යුද්ධයේ අවසන් සති කිහිපයේදී ඇතැම් එල්.ටී.ටී.ඊ නායකයින් සිය ආරක්ෂාව පතා ආරක්ෂක අමාත්‍යංශයේ නිලධාරීන්ට මුදල් ගෙවා විදේශගතව ඇතැයි විදේශ කටයුතු අමාත්‍යවරයා අනාවරණය කරනවා.
2006 වසරේ යුද්ධයේ අවසන් කාලයේදී එවැනි දෑ සිදුව ඇති බවත්, එසේ විදේශ ගතවූවන්ද අතුරුදන් වූවන් ලෙස ලැයිස්තු ගත කර ඇති බවත්, ඒ අනූව ඔවුන් ගැනද සොයා බැලිය යුතු බවත්, ඊට අතුරුදන් වූවන්ගේ කාර්යාලය ස්ථාපිත කිරීමේ පනතින් ඉඩ ලැබෙන බවයි විදේශ අමාත්‍ය මංගල සමරවීර පෙන්වා දෙන්නේ.
අතුරුදන් වූවන්ගේ කාර්යාලය ස්ථාපිත කිරීමට අදාළව එහි වත්මන් තත්ත්වය සම්බන්ධයෙන් දෙස් විදෙස් මාධ්‍යවේදීන් දැනුවත් කිරීම සඳහා සිය අමාත්‍යංශයේදී ඊයේ (29) පැවැති මාධ්‍ය හමුවේදී ඇමතිවරයා මේ බව පැවසීය.
මෙම කාර්යාලය පිළිබඳ ඇතැමුන් ජනතාව අතරට වැරදි මත ගෙන යන බවත්, මෙමගින් යුද හමුදාව කිසිවිටෙකත් බිල්ලට නොදෙන බවත්, සිදුවන්නේ ඔවුන්ගේ ආරක්ෂාව තහවුරු වීම බවයි අමාත්‍යවරයා අවධාරණය කරන්නේ.
අතුරුදන් වූවන් සම්බන්ධයෙන් සොයාබැලීමට ස්ථාපිත කළ කාර්යාලය තවත් මාස 3ක් ඇතුළත ස්ථාපිත කෙරෙන බවද, ඊට අධිකරණ බලයක් නොලැබෙන බවද එහි නිර්දේශ ක්‍රියාත්මක කරනු ලබන්නේ ශ්‍රී ලංකාවේ පවත්නා නීතියට අනූව බවද ඔහු පෙන්වා දෙයි.
ජවිපෙ විසින් මේ සඳහා ගෙන ලද සංශෝධන ඇතුළත් කිරීමට බලාපොරොත්තු වන බවද විදේශ අමාත්‍ය මංගල සමරවීර වැඩිදුරටත් ප්‍රකාශ කළේය.
Facebook Comments
