ජිනීවා සත්‍ය මංගල රටට හෙළි කරයි

0

ශ්‍රී ලංකාව සාමය හා සංහිඳියාව ළඟාකර ගැනීමට ගන්නා ක්‍රියාමාර්ගයන්ට විරුද්ධවන පිරිසක් සිටින බව සංහිඳියාව වෙනුවෙන් පෙනී සිටින ආණ්ඩුවේ ප්‍රබල අමාත්‍යවරයෙකු චෝදනා කර තිබේ.

බලය ලබාගැනීම සඳහා වෛරය හා භීතිය වැපිරීම ඔවුන්ගේ අරමුණ බව මුදල් අමාත්‍ය මංගල සමරවීර එක්සත් ජාතීන්ගේ මානව හිමිකම් කවුන්සිල යෝජනාවලිය පිළිබඳ “යෝජනාවලිය පිළිබඳ සත්‍ය” යන තේමාවෙන් නිවේදනය නිකුත් කරමින් කියා සිටී.

මානව හිමිකම් යෝජනාවලියේ කාලය දීර්ඝ කිරීමේ යෝජනාවක් පිළිබඳ තීරණය පෙබරවාරි මාසයේ දී ගනු ලැබු බව පෙන්වා දෙන ඇමැතිවරයා එසේ සිදු කරනු ලැබුවේ ජනාධිපතිවරයා හා අග්‍රාමාත්‍යවරයා සමඟ සාකච්ජා කිරීමෙන් අනතුරුව බවයි පෙන්වා දෙන්නේ.

එම තීරණය සංහිඳියා යාන්ත්‍රණය සම්බන්ධීකරණ මහලේකම් කාර්යාලයේ මහලේකම් මනෝ තිත්තවැල්ල හරහා ජිනිවාහි ශ්‍රී ලංකා නිත්‍ය නියෝජිත ඒ.එල්.ඒ.අසීස් වෙත දැනුම් දුන් බවයි අමාත්‍යවරයා පවසන්නේ.

ඒ පිළිබඳව විදේශ කටයුතු අමාත්‍ය තිලක් මාරපන පූර්ණ දැනුවත් භාවයෙන් පසුවූ බව පවසන මුදල් අමාත්‍යවරයා එක්සත් ජාතීන්ගේ මානව හිමිකම් කවුන්සිල යෝජනාවලිය පිලිබඳ අසත්‍යයෙන් ඔබ්බට ගොස් නිවැරදි කරුණු දැකීමට ශ්‍රී ලාංකිකයන්ට හැකි බවට විශ්වාස පළ කර තිබේ.

ශ්‍රී ලංකාව අන්තර්ජාතික ප්‍රජාවගෙන් කොන්වීමට ගිය ගමන 2015 වසරේදී අවසන් කළ බවට සිහිපත් කර දෙන එවක විදේශ අමාත්‍ය ධුරය දැරූ මංගල සමරවීර වගවීම හා සංහිඳියා න්‍යාය පත්‍රය අතටගත් වත්මන් රජය ශ්‍රී ලංකාව ස්වෛරී රාජ්‍යයක් ලෙස ලෝකය හමුවේ ඔසවා තැබු බව සිය නිවේදනයෙන් අවධාරණය කර ඇත.

අවසානයේ දී ජයග්‍රහණය කරනු ලබන්නේ බොරුව හා අතිශෝක්තිය නොවන බවට විශ්වාසය පළ කරන මුදල් අමාත්‍ය මංගල සමරවීර යළි රට තුළ යුද්ධයක් ඇතිවීමට කිසිදු අවස්ථාවක ඉඩ නොතබා ශ්‍රී ලංකාව සංවර්ධිත රටක් බවට පත්කිරීම වත්මන් රජයේ උත්සාහය බව ද වැඩි දුරටත් නිවේදනය කර සිටී.

Facebook Comments

wedding people