අවුරුද්දක් රඳවාගත් කවියාට විරුද්ධව තවමත් චෝදනා නෑ

කවි පොතක් ලිවීම පාදක කරගනිමින් අත්අඩංගුවට ගෙන වසරකට ආසන්න කාලයක් තිස්සේ රඳවාගෙන සිටින තරුණ මුස්ලිම් කවියකු අන්තවාදී කටයුතු වලට සම්බන්ධ බවට ප්‍රකාශයක් ලබා නොදෙන නිසා තර්ජනයට හා වධහිංසාවට ලක්ව සිටින බව ශ්‍රේෂ්ඨාධිකරණයට ගොනු කරන ලද පෙත්සමකින් කරුණු දක්වා තිබේ.

කවියා අන්තවාදී කටයුතු වලට සම්බන්ධ බවට සාක්ෂි සොයාගත නොහැකි වූ ත්‍රස්ත මර්දන හා විමර්ශන කොට්ඨාශයට අවශ්‍ය ලෙස පාපොච්චාරණයක් ලබා දෙනතුරු, නඩු ඇසීමකින් තොරවම රැඳවුම් භාරයේ තබන්නට අධිකරණය ඉඩ දී ඇතැයි ද ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS)වෙබ් අඩවිය වාර්තා කරයි.

කොළඹ අංක 8 මහේස්ත්‍රාත් අධිකරණයේ මහේස්ත්‍රාත්වරයා විසින් එවැනි නියෝගයක් නිකුත් කොට ඇත්තේ පසුගිය වසරේ මැයි මාසයේදී අත්අඩංගුවට ගත් මන්නාරම, සිලාවතුර පදිංචි දෙමළ භාෂා ගුරුවරයකු මෙන්ම කවියකුද වන මුහම්මදු අහ්නාෆ් මුහම්මදු ජසීම් පිළිබදව අධිකරණය හමුවට ඉදිරිපත් කොට තිබුණු පොලිස් වාර්තාවෙන් කරන ලද ඉල්ලීමට අවසර දෙමිනි.

මුස්ලිම් කවියා 2012-2019 කාලය තුලදී යි “ISIS ත්‍රස්ත සංවිධානයේ ක්‍රියාකාරකම් සඳහා ඇතිවු කැමැත්ත මත මුස්ලිම් අන්තවාදයට යොමුවී ඇති බව අංක බී / 44230/8/20 දරණ පොලිස් වාර්තාවේ ඇති බව JDS පවසයි.

‘නවරසම්’ නමැති කාව්‍ය ග්‍රන්ථය රචනා කිරීම නිසා අත් අඩංගුවට ගන්නා ලද අහ්නාෆ් ජසීම් තරුණ කවියා ත්‍රස්ත මර්දන පොලිසිය භාරදී ශාරීරික හා මානසික වධයටද ගොදුරු වී තිබෙන ආකාරයත් ජේ.ඩී.එස් විසින් අනාවරණය කර තිබේ.

පසුගිය වසරේ දෙසැම්බර් 11 දින ඉදිරිපත් කොට තිබුණු බී වාර්තාව උපුටා දක්වමින් ජේ.ඩී.එස් පවසන්නේ අන්හාෆ් ජසීම් මහේස්ත්‍රාත්වරයා හමුවේ ප්‍රකාශයක් කිරීමට කැමැත්තෙන් සිටින බවක් ත්‍රස්ත මර්දන හා විමර්ශන කොට්ඨාශය (CTID) විසින් එහි සඳහන් කර ඇති බවයි.

ත්‍රස්ත මර්දන හා විමර්ශන කොට්ඨාශය අධිකරණයට පවසා ඇති ආකාරයේ ප්‍රකාශයක් කිරීමට අහ්නාෆ් ජසීම් කිසිදු අවස්ථාවක කැමැත්ත පල කර නොමැති බවට කවියාගේ නීතිඥයෝ තහවුරු කරති.

අහ්නාෆ් වෙනුවෙන් අධිකරණය හමුවේ පෙනී සිටින නීතිඥ සංජය විල්සන් ජයසේකර ජේඩීඑස් වෙබ් අඩවියට පවසා ඇත්තේ එය හුදෙක්ම අහ්නාෆ් ට එරෙහිව ඉදිරිපත් කොට තිබෙන ව්‍යාජ චෝදනා අධිකරණය හමුවේ සනාථ කිරීමට මාස ගණනක් තිස්සෙම නොහැකි වූ කල ගොතන ලද්දක් බවයි.

පියාටත් තර්ජන

”CTID ය අධිකරණයට ඉදිරිපත් කරලා තියෙන බී වාර්තාවේ තියෙන ප්‍රකාශයක් දෙන්න කැමැත්තෙන් ඉන්නවාය කියන කතාව අමු බොරුවක්. අහ්නාෆ් ට විරුද්ධව ගොතලා තියෙන චෝදනා ටික ඔප්පු කර ගන්න ක්‍රමයක් නැතුවයි ඒ ගොල්ලෝ ඉන්නේ. ඒ නිසාම තමයි මාස ගානක් රඳවගෙන ඉලා දැන් ඔය විදිහේ වාර්තාවක් ඉදිරිපත් කරලා තියෙන්නේ. මේක නීතිය අමු අමුවේම උල්ලංඝණය කිරීමක්. නමුත් ගැටළුව තමයි අධිකරණයත් මේ තත්වය සැලකිල්ලට අරන් නැති එක,” යි නීතිඥ සංජය විල්සන් වැඩිදුරටත් සඳහන් කර තිබේ.

තමන් අපරාධකරුවකු කරන ප්‍රකාශයක් දීම තරුණ කවියා විසින් ප්‍රතික්ෂේප කළ විට ඔහු නම්මා ගැනීම සදහා CTID යේ ප්‍රධානියාම ඔහුගේ පියාට තර්ජනය කර තිබෙන බව ජ්‍යෙෂ්ඨ නීතිඥ මඩුල්ලක් විසින් අප්‍රේල් 10 දා ශ්‍රේෂ්ඨාධිකරණයේ ගොනු කරන ලද මූලික අයිතිවාසිකම් පෙත්සමක කියැවෙන බව ජේ.ඩි.එස් වෙබ් අඩවිය වැඩි දුරටත් වාර්තා කර ඇත.

මන්නාරමුදු අහ්නාෆ් ලෙසින් දෙමළ පාඨකයන් අතරේ ප්‍රකට 26 හැවිරිදි කවියා රඳවා තැබීම සඳහා ජනාධිපති ගෝඨාභය රාජපක්ෂ අත්සන් කළ නියෝගය අධිකරණය හමුවේ අභියෝගයට ලක්ව ඇති බවයි ජේ.ඩී.එස් වෙබ් අඩවිය පවසන්නේ.

ජනපතිගේ අත්සන

අහ්නාෆ් ජසීම් රඳවා තබාගැනීම සඳහා පළමුවෙන්ම නිකුත් කළ නියෝගයේ වලංගු භාවය අභියෝගයට ලක් කරන නීතිඥයන් පෙන්වා දෙන්නේ ආරක්ෂක අමාත්‍යවරයකු හැර වෙන කිසිවකුට ත්‍රස්තවාදය වැළක්වීමේ පනත යටතේ රැඳවුම් නියෝගයක් අත්සන් කිරීමේ බලයක් නැති බවයි.

ශ්‍රී ලංකාවේ ආරක්ෂක අමාත්‍යවරයකු නොසිටි 2020 මැයි 19 වැනිදා එම නියෝගය අත්සන් කර ඇත්තේ ජනාධිපති ගෝඨාභය රාජපක්ෂ විසිනි.

“ජනාධිපතිවරයා මෙම රඳවා තබා ගැනීමේ නියෝගය අත්සන් කරන්නේ ආරක්ෂක අමාත්‍යවරයා ලෙසද යන්න රඳවා තබා ගැනීමේ නියෝගයේ සඳහන් නොවේ,” යි මූලික අයිතිවාසිකම් පෙත්සම ශ්‍රේෂ්ඨාධිකරණයට කරුණු දක්වා තිබේ. ජේ.ඩි.එස් වෙබ් අඩවිය වැඩි දුරටත් වාර්තා කර තිබේ.

ජ්‍යෙෂ්ඨ නීතිඥ මඩුල්ලක් විසින් ගොනු කරන ලද පෙත්සමින් වගඋත්තරකරුවන් ලෙස නම් කර ඇත්තේ ආරක්ෂක අමාත්‍යාංශයේ ලේකම් කමල් ගුණරත්න, පොලිස්පති, අපරාධ පරික්ෂණ දෙපාර්තමේන්තුවේ අධ්‍යක්ෂ CTID අධ්‍යක්ෂ ප්‍රසන්න ද අල්විස් සහ ත්‍රස්ත විමර්ශන කොට්ඨාශයේ වවුනියා ඒකකයේ පොලිස් පරික්ෂක කේ.කේ. ජේ අනුර ශාන්ත සහ නීතිපතිවරයා ය.

“ISIS කියා පිළිගන්නා තුරු කවියා හිරේ තියන්නට පොලිසිය සමග උසාවිය එකඟවෙයි” මැයෙන් ජේඩීඑස් වෙබ් අඩවිය කර තිබෙන අනාවරණයේ වැඩි දුර තොරතුරු පහත යොමුවෙන්

http://www.jdslanka.org/s/index.php/2014-12-19-17-57-19/2014-12-20-03-06-54/966-poet-ahnaf-jazeem