පාස්කු ඉරිදා ප්‍රහාර කල්තියා වළක්වා ගැනීමට නොහැකිවීම පිළිබඳව සත්‍ය අගමැතිවරයාගෙන් හෙළි කර ගත හැකි වනු ඇති බවට වාමාංශික නායකයෙක් විශ්වාසය පල කර තිබේ.
අගමැති රනිල් වික්‍රමසිංහ පාස්කු ප්‍රහාර සම්බන්ධව තොරතුරක් ලැබී එය වැළැක්වීමට ගන්නා ලද උත්සාහයන් යමකු විසින් අවහිර කිරීමක් සිදු කළේ ද යන්න පාස්කු ප්‍රහාර සම්බන්ධ සොයා බැලීමට පත් කරන ලද පාර්ලිමේන්තු තේරීම් කාරක සභාව හමුවේ හෙළි වෙතැයි නව සම සමාජ පක්ෂ නායකයා කියා සිටියේය.
“මේක තවදුරටත් හෙළිදරව් වෙයි තේරිම් කාරක සභාවල විස්තරය එළියට ගත්තට පස්සේ. මේ ප්‍රශ්න එයාටත් ඉදිරිපත් කරයිනෙ. අගමැතිතුමාට ප්‍රශ්න ඉදිරිපත් කරයි. එතුමානේ බලධරයා,” යැයි ආචාර්ය වික්‍රමබාහු කරුණාරත්න මාධ්‍ය වෙත සඳහන් කළේය.
19 වන ව්‍යවස්ථා සංශෝධනය අනුව බලය හිමිව ඇති අගමැතිවරයා පාස්කු ප්‍රහාර සම්බන්ධව කල් තියා දැන සිටිය ද එසේ නම් ඒ සඳහා ක්‍රියාත්මක නොවුනේ ඇයි දැයි යන ප්‍රශ්නය රට හමුවේ ඇති බව ද ආචාර්ය වික්‍රමාබාහු පැවසීය.
පාස්කු ප්‍රහාරය එල්ල වන අවස්ථාවේ අගමැති රනිල් වික්‍රමසිංහ පසුවුයේ පැහැරගත් තම අගමැති ධුරය විශාල යුද්ධයක් කර නැවත ලබා ගත් අවස්තාවක බව ද නසසප නායකයා සිහිපත් කර දුනි.
පාස්කු ප්‍රහාර සම්බන්ධ සොය බලන පාර්ලිමේන්තු තේරිම් කාරක සභාවෙන් කැඳවීමක් ලැබුනහොත් ඒ සඳහා යාමට තමන් සුදානම් බවද අගමැති රනිල් වික්‍රමසිංහ ප්‍රකාශ කර ඇත.
Facebook Comments
