සජිත් සමඟ එක්ව රුහුණ සංවර්ධනය කරන බවට රනිල්ගෙන් සහතිකයක්

0

නිවාස හා ඉදිකිරීම් ඇමැති සජිත් ප්‍රේමදාස සමඟ එක්වී රුහුණ ආර්ථික මෙන්ම ජාත්‍යන්තර වෙ‌ළඳාමේ කේන්ද්‍රස්ථානය බවට පත්කරන බව අගමැතිවරයා සහතික වී තිබේ.

රුහුණ පිළිබඳව කතාකරන්න බොහෝ රුහුණු පුත්‍රයන් සිටියද රුහුණ සංවර්ධනය කිරීමට කිසිදු පුද්ගලයකු ඉදිරිපත් නොවුන බවට 30 සෙනසුරාදා හම්බන්තොට යොවුන්පුරය භූමියට යාබද භූමියේ රුපියල් ලක්ෂ 3500ක වියදමින් ඉදිකිරීමට යෝජිත අංගසම්පූර්ණ දිස්ත්‍රික් ක්‍රීඩා සංකීර්ණයට මුල්ගල තැබීමේ අවස්ථාවට එක්වෙමින් අගමැති රනිල් වික්‍රමසිංහ කියා සිටියේය.

“හම්බන්තොට ජාත්‍යන්තරය වෙළඳ මධ්‍යස්ථානයක් බවට පත්වෙනවා. රුහුණ ශ්‍රී ලංකාවේ ආර්ථික කේන්ද්‍රස්ථානය බවට පත්වෙනවා. මම හිතන්නේ රජරට යුගයෙන් පසු එවැනි දියුණුවක් දකුණු පළාතේ ඇතිවී නෑ.”

“රුහුණ ගැන කතාකරන්න බොහෝ රුහුණු පුත්‍රයන් ඉන්නවා නමුත් රුහුණ සංවර්ධනය කරන්න කවුරුත් නෑ. ඒක තමයි අපේ සජිත් ප්‍රේමදාස මහතා වැනි ඇමැතිවරුන් මෙම වගකීම් භාරගෙන තිබෙන්නේ. මෙම සංවර්ධන වැඩසටහන් ක්‍රියාත්මක කරන ගමන් යොවුන්පුරයත් පවත්වන්න.” යැයි අගමැතිවරයා සඳහන් කළේය.

රජයේ ප්‍රතිපත්තිය ගමට ගොස් ගම දියුණු කිරීම බව කී අගමැතිවරයා පළාත් සභා සහ පළාත් පාලන ආයතන විපක්ෂයෙන් පාලනය කලද රටේ කිසිදු පළාත් පාලන ආයතනයකට මුදල් වෙන් නොකර නොමැති බව ද පැවසීය.

විපක්ෂය විසින් පළාත් සභා සහ පළාත් පාලන ආයතන වැය ශීර්ෂය පරාජයට පත් කිරීම හමුවේ අප්‍රේල් මාසයේ 30 වැනිදා සිට සෑම ප්‍රාදේශීය සභාවකටම මුදල් නොමැති තත්ත්වයකට පත් වන බව අගමැති රනිල් වික්‍රමසිංහ වැඩි දුරටත් පෙන්වා දුන්නේය.

Facebook Comments

wedding people