නිරෝධායනයේදී පොලුපාර දුන් බවට පොලිස්පතිට පැමිණිල්ලක්

රජයේ අමාත්‍යවරයකු සමග ගැටුමකට මැදිවී සිටියදී රිමාන්ඩ් ගත කරන ලද සිවිල් ක්‍රියාධරයකුට බන්ධනාගාර ප්‍රධානියකු විසින් වධහිංසා කළ බවට පොලිස්පතිවරයාට පැමිණිල්ලක් ඉදිරිපත් කර තිබේ.

රක්ෂිත බන්ධනාගාරගත කර සිටි මහජන අයිතීන් සුරැකීමේ පදනමේ කැඳවුම්කාර අසේල සම්පත්ට පහරදීම සම්බන්ධයෙන් විමර්ශනයක් පවත්වා වගකිවයුත්තන් නීතිය හමුවට පමුණුවන ලෙස ඉල්ලමින් අප්‍රේල් 27 අඟහරුවාදා පොලිස්පතිවරයා වෙත එම පැමිණිල්ල සිදු කර ඇත්තේ සිරකරු අයිතිවාසිකම් සුරැකීමේ කමිටුව විසිනි.

අසේල සම්පත් අප්‍රේල් මස 13 වන දින කොම්පඤ්ඤවීදිය පොලීසිය මගින් අත්අඩංගුවට ගෙන අප්‍රේල් 14 දින කොළඹ මහේස්ත්‍රාත් අධිකරණයට ඉදිරිපත් කිරීමෙන් පසු අප්‍රේල් 19 දක්වා රක්ෂිත බන්ධනාගාරගත කරන ලදි.

සිරගතව සිටින කාලයේ ඔහුගේ ජීවිතය අවදානමේ වැටී ඇති බවට මහජන අයිතීන් සුරැකීමේ පදනම බිය පල කර තිබුණි.

පොලිස්පතිවරයාට යොමු කළ පැමිණිල්ල මගින් සිරකරු අයිතිවාසිකම් සුරැකීමේ කමිටුව සදහන් කර ඇත්තේ අසේල සම්පත් බෝගම්බර බන්ධනාගාර නිරෝධායන මධ්‍යස්ථානයේ සිටින විට අප්‍රේල් 20 වන දින පෙරවරු 9.30 ත් 10.00 ත් අතර කාලය තුලදී එම ස්ථානයේ එදින ප්‍රධානියා වශයෙන් රාජකාරි කළ ජගත් නැමැති නිලධාරියා විසින් ඔහුට පොල්ලකින් පහර දී ඇති බවයි.

“එම අවස්ථාවේදී තවත් බන්ධනාගාර නිලධාරීන් දෙදෙනෙක් විසින්ද ඔහුට පහර දී ඇති අතර ඔවුන් නැවත දුටුවහොත් හදුනාගැනීමේ හැකියාව ඔහුට ඇත.”

එකී පහරදීම හේතුවෙන් අසේල සම්පත් මේ වන විට රෝහල් ගතව ප්‍රතිකාර ලබමින් සිටින බව සිරකරු අයිතිවාසිකම් සුරැකීමේ කමිටුව අවධාරණය කරයි.

සංගමයේ ලේකම් සුදේශ් නන්දිමාල් සිල්වා, සභාපති නීතිඥ සේනක පෙරේරා සහ ජාතික සංවිධායක නිසාර් මවුලානා ගේ අත්සනින් යුතුව පොලිස්පතිවරයා වෙත යොමු කළ පැමිණිල්ල මගින් වැඩි දුරටත් ඉල්ලා ඇත්තේ අසේල සම්පත් යන අයට පහර දුන් ඉහත කී බන්ධනාගාර නිලධාරීන් සම්බන්ධයෙන් සොයා බැලීමට අපරාධ විමර්ශනයක් සිදු කරන ලෙසත්, වගකිවයුත්තන් අත්අඩංගුවට ගෙන නීතිය ඉදිරියට පමුණුවන ලෙසයි.

කොළඹ කොටුව මහේස්ත්‍රාත් අධිකරණය විසින් අසේල සම්පත්ට අප්‍රේල් 19 දින ඇප ලබා දුන් අතර ඒ අනුව ඔහු අප්‍රේල් 26 වන දින බන්ධනාගාරයෙන් නිදහස් වී තිබුනි.

අප්‍රේල් 14 දින අසේල සම්පත් රක්ෂිත බන්ධනාගාරගත කිරීමෙන් පසුව මීගමුව පල්ලන්සේන බන්ධනාගාර නිරෝධායන මධ්‍යස්ථානයටත් පසුව අප්‍රේල් 17 වන දින බෝගම්බර බන්ධනාගාර නිරෝධායන මධ්‍යස්ථානයටත් මාරු කර යවා ඇත.

මහජන අයිතීන් සුරකීමේ පදනමේ වත්මන් කැදවුම්කරු අසේල සම්පත් අත්අඩංගුවට ගැනීමට හේතුව ලෙස පොලිස් මාධ්‍ය ප්‍රකාශක, නියෝජ්‍ය පොලිස්පති අජිත් රෝහණ පවසා තිබුනේ කොම්පඤ්ඤ වීදියේ වොක්ෂෝල් විදියේ පිහිටි පාරිභෝගික සේවා අධිකාරීයට පැමිණ එහි නිලධාරීන්ගේ රාජකාරී කටයුතුවලට බාධා කිරීමේ සිද්ධියක් සම්බන්ධයෙන් ඔහුට එරෙහිව ගොනුකළ නඩුවකට අදාළව නිකුත් කර තිබු විවෘත වරෙන්තුවක් මත ඔහු අත්අඩංගුවට ගත් බවයි.

මහජන අයිතීන් සුරැකීමේ පදනම පවසන්නේ ප්‍රසිද්ධියේ සතිපතා මාධ්‍ය ඉදිරියේ පෙනීසිටී අසේල සම්පත්ට එරෙහිව විශාල කාලයක් තිස්සේ ක්‍රියාත්මක නොවූ වරෙන්තුවක් කොම්පඤ්ඤවීදිය පොලිසිය විසින් හදිසියේ ක්‍රියාත්මක කර ඇති බවයි.

තම සභාපති අසේල සම්පත්ට එරෙහිව “නීතිය මගින් ක්‍රියා කරන බවට හැඟෙන ආකාරයෙන්” වෙළෙඳ අමාත්‍ය බන්දුල ගුණවර්ධන විසින් ප්‍රකාශයක් කිරීමෙන් අනතුරුව අත් අඩංගුවට ගැනීම සිදුවූ බව මහජන අයිතීන් සුරැකීමේ පදනම මීට ඉහතදී පවසා තිබුණි.

“අසේල සම්පත් මහතා ලංකා සතොස විසින් ලබා දෙන බඩු මල්ලේ නිශ්පාදන කීපයක් පිළිබඳව ප්‍රශ්න කිරීම් සිදුකල මාධ්‍ය සාකච්ඡාව සම්බන්ධයෙන් අමාත්‍ය බන්දුල ගුණවර්ධන පාර්ලිමේන්තුවේ 2021 අප්‍රේල් මස 7 වනදා කරුණු දැක්වූ අතර, එහිදී ඔහු අසේල සම්පත් යන අයට එරෙහිව නීතිය ක්‍රියාත්මක කල යුතු බවට හැඟෙන ආකාරයෙන් ප්‍රකාශයක් සිදු කළේය,” යි එම පදනමේ මාධ්‍ය අධ්‍යක්ෂ චිරන්ත අමරසිංහ විසින් අප්‍රේල් 15 දා නිකුත් කරන ලද නිවේදනයක සඳහන් වේ.

ක්‍රියාකාරී සිවිල් සමාජ ක්‍රියාධරයකු වන අසේල සම්පත් සමස්ත ලංකා ආපන ශාලා හිමිකරුවන්ගේ සංගමයේ ජාතික සංවිධායක ලෙසද කටයුතු කළ අයෙකි.