රාජපක්ෂ පාලන සමයේදී රජයේ ආරක්ෂක අංශ විසින් සිදු කරන ලද අපරාධ සම්බන්ධ සොයා බලන විමර්ශන නිලධාරින්ට “එළියට බහින්න බැරි තත්ත්වයක්” උදා කර ඇති බවට අපරාධ පරීක්ෂණ දෙපාර්තුමේන්තු අධ්‍යක්ෂක මුල් වරට ප්‍රසිද්ධියේ ප්‍රකාශ කර තිබේ.
දේශපාලන නායකයින්, මාධ්‍යවේදීන් හා බෞද්ධ භික්ෂුන් තමන් ඇතුළු විමර්ශකයින් ඩයස්පෝරවෙන් යැපෙන පුද්ගලයින් හා දඩ බල්ලන් ලෙසට අසත්‍ය චෝදනා කර ඇති බවට අපරාධ විමර්ශනය පිළිබඳව ප්‍රසිද්ධියක් උසුලන නියෝජ්‍ය පොලිස්පති ශානි අබේසේකර කියා සිටියේය.
හමුදා බුද්ධී අංශ වලට ඇති චෝදනා යුද්ධයට සම්බන්ධ නැති බව කී රහස් පොලිස් අධ්‍යක්ෂකවරයා යුද අපරාධ සම්බන්ධව මේතාක් කිසිඳු පරීක්ෂණයක් පවත්වා නැති බව ද අවධාරණය කළේය.
“යුද හමුදා බුද්ධි අංශයට අදාළව විමර්ශන ගණනාවක් කරලා තියෙනවා. ඒවා එකක්වත් මම ඉල්ල ගත්තුවා නෙමෙයි. ඒවා රටේ නීතියට පටහැනිව කරපු ක්‍රියාවල් යුද්ධයෙන් වෙච්ච දේවලුත් නෙමෙයි. යුද අපරාධ ගැන අපි කවදාවත් පරීක්ෂණ කරලා නැහැ. මේ රටේ දණ්ඩ නීති සංග්‍රහය යටතේ දඬුවම් ලැබිය හැකි වරදවල් සම්බන්ධව පැමිණිලි ආපුවම පරීක්ෂණ කරන්න ඕනේ. ඒක මගේ රාජකාරිය මට පඩි ගෙවන්නේ ඒකට.” යි ඔහු පැවසීය.
පාස්කු ප්‍රහාර සොයා බැලීමේ පාර්ලිමේන්තු තේරිම් කාරක සභාවට බුද්ධි නිලධාරීන් ගෙන්වීමට ඇතැම් පිරිස් විරෝධය දැක්වුවද තමන් ඇතුළු රහස් පොලිස් විමර්ශකයින්ට අසත්‍ය චෝදනා කරන විට කිසිවෙක් කතා නොකළ බව ද නියෝජ්‍ය පොලිස්පති ශානි අබේසේකර සිහිපත් කර දුන්නේය.
රහස් පොලිස් අධ්‍යක්ෂකවරයා ආණ්ඩුවේ න්‍යාය පත්‍රයට අනුව හමුදා බුද්ධි නිලධාරින් දඩයම් කරන බවට දැඩි මතධාරී බෞද්ධ භික්ෂුන් මෙන්ම සාකකරුවන් වෙනුවෙන් පෙනී සිටින නීතිඥවරුන්ද ප්‍රසිද්ධියේ චෝදනා කරති.
කෙසේ වෙතත් එම චෝදනා වලට පිළිතුරු දීමට තමන් හට අවස්ථාවක් නොලද බව කී රහස් පොලිස් අධ්‍යක්ෂකවරයා එම චෝදනා ප්‍රතික්ෂේප කර සිටියේ පාස්කු ප්‍රහාර සොයා බැලීමට පත් කරන ලද තේරිම් කාරක සභාව හමුවේ සාක්ෂි ලබා දීමට පැමිණි අවස්ථාවේදීය.
නියෝජ්‍ය පොලිස්පති ශානි අබේසේකර එම චෝදනා වලට පිළිතුරු දෙමින් කියා සිටියේ තමා ලද අවස්ථාවෙන් ප්‍රයෝජන ගැනීමක් ලෙස පවසමිනි.
“මගේ ළමයි දෙන්නට උගන්න ගන්න බැරුව ඉඳලා බුද්ධි අංශේ විමර්ශන කරලා ඩයස්පෝරා එකෙන් සල්ලි අරගෙන පිටරට ඇරියා කියලත් චෝදනා කළා. මගේ ළමයි දෙන්නා එයාර්පෝට් එකක් තියෙන ඉඩමකට පය ගහලා නෑ තාම. කවුරුත් කරන්නෙත් නැහැ අපි ගොළුවෝ හින්දා මේ අවස්ථාව හින්දා මේ කියන්න ඕනනේ. කියන තැනකුත් අයේ ජිවිත කලේටම එක එක්ක නැහැ.”
අපරාධ පරීක්ෂණ දෙපාර්තුමේන්තු අධ්‍යක්ෂකවරයාට සිදුව ඇති තත්ත්වය අසා සිටි තේරීම් කාරක සභා නිලධාරින් ඔහුට ඇතිව ඇති තත්ත්වය පිළිබඳව කණගාටුව පළ කළේය.
බුද්ධි අංශ නිලධාරින් උසාවියට ගෙන එම ගැටලුවක් නොවන බව පෙන්වා දුන් රහස් පොලිස් අධ්‍යක්ෂක ශානි අබේසේකර එහෙත් මෙවැනි අසත්‍ය චෝදනා වලින් “එළියට බැහැලා යන්න බැරි තත්ත්වයක්” උදා වී ඇති බව කියා සිටි අතර ඉදිරියේදී මෙවන් දෙයක් සිදු නොවීමට අවශ්‍ය ක්‍රියාමාර්ග ගන්නා ලෙස තේරීම් කාරක සභාවෙන් වැඩි දුරටත් ඉල්ලා සිටියේය.
Facebook Comments
