වසංගතයෙන් දේශපාලන සිරකරුවන් ගලවා ගැනීමට ආයාචනයක්

0

වසර ගණනාවක් තිස්සේ සිර ගතව සිටින දේශපාලන සිරකරුවන්ගේ ජීවිත වසංගත අවදානමෙන් මුදවා ගැනීම සඳහා ඔවුන් නිදහස් කරගැනීමට මැදිහත් වන්නැයි දෙමළ දේශපාලනඥයන් වෙත ඉල්ලීමක් ඉදිරිපත් වී තිබේ.

නිවේදනයක් නිකුත් කරමින් “හඬක් නැතියවුන්ගේ හඬ” සංවිධානය සහ දේශපාලන සිරකරුවන්ගේ ඥාතීන් දෙමළ දේශපාලනඥයන්ගෙන් ඉල්ලා ඇත්තේ දේශපාලන සිරකරුවන් නිදහස් කරගැනීම සම්බන්ධයෙන් ජනාධිපතිවරයා සහ අගමැතිවරයා සමග සාකච්ඡා කරන ලෙසයි.

එම නිවේදනයේ දැක්වෙන පරිදි මේ වන විට සිරගතව සිටින දේශපාලන සිරකරුවන් ගණන 79 කි.

ඒ අතරින් දේශපාලන සිරකරුවන් 40 දෙනකු කොළඹ මැගසින් බන්ධනාගාරයේත්, 27 දෙනකු අනුරාධපුර බන්ධනාගාරයේ තවත් 12 දෙනකු අනෙකුත් බන්ධනාගාර තුලත් රදවා සිටින බව “හඬක් නැතියවුන්ගේ හඬ” සංවිධානය පෙන්වා දෙයි.

ඔවුන් අවධාරණය කරන්නේ එකදු දිනයක හෝ අධිකරණයකට ඉදිරිපත් නොකර වසර විස්සකට අධික කාලයක් තිස්සේ බන්ධනාගාරගතව සිටින දේශපාලන සිරකරුවන් ද ඒ අතර වන බවයි.

දේශපාලන සිරකරුවන් අතරින් බහුතරය කායික රෝග වලට අමතරව දැඩි මානසික ආතතියකට මුහුණ දි සිටින බවත් ඔවුන් සිය නිවේදනයෙන් අවධාරණය කර තිබේ.

ආණ්ඩුවේ පරස්පරය

ශ්‍රී ලංකාවේ බන්ධනාගාර තුළ දේශපාලන සිරකරුවන් සිටින්නේද නැද්ද යන්න සම්බන්ධයෙන් මේ වන විට ආණ්ඩු පක්ෂය තුලම ඇත්තේ පරස්පර අදහසකි.

ශ්‍රී ලංකා දණ්ඩ නීති සංග්‍රහය යටතේ දේශපාලන චෝදනා මත සිර දඩුවම් ලැබු සිරකරුවන් කිසිවකුත් මේ වන විට ශ්‍රී ලංකා බන්ධනාගාර ආයතනයෙහි රදවා නොමැති බව ජනවාරි 7 වැනිදා අධිකරණ අමාත්‍ය ජනාධිපති නීතිඥ අලි සබ්රි පාර්ලිමේන්තුවේ පවසද්දී, ආණ්ඩුව නියෝජනය කරන ජාතික ලැයිස්තු මන්ත්‍රී සුරේන් රාඝවන් පවසා තිබුනේ “තාක්ෂණික වශයෙන්” ප්‍රතික්ෂේප කෙරුණත් ලංකාවේ දේශපාලන සිරකරුවන් සිටින බවයි.

“නමුත් අපි දන්නවා යතාර්ථය හැටියට දේශපාලන කටයුතු වලට සම්බන්ධ සිංහල, දෙමළ මුස්ලිම් යන ජාතින් තුනේම සිරකරුවන් තවමත් ඉන්න බව” මන්ත්‍රීවරයා පවසා තිබුනි.

දේශපාලන සිරකරුවන් සම්බන්ධයෙන් ආණ්ඩුව ගන්නා පියවර කවරේදැයි මන්ත්‍රීවරයා විමසු කළ අධිකරණ අමාත්‍යවරයා පවසා තිබුනේ ඒ සම්බන්ධයෙන් ආණ්ඩුව ප්‍රතිපත්තිමය තිරණයක් ගත යුතු බවයි.

අධිකරණ ඇමැතිවරයාට අනුව 2020 වසරේ ඔක්තෝබර් 31 දින වන විට ත්‍රස්තවාදය වැලැක්වීමේ පනත යටතේ සිර දඩුවම් ලබා සිටින සියලු දෙනා දෙමළ ජාතිකයන් වේ.

ඒ අතර මරණීය දණ්ඩණය නියමු වු සිරකරුවෙකු, ජීවිතාන්තය දක්වා සිර දඩුවම් නියමු වු දෙදෙනෙකු, සාමාන්‍ය සිර දඩුවම් නියම වු තිදෙනෙකු, මරණීය දණ්ඩනය නියම කිරීමෙන් පසු අභියාචනා කළ එක් අයෙකු, ජීවිතාන්තය දක්වා සිර දඩුවම් නියම කිරීමෙන් පසු අභියාචනා කළ හත් දෙනෙකු, සාමාන්‍ය සිර දඩුවම් නියම කිරීමෙන් පසු අභියාචනා කළ තිදෙනෙකු ද වේ.

ත්‍රස්තවාදය වැලැක්වීමේ පනත යටතේ සහ එල්.ටී.ටී.ඊ ක්‍රියාකාරකම් යටතේ චෝදනා ලබා හෝ සිරගත කර හෝ සැක බාල වයස්කාර දරුවන් කිසිවකුත් මේ වන විට ශ්‍රී ලංකා බන්ධනාගාර ආයතනය තුළ රදවා නොමැති බව අධිකරණ අමාත්‍ය ජනාධිපති නීතිඥ අලි සබ්රි ජනවාරි 7 දා පාර්ලිමේන්තුව හමුවේ ප්‍රකාශ කර තිබුනි.

Facebook Comments

wedding people