අබලන් බහු දින ධීවර යාත්‍රාවකින් මුලතිව්, මුල්ලිවයික්කාල් වෙරළ තීරයට පැමිණි සියයකට අධික සරණාගතයන් පිරිසක් එම යාත්‍රාවෙන්ම ත්‍රිකුණාමලය වරාය දක්වා රැගෙන යාමය ශ්‍රී ලංකා නාවික හමුදාව කටයුතු කර තිබේ.
මුලතිව් මුහුදු තීරයේ අතරමංව හාමතේ සිටි දරු දැරියන් 35කට ආසන්න පිරිසක් සහ ගැබිණි මාතාවක් ඇතුළු සියයකට වැඩි රොහින්ග්‍යා සරණගතයන් පිරිසකට කෑම බීම ලබා දී දිවි ගලවාගෙන ගොඩබිමට ගෙන ඒමට දෙසැම්බර් 19 වැනිදා උදෑසන කටයුතු කර තිබුනේ ප්‍රදේශයේ යුද පීඩිත දෙමළ ධීවර පිරිසක් විසිනි.
පෙරවරු 10 ට පමණ මුල්ලිවයික්කාල් බටහිර වෙරළ තීරයට ලඟා වු ඔවුන් නාවික හමුදාව විසින් ත්‍රිකුණාමලය වරය වෙත රැගෙන යෑමේ කටයුතු පස්වරු පහට පමණ ආරම්භ කළ බවයි පළාත් බද වාර්තාකරුවන් පවසන්නේ.
සරණාගතයන් පිරිසට මානුෂීය ආධාර සැපයීමට මුල පිරූ ධීවර සංගම් නායකයකු ප්‍රදේශයේ මාධ්‍යවේදීන් හා කියා තිබුනේ අතරමං පිරිස සම්බන්ධයෙන් දැනගත් වහාම අදාල බලධාරීන් දැනුවත් කිරීමට කටයුතු කළ බවයි.
“අපේ අය මුහුදේ රස්සාව කරනකොට මේ බෝට්ටුව දැකලා ලඟට ගිහිල්ලා බලලා තියනවා. ඒ වෙලාවේ බෝට්ටුවේ අය හාමතේ ඉන්නවා කියලා දැන ගත්තා. ඊට පස්සේ ධීවරයන් අපේ සංගමයට දැනුම් දුන්නා. පස්සේ අපි පුළුවන් විදිහට ධිවර දෙපාර්තමේන්තුව, පොලිස්, ග්‍රාම සේවක, පාර්ලිමේන්තු මන්ත්‍රීවරුන් සියළු දෙනාටම දැනුම් දුන්නා. අපි වතුර කෑම, වගේ දේවල් ගිහින් දුන්නා,” යි වන මුල්ලිවයික්කාල් ධීවර සමිතියේ සභාපති ආරුමුගම් ශිවනේශ්වරම් පවසා තිබුණි.
දෙපිරිසට එකිනෙකාගේ භාෂාව වටහාගැනීමේ අපහසුව නිසා වැඩිදුර විස්තර දැනගැනීමට හැකිවී නැත. දරුවන් සැමදෙනාම පාහේ වයස අවුරුදු 5ට අඩු යැයි ධීවරයන් සමග යාත්‍රාවට ගිය වෛද්‍යවරයකු පවසා තිබේ.
යුද, නාවික පොලිස් ඇතුළු ආරක්ෂක අංශ නිලධාරීන් පෙරවරු වන විට වෙරළ තීරයට පැමිණ සිටි නමුත් සරණාගතයන් වෙත ආහාර ද්‍රව්‍ය රැගෙනයාමට මුලින්ම කටයුතු කර තිබුනේ ප්‍රදේශයේ දෙමළ ධීවරයන් බවයි පළාත් බද වාර්තාකරුවන් පවසන්නේ.
සරණාගතයන් සදහා යුද හමුදාව විසින් සපයා දුන් දිවා ආහාරය නාවික හමුදාව විසින් සරණාගතයන්ගේ බහු දින යාත්‍රාව වෙත රැගෙන ගියේද ප්‍රදේශයේ දෙමළ ධීවරයන්ගේ බෝට්ටු මගින් බව වීඩියෝ දර්ශනවලින් දැකගත හැකිය.
දෙමළ ජනයාගේ පාරම්පරික භුමි සිය ගණනක් බලහත්කාරයෙන් වාඩි ලා යුද පීඩිත මුලතිව් දිස්ත්‍රික්කයේ කදවුරු බැඳ සිටින නාවික හමුදා සරණගතයන්ට සහන සැපයීම පිනිස එකදු බෝට්ටුවක් හෝ රැගෙන නොපැමිණිම සම්බන්ධයෙන් පළාත් බද ජනතාව චෝදනා කළ බවයි පළාත් බද වාර්තාකරුවන් වැඩි දුරටත් පවසන්නේ.
නාවික හමුදා මාධ්‍ය ප්‍රකාශක කපිතාන් ගයාන් වික්‍රමසුරිය දෙසැම්බර් 19 වැනිදා දිවා කාලයේ මාධ්‍යවේදීන් වෙත පවසා තිබුනේ මුලතිව් වෙරළ තීරයට පැමිණ ඇති යාත්‍රාව සම්බන්ධයෙන් තොරතුරු රැස් කරමින් සිටින බවයි.
මියන්මාරයේ හමුදා පාලනය විසින් රකයින් ප්‍රාන්තයේ ඉස්ලාම් භක්තික රොහින්ග්‍යාවරුන්ට එරෙහි ප්‍රහාර තීව්‍ර කළ 2017 සිට මේ දක්වා රටින් පලාගිය පිරිස දසලක්ෂයකට අධික බව එක්සත් ජාතීන්ගේ සංවිධානය විසින් ගණන් බලා තිබේ. මෙයින් 965,000 කට අධික ජනකාය කඳවුරුගතව සිටින්නේ යාබද බංග්ලාදේශයේය.
Facebook Comments
