මුලතිව් මුහුදින් ලංකාවට ආ රොහින්ග්‍යා යුද අනාථයන් ත්‍රිකුණාමලයෙන් මිරිහානට

අබලන් ධීවර යාත්‍රාවකින් මුලතිව්, මුල්ලිවයික්කාල් වෙරළ තීරයට පැමිණිමෙන් පසු ත්‍රිකුණාමලය වෙත රැගෙන යනු ලැබූ සියයකට අධික යුද අනාථයන් පිරිසක් අධිකරණය විසින් මිරිහාන රැදවුම් කදවුර වෙත යොමු කර තිබේ.

දෙසතියකට වැඩි කලක් යාත්‍රා කොට දෙසැම්බර් 19 වැනි බ්‍රහස්පතින්දා පෙරවරුවේ මුලතිව් මුහුදු තීරයට ලඟා වී සිටි යුද පීඩිත රොහින්ග්‍යාවරුන් ගලවාගෙන තිබුනේ යුද්ධයෙන් තිස් අවුරුද්දක් බැට කා සිටි ප්‍රදේශයේ දෙමළ ධීවරයන් විසිනි. එදිනම හවස් යාමයේ ඔවුන් පැමිණි යාත්‍රාවෙන්ම ත්‍රිකුණාමලය වරායට මාරුකර යැවීමට ශ්‍රී ලංකා නාවික හමුදාව කටයුතු කර තිබුනි.

ත්‍රිකුණාමලය වරායට දෙසැම්බර් 20 වැනිදා උදාසන ළඟාවූ ගර්භනී කාන්තාවක් හා දරුවන් ඇතුළු එකසිය පහලොස් දෙනකුගෙන් සමන්විත පිරිසගේ සෞඛ්‍ය තත්වය පරීක්ෂා කිරීමෙන් පසු ඔවුන් දිස්ත්‍රික් ලේකම්වරයා වෙත බාර දී තිබුනි.

ආණ්ඩුව එදිනම ප්‍රකාශ කර තිබුනේ ඒ සියලු දෙනාට අවශ්‍ය පහසුකම් සම්පාදනය කොට ඇති බවයි.

“ජාත්‍යන්තර ප්‍රඥප්ති අනුව අපි ඔවුන්ට සලකනවා. බෙහෙත් ආහාර ඇතුළු සියලු පහසුකම් අපි ඔවුන්ට ලබාදෙනවා,” යි විදේශ කටයුතු, විදේශ රැකියා සහ සංචාරක අමාත්‍ය විජිත හේරත් දෙසැම්බර් 20 වැනිදා කොළඹ දී මාධ්‍යවේදීන් හමුවේ කියා සිටියේය.
කෙසේවෙතත්, ත්‍රිකුණාමල වරායේ අශ්රොෆ් ජැටියේ කූඩාරමක රඳවා සිටි රොහින්ග්‍යා සරණගතයන් පිරිසට දිවා ආහාරය ලබා දීමට කටයුතු කර තිබුනේ නැගෙනහිර මුලස්ථාන කොටගත් අහම් (AHAM) මානුෂීය සම්පත් මධ්‍යස්ථානය විසිනි.

බ්‍රහස්පතින්දා මුලතිව් මුහුදු තීරයේ හමුවී සිකුරාදා පෙරවරුවේ ත්‍රිකුණාමල වරායට ගෙන එනු ලැබූ මියන්මාරයේ නිරන්තර මර්දනයෙන් පලා යන රොහින්ග්‍යා පිරිස ඒ වන විට රඳවා සිටින කූඩාරමට සිකුරාදා හවස පැමිණි ත්‍රිකුණාමලය මහේස්ත්‍රාත් අර්ජුන් අරියරත්නම් ඔවුන් පිළිබඳ කරුණු විමසා පැමිණි ධීවර යාත්‍රාවද පරීක්ෂා කර තිබුනි.

එකසිය පහලොස් දෙනෙකුගෙන් සමන්විත එම පිරිස පස්වරුවේ බස් රථ දෙකක නංවා ත්‍රිකුණාමලය මහේස්ත්‍රාත් අධිකරණය වෙත ඉදිරිපත් කිරීමෙන් පසු මහේස්ත්‍රාත් අර්ජුන් අරියරත්නම් නියෝග කර ඇත්තේ එම පිරිස මිරිහාන රැදවුම් කදවුර වෙත සෙනසුරාදා (21) රැගෙන යන ලෙසයි.

යාත්‍රාව පදවාගෙන පැමිණි බවට සැකකෙරෙන එකොලොස් දෙනකු රක්ෂිත බන්ධනාගාරගත කිරීමටත් මහේස්ත්‍රාත් වරයා නියම කොට තිබේ.

සිකුරාදා රාත්‍රියේ ඔවුන් ත්‍රිකුණාමලය ජමාලියා මුස්ලිම් මහා විදුහලේ රදවා තැබීමට නියමිතය.

රොහින්ග්‍යා යුද අනාථයෙක් දෙසැම්බර් 20 වැනිදා ත්‍රිකුණාමල වරායේ දී හින්දී භාෂාවෙන් පළාත් බද මාධ්‍යවේදීන්ට කියා තිබුනේ ජීවිත ආරක්ෂාව පවා බුරුමයේ සිට පැමිණි බවයි.

“අපි මෙහෙ ආවේ බුරුමේ ඉන්දැද්දී හුඟක් කල් ගොඩක් ප්‍රශ්නවලට මුණ දෙන්න සිද්දවෙච්චි හින්දයි. රඛයින් ප්‍රාන්තයේ සටන් ඇවිලිලා තියෙනවා. නිතරම බෝම්බ ගහනවා. මේ හින්දා හැමෝම හරි බයෙන් ඉන්නේ. අපි හරිම අසහනයෙන් ඉන්නේ. මිනිස්සු මැරි, මැරී යනවා. තත්වේ එන්න එන්නම දරුණු වෙන හින්දා අපිට එහෙ ජීවත්වෙන්න බැරි තත්වයක් උදා උනා. ඒ පාර අපි සල්ලි එකතු කරලා මේ බෝට්ටුව අරගෙන රට දාලා ආවා. අපිට පිළිගැනීමක් නැති හින්දා ගුටි බැටවලට මුණ දීලා දවසින් දවස මැරිලා යනවා.”
ත්‍රිකුණාමලය අප වාර්තාකරු පවසන්නේ දෙසැම්බර් 4 වැනිදා 120 කින් සමන්විත කණ්ඩායමක් ධීවර යාත්‍රා 3 කින් බුරුමයේ රඛයින් ප්‍රාන්තයෙන් පිටත්ව ඇති අතර අතරමගදි ඔවුන්ගේ යාත්‍රා දෙකක් අක්‍රිය වීම නිසා සියළු දෙනා එක් බහු දින ධීවර යාත්‍රාවකට ගොඩවී තිබේ.

ගමන අතරතුරදී පවුල් දෙකකට අයත් පුද්ගලයන් පස් දෙනකු ජීවිතයෙන් සමුගෙන ඇති අතර ඔවුන් මුහුදට දමන්නට සිදුවූ බව යුද අනාථයන් පවසා තිබේ.

මෙම සරණාගතයන් 115 දෙනා අතර පිරිමි 39 ක්, ගර්භණි කාන්තාවක් ඇතුළුව කාන්තාවන් 27 ක් සහ ළමයින් 49 ක් වන බවයි ත්‍රිකුණාමලයේ වාර්තාකරුවන් වැඩි දුරටත් පවසන්නේ.

මියන්මාරයේ හමුදා පාලනය විසින් රකයින් ප්‍රාන්තයේ ඉස්ලාම් භක්තික රොහින්ග්‍යාවරුන්ට එරෙහි ප්‍රහාර තීව්‍ර කළ 2017 සිට මේ දක්වා රටින් පලාගිය පිරිස දසලක්ෂයකට අධික බව එක්සත් ජාතීන්ගේ සංවිධානය විසින් ගණන් බලා තිබේ. මෙයින් 965,000 කට අධික ජනකාය කඳවුරුගතව සිටින්නේ යාබද බංග්ලාදේශයේය.