පාසල් උත්සව අත්හිටවූ දාම ජනපතිගෙන් උල්ලංඝනයක්

0

කොරෝනා වසංගත ව්‍යාප්තිය හමුවේ දිවයිනේ පාසල් උත්සව අත්හිටවූ දිනයේම සිසු දරු දැරියන්ගේ ද සහභාගිත්වයෙන් ජනාධිපතිවරයා පැල සිටුවා තිබේ.

කෘෂිකර්ම සහ අධ්‍යාපන අමාත්‍යාංශයද සමග හවුල්වී ජනාධිපතිවරයා විසින් දියත් කළ වැඩසටහන “කොරෝනා ඇතුලු බෝ වන රෝග සදහා අවශ්‍ය ප්‍රතිශක්තිය වර්ධනය කිරීමට ඉවහල් වන්නක්” ලෙසින් රටේ වෛද්‍යවරුන්ගේ ප්‍රධානතම වෘත්තීය සමිතියේ පැසසුමට ලක්වී ඇත.

ජනාධිපති මාධ්‍ය ඒකකය නිවේදනය කර ඇත්තේ “කැකුළු තුරු උදානය” ළමා රුක් රෝපණ ජාතික වැඩසටහන ජනාධිපති ගෝඨාභය රාජපක්ෂගේ ප්‍රධානත්වයෙන් පෙබරවාරි 15 සඳුදා පෙරවරුවේ ගම්පොළ අටබාගේ විමලධර්ම ජාතික පාසල් භූමියේදී ආරම්භ කළ බවයි.

පෙබරවාරි 15 සදුදා අධ්‍යාපන ලේකම් මහාචාර්ය කපිල පෙරේරා විසින් පළාත් අධ්‍යාපන අධ්‍යක්ෂවරු, කලාප අධ්‍යාපන අධ්‍යක්ෂවරු, කොට්ඨාස අධ්‍යක්ෂවරු, පරිවේණාධිපතිවරු සහ විදුහල්පතිවරුන්ට ලිඛිතව දැනුම් දී තිබුනේ කෝවිඩ් 19 වසංගත තත්වය තුළ නැවත දැනුම් දෙන තුරු පාසල්වල උත්සව පැවැත්වීම අත්හිටුවන බවයි.

එසේම ඉදිරියේ දී එවැනි උත්සව පැවැත්වීම සඳහා දැනටමත් කටයුතු සංවිධානය කර ඇත්නම් එම කටයුතු ද නතර කිරීමට අවශ්‍ය ක්‍රියාමාර්ග ගන්නා ලෙස ද එම ලිපිය මගින් වැඩි දුරටත් දැනුම් දී තිබුනි.

එම චක්‍රලේඛය නිකුත් කර තිබුනේ පෙබරවාරි 12 දින මහනුවර කෙංගල්ල මහා විද්‍යාලයේ දරුවන් සිව්දෙනෙකුට සහ ගුරුවරියකට කෝවිඩ් 19 ආසාදනය වී තිබියදී ජනමාධ්‍ය අමාත්‍ය කෙහෙලිය රඹුක්වැල්ල විසින් නිරෝධායන පිළිවෙත් ද උල්ලංඝණය කරමින් පාසල් සිසුන් ද සහභාගි කරවාගෙන උත්සවයක් පැවැත්වීමෙන් අනතුරුවය.

නිරෝධායන රෙගුලාසි උල්ලංඝනය කරමින් ජනමාධ්‍ය අමාත්‍යවරයා උත්සවාකාරයෙන් පැල හිටුවීම ලංකා ගුරු සංගමයේ දැඩි විරෝධයට ලක්වීමෙන් අනතුරුව නැවත දැනුම් දෙන තුරු පාසල්වල උත්සව පැවැත්වීම අත්හිටුවීමට අධ්‍යාපන ලේකම්වරයා පෙබරවාරි 15 දිනයේ නියෝග කර තිබුනි.

එදිනම නිවේදනයක් නිකුත් කරමින් ලංකා ගුරු සංගමයේ ප්‍රධාන ලේකම් ජෝසප් ස්ටාලින් අවධාරණය කර තිබුනේ රටේ පවතින වසංගත තත්වය හමුවේ අධ්‍යාපන ලේකම්වරයා දුන් නියෝගය ක්‍රියාත්මක කිරීමට පළාත් අධ්‍යාපන බලධාරීන් කටයුතු කළ යුතු බවයි.

ජනාධිපතිතුමා සහ මැති ඇමතිවරු දරුවන් සමග එක්ව පෙබරවාරි 15 සදුදා දිනයේ පැළ රෝපණය කරමින් “කැකුළු තුරු උදානය” වැඩසටහන ආරම්භ කළ බව ජනාධිපති මාධ්‍ය ඒකකය වැඩි දුරටත් නිවේදනය කර තිබේ.

සංකේතාත්මකව දරුවන් අතර පැළ බෙදා දීම ද සිදු කර ඇත්තේ ද ජනාධිපතිතුමා අතිනි.

ජනාධිපතිවරයා මීට ඉහතදී ප්‍රකාශයට පත් කර තිබුණේ තමන්ගේ වාචික ප්‍රකාශන චක්‍රලේඛ ලෙස සැලකිය යුතු බවයි. අධ්‍යාපන අමාත්‍යාංශ ලේකම්ගේ නියමය අවලංගු කරමින් ජනාධිපතිවරයා වාචික හෝ චක්‍රලේඛයක් නිකුත් කළ බවක් වාර්තා වී නොමැත.

“කැකුළු තුරු උදානය” වාර්ෂිකව ඉදිරියට ගෙන යමින් වසර 05ක් ගත වන විට කොස්, දෙල්, පොල්, අඹ ඇතුළු පැල ලක්ෂ 17ක් දරුවන්ගේ අධීක්ෂණයෙන් පරිසරයට එක් කිරීම තම ඉලක්කය බව ආණ්ඩුව නිවේදනය කර තිබේ.

පාසල් වල පළමු වසරට දරුවන් ඇතුලත් කිරීමට සමගාමීව සිදු කළ රාජ්‍ය රුක් රෝපන වැඩ සටහන අගයමින් නිවේදනයක් නිකුත් කළ රජයේ වෛද්‍ය නිලධාරීන්ගේ සංගමය අවධාරණය කර තිබුනේ දරුවන් සෞඛ්‍ය සම්පන්න ආහාර රටාවකට යොමු කිරීම තුලින් ඔවුන් අතර දැකිය හැකි බොහෝමයක් බෝ නොවන රෝග වලින් ආරක්ෂා කර ගැනීමටත්, කොරෝනා ඇතුලු බෝ වන රෝග සදහා අවශ්‍ය ප්‍රතිශක්තිය වර්ධනය කිරීමටත් ඉවහල් වන බවයි.

රජයේ වෛද්‍ය නිලධාරීන්ගේ සංගමයේ ලේකම් වෛද්‍ය සෙනාල් ප්‍රනාන්දුගේ අත්සනින් යුතුව පෙබරවාරි 16 අගහරුවාදා නිකුත් කළ නිවේදනයේ කොරෝනා වසංගත සමයේ රාජ්‍ය උත්සව සදහා දරුවන් යොදා ගැනීමේ අනිටු පලවිපාක සම්බන්ධයෙන් කිසිදු සඳහනක් කර නොමැත.

Facebook Comments

wedding people