යුද නිමාවෙන් පසු මේ දක්වා කිසිදු රජයක් විසින් ප්‍රතිසංස්කරණය නොකළ ප්‍රධාන මාර්ගයක් නිසා පීඩාවට පත් ප්‍රදේශවාසී දෙමළ ජනයා කඩිනමින් එම පාර අලුත් වැඩියා කර දෙන ලෙස බලකරමින් විරෝධතාවක් පවත්වා තිබේ.
දෙසැම්බර් 22 වැනි ඉරිදා වැල්වැටිතුරෙයි නගර සභාව ඉදිරිපිටදී දියත් කළ සංකේතාත්මක උපවාසයට එක්ව සිටි ප්‍රදේශවාසීන් චෝදනා කළේ වැල්වැටිතුරෙයි එල්.ටී.ටී.ඊ සංවිධානයේ නායකයාගේ උපන් භුමිය වන බැවින් එම ප්‍රදේශයේ මාර්ගය පිලිසකර කිරීමට කිසිදු රජයක් කටයුතු නොකළ බවයි.
වැල්වැටිතුරෙයි නගර සභාවේ හිටපු සභාපති රාමචන්ද්‍රන් සුරේන් එහිදී මාධ්‍යවේදීන් වෙත පවසා තිබුනේ මෙම පාර අලුත් වැඩියා කිරීම පැවැති සියළු ආණ්ඩු විසින් සැලසුම් සහගතව කල් දැමු බවයි.
“පහුගිය ආණ්ඩු ඊලඟ අවුරුද්දේ, ඊලඟ අවුරුද්දේ, කියලා දිගටම සැලසුම් කරලා වැඩ කරපු නිසා තමයි මේ පාර මෙහෙම තියෙන්නේ. මේක නායකයා ඉපදිච්ච භුමිය කියන කාරානාව මත තමයි, මේ පාර ප්‍රතිසංස්කරණය කරලා නැත්තේ. මම හිතන්නේ ප්‍රතිසංස්කරණය නොකළ AB ශ්‍රේණියේ පාරකට ලංකාවේ තියෙන්නේ මේ පාර විතරයි කියලා.”
යුද නිමාවෙන් පසුව පොන්නාලේ සිට පේදුරුතුඩුවට යන මාර්ගය අලුත් වැඩියා කිරීමක් සිදු කර නොමැති බව පවසන යුද වින්දිත දෙමළ ජනයා බලධාරීන්ගෙන් ඉල්ලා සිටින්නේ අඩුම වශයෙන් තොන්ඩමනාරු සිට පේදුරුතුඩුව දක්වා වන කිලෝ මිටර් 12 ක ප්‍රමාණයවත් කඩිනමින් පිළිසකර කර දෙන ලෙසයි.
දසක තුනක් පුරා උතුරේ දියත් කළ යුද්ධය අවසන් විමෙන් පසු පැවැති රජයන් විසින් උතුරේ මාර්ග වලින් 90% ක් පමණ ප්‍රමාණයක් අලුත් වැඩියා කර ඇති බව පවසන ප්‍රදේශවාසීන් තව දුරටත් අවධාරණය කරන්නේ මෙම මාර්ගය අලුත් වැඩියා නොකිරීම නිසා ඇතැම් රෝගීන් නිසි කලට රෝහල්ගත කිරීමට නොහැකි විමෙන් මහ මගදී මරණයට පත්ව ඇති බවයි.
“අපේ පාර අපිට, නායකයා ඉපදිච්ච ගම නිසා ජාතිවාදී රජයෙන් ප්‍රතික්ෂේප කළා ද?, අලුත් රජයේ අපේ පාර හදලා දියව්, හදිසි ප්‍රතිකාර සදහා යනකොටම මැරිලා ඉවරයි,” ආදී විරෝධතා පුවරු ප්‍රදර්ශනය කරමින් උපවාසයට එක්ව සිටි දෙමළ ජනයා වැල්වැටිතුරෙයි නගර සභාව ඇතුළු වගකිව යුතු දෙපාර්තමේන්තු වෙත බාර දීම සදහා සිය ඉල්ලීම ඇතුලත් සංදේශයකට අත්සන් ලබා ගැනීමත් මෙහිදී සිදු කළ බව පළාත් බද වාර්තාකරුවෝ වැඩි දුරටත් පවසති.
Facebook Comments
