“අසාර්ථක ක්‍රමවේද යොදාගෙන” ඉගැන්වීමට ගුරුවරුන්ට බලපෑම්

0

වසංගත ව්‍යාප්තිය හේතුවෙන් ඇණ හිටීමට ලක්වු පාසල් සිසුන්ගේ අධ්‍යාපන අවස්ථාව වෙනුවෙන් කිසිදු පලදායි ක්‍රියාවලියක් දියත් කර නොමැති බවට දිවයිනේ ප්‍රමුඛතම ගුරු සංගමයක් රජයට චෝදනා කරයි.

ලංකා ගුරු සංගමය පවසන්නේ ඒ වෙනුවට ආණ්ඩුව අසාර්ථක මාර්ග ගත අධ්‍යාපනය ලබාදීමට ගුරුවරුන්ට විවිධාකාරයෙන් බලපෑම් කරමින් සිටින බවයි.

“මේ වන විට අධ්‍යාපන අමාත්‍යාංශය, පළාත් අධ්‍යාපන නිලධාරීන් හා විදුහල්පතිවරු හරහා මෙම බලපෑම සිදුකරමින් සිටී.”

පාසල් අධ්‍යාපනය අඛණ්ඩව පවත්වාගෙන යාම වෙනුවෙන් අසාර්ථක මාර්ග ගත ඉගෙනුම් ක‍්‍රමවේදයම අනුගමනය කිරීමට ගුරුවරුන්ට බල කිරීම කනගාටුදායක තත්වයක් බව පවසන ලංකා ගුරු සංගමයේ ප්‍රධාන ලේකම් අවධාරණය කරන්නේ අධ්‍යාපන ලේකම් මහාචාර්ය කපිල පෙරේරා ද මාර්ග ගත අධ්‍යාපනය අසාර්ථක බව පිළිගත් බවයි.

අසාර්ථකත්වය දැන දැනම එය ම කිරීමට ගුරුවරුන්ට බල කිරීම අධ්‍යාපන බලධාරීන්ගේ එකම පිළිවෙත වී ඇති බව පෙන්වා දෙන ජ්‍යෙෂ්ඨ වෘත්තිය සමිති නායක ජෝසප් ස්ටාලින් පෙන්වා දෙන්නේ යළි පාසල් ආරම්භ කරන තෙක් විධිමත් කාල සටහනකට අනුව රූපවාහීනී මාධ්‍ය උපයෝගී කරගෙන අධ්‍යාපනය ලබාදීම ප‍්‍රායෝගික වැඩපිළිවෙලක් බවයි.

“මේ සඳහා මාධ්‍ය ආයතන ප‍්‍රධානීන් කැඳවා සාකච්ඡා කොට අවශ්‍ය වැඩපිළිවෙලක් සකස් කිරීම අධ්‍යාපන බලධාරීන්ගේ වගකීමකි.”

කෝවිඩ් 19 වසංගතය මෙරට ව්‍යාප්තවීම තුළ ලක්ෂ 43 ක් වන පාසල් සිසුන්ගේ අධ්‍යාපන කටයුතු මේ වන විට ඇණහිට තිබේ. එමෙන්ම දින නියමයක් නොමැතිව පාසල් වසාදමා ඇත.

පාසලේ සෞඛ්‍යාරක්ෂාව

පාසල් යළි ආරම්භ කිරීමට පෙර පාසල් ළමුන් සඳහා ප‍්‍රමිතියෙන් යුතු මුව ආවරණයක් ලබාදීම ඇතුළු පාසල් පද්ධතිය තුළ සෞඛ්‍ය ආරක්ෂිත වැඩපිළිවෙලක් සූදානම් කළ යුතු නමුත් ඒ සඳහා අවශ්‍ය මූල්‍ය ප‍්‍රතිපාදන වෙන් කිරීම පසෙක තබා ආණ්ඩුව රුපියල් බිලියන 54.70 ක් වැය වන රුවන්පුර අධිවේගී මාර්ගයේ ඉදිකිරීම් ආරම්භ කිරීමට කඩිමුඩියේ කටයුතු කළ අතර, ක්‍රීඩා අමාත්‍යවරයා විසින් රුපියල් මිලියන 625 ක් වැයකර කායවර්ධන මධ්‍යස්ථාන 500 සකස් කිරීමට කටයුතු කරමින් සිටින බවටත් ලංකා ගුරු සංගමය චෝදනා කරයි.

පවතින තත්වය තුළ කළ යුතු ප‍්‍රමුඛ කාර්යයන් වන්නේ මෙවන් සංවර්ධන ව්‍යාපෘති වෙනුවෙන් මුදල් වැය කිරීමට පෙර කෝවිඩ් 19 පාලනය කිරීමට අවශ්‍ය එන්නත් ජනතාවට ලබාදීම බවයි ලංකා ගුරු සංගමය පවසන්නේ.

එන්නත් ලබාදිය යුතු ප‍්‍රමුඛ කණ්ඩායමක් වන ගුරුවරුන්ට හා විදුහල්පතිවරුන්ට එන්නත් ලබාදීම නැවත පාසල් ආරම්භයට පෙර කඩිනමින් සිදුවිය යුතු බවත් ඔහු අවධාරණය කරයි.

“පේරාදෙණිය විශ්වවිද්‍යාලය මගින් හඳුන්වාදුන් සෝදා භාවිතා කළ හැකි නැනෝ තාක්ෂණයෙන් යුතු සෞඛ්‍ය ආරක්ෂිත මුව ආවරණය වැනි ප‍්‍රමිතියෙන් යුත් මුව ආවරණ නොමිලේ සියලූ පාසල් සිසුන්ට ලබාදීම, මේ වන විට අබලන්ව ඇති පාසල්වල සෞඛ්‍ය ආරක්ෂිත මෙවලම් සකස් කිරීම, විෂබීජ නාශක ද්‍රව්‍ය ප‍්‍රමාණවත් ලෙස පාසල්වලට ලබාදීම ඇතුළු අවශ්‍ය කටයුතු සඳහා මුදල් ප‍්‍රතිපාදන ලබාදීම කළයුතු ප‍්‍රමුඛ කාර්යයකි.” ලංකා ගුරු සංගමය නිකුත් කළ නිවේදනයක වැඩි දුරටත් සඳහන්ය.

මේ අතර අනුරාධපුරයේ බෞද්ධ නාහිමිවරුන් මුණගැසීමෙන් අනතුරුව අධ්‍යාපන අමාත්‍ය ජී ඇල් පීරිස් ප්‍රකාශකර තිබුනේ පාසල් යලි විවෘත කිරීම සම්බන්ධයෙන් වෛද්‍ය විශේෂඥයන් හා අධ්‍යාපන ක්ෂේත්‍රයේ ප්‍රමුඛයන් සමග බදාදා සාකච්චාවක් පවත්වන බවයි.

Facebook Comments

wedding people