට නොහැකි බවයි එම සාමාජිකයින් දෙදෙනා පවසන්නේ.
එජාපය – ශ්‍රීලනිප මැතිවරණ කල් දැමීමේ කුමන්ත්‍රණයක
එක්සත් ජාතික පක්ෂය හා ශ්‍රී ලංකා නිදහස් පක්ෂය නියෝජනය කරන සීමා නිර්ණය කමිටු නියෝජිතයින් හරහා පලාත් පාලන මැතිවරණය කල් දමා ගැනීමේ ලැජ්ජා සහගත උත්සාහයකට එම පක්ෂ දෙක ප්‍රවීශ්ඨ වී බව සහ ෆයිසර් මුස්තාපා අමත්‍යවරයා ඒ සදහා අවමන් සහගත වැඩපිළිවෙලක නිරත වෙමින් සිටින බවට කැෆේ සංවිධානය චෝදනා කරනවා.
සීමා නිර්ණය කමිටු වාර්තාව බාර නොගැනීම සම්බන්ධව නිවේදනයක් නිකුත් කරන කැෆේ සංවිධානය පෙන්වා දෙන්නේ එජාප නායක රනිල් වික්‍රමසිංහ සහ ශ්‍රීලනිප නායක මෛත්‍රීපාල සිරිසේනගේ සෘජු මැදිහත්වීමකින් තොරව අදාළ පක්ෂ වල සාමාජිකයින් එම වාර්තාවට අත්සන් කිරිමෙන් වැළකී නොසිටින බවත් මෙය ඉතා ලැජ්ජා සහගත ක්‍රමන්ත්‍රණයක් බවත්ය.
2016 දෙසැම්බර් 27 දින පුවත්පත් නිවේදනයක් නිකුත් කරමින් කැෆේ සංවිධානය එජාපය හා ශ්‍රීලනිපය විසින් ජනතා පරමාධිපත්‍ය සමග සිදු කරන මෙම ලැජ්ජා සහගත කුමන්ත්‍රණය අනාවරණය කරනු ලැබු බව පෙන්වා දෙන එම සංවිධානය අවධාරණය කරන්නනේ මේ දක්වා අවස්ථා පහක දී සිමා නිර්ණය කමිටුවේ කටයුතු අවසන් කිරීම දේශපාලන අවශ්‍යතාවන් මත අතපසු කොට ඇති බවයි.
මැතිවරණ කල් දැමීමේ රජයේ ප්‍රතිපත්තිය නිසා මේ වන විට පලාත් පාලන රැසක් අර්බුදයට යොමුව ඇති බව සහ නාධිපතිවරයා සහ අගමැතිවරයාගේ අනු දැනුම සහිතව පලාත් පාලන මැතිවරණය කල්දමා ගැනීමට මෙරට ප්‍රධාන දේශපාලන පක්ෂ දෙක සිදු කරනු ලබන ලැජ්ජා සහගත උත්සාහය පරාජය කිරීමට මෙරට දේශපාලන පක්ෂ සහ සිවිල් සංවිධාන පෙරමුණ ගත යුතු යැයි කැෆේ සංවිධානයේ නිවේදනයේ තවදුරටත් දැක්වේ.
Facebook Comments
