ශ්‍රී ලංකාවේ ජනාධිපතිවරයාගේ පළමු ඉන්දීය නිල සංචාරය අතරතුරදී දෙරටේ ධීවර ප්‍රශ්නය සම්බන්ධයෙන් සිදු කළ සාකච්ඡා හා එළඹි තීරණ පිළිබදව රටට පැහැදිලි තොරතුරක් ලබා නොදීම නිසා, සිය ජීවිකාවට ඇති තර්ජනය එලෙසම පවතිනු ඇතැයි උතුරේ ධීවරයෝ කණස්සල්ලට පත්ව සිටිති.
එමනිසා, සාමකාමී විසඳීමක් ලබා ගැනීම සඳහා තමිල්නාඩු මහඇමැති හා එක්ව කටයුතු කිරීමට පියවර ගන්නා ලෙස ධීවර නායකයෝ උතුරේ දෙමළ මහජන නියෝජිතයන්ට බලකර සිටිති.
උතුරු පළාතේ ධීවරයන් මුහුණ දෙන ගැටළු සම්බන්ධයෙන් යාපනය, කිලිනොච්චි, මුලතිව් හා මන්නාරම යන දිස්ත්‍රික්කයන්හි ධීවර සංගම් නියෝජිතයන් උතුරු පළාත් ආණ්ඩුකාරවරයා සමග දෙසැම්බර් 23 වැනි ඉරිදා පැවැති සාකච්ඡාවකින් අනතුරුව වඩමාරච්ච් උතුර ධීවර සමුපකාර සමිතියේ හිටපු නායක එන්. වර්ණකුලසිංහම් මාධ්‍යවෙත කියා සිටියේ ඉන්දිය ධීවරයන් තව දුරටත් මෙරට මුහුදු සීමාවට ඇතුල් වී මසුන් මරනු ඇතැයි උතුරේ ධීවරයන් කණස්සල්ලෙන් පසුවන බවයි.
“මානුෂීය පදනමින් මෙම කාරණය පාලනය කරන්න ඕන වගේ මතයක් පල කරලා එයා ඇවිල්ලා තියනවා. නමුත් මෙහෙට ඇවිල්ලා එහෙ කතා කරපු දේ, ඒ සාකච්ඡාවේ වෙච්ච දේ ගැන කිසිම නිවේදනයක්, හෙලි දරව් කරලා නැහැ. ඒ නිසා අපි මොනවද හිතන්නේ කිව්වොත් , මානුෂීය හේතුන් කියලා කියන්නේ ඔවුන් නැවත අපේ මුහුදට එයිද කියන කනස්සල්ල අපිට ඇති වෙනවා. අපි මේ ගැන ආණ්ඩුකාරතුමාට කියලා තියෙනවා. මේ සම්බන්ධයෙන් අමාත්‍යවරයා සමඟ කතා කරනවා කියලා ඔහු කිව්වා.”
ඉන්දීය අගමැතිවරයා සහ ශ්‍රී ලංකා ජනාධිපතිවරයා අතර පසුගිය සතියේ නව දිල්ලියේදී පැවැත්වුණු සාකච්ඡාව අතරතුරදී දෙරට නායකයන් සඳහන් කර තිබුනේ ධීවරයන්ගේ ගැටලුව වැදගත් බවයි.
“ධීවරයන්ගේ ගැටලුව මානුෂීය ආකාරයකින් විසඳිය යුතු බව අපි සාකච්ඡා කළා,” යැයි ඉන්දීය අගමැතිවරයා පැවසා තිබුනේ ශ්‍රී ලංකා ජනාධිපතිවරයා සමග පැවැත්වූ මාධ්‍ය හමුවකදීය.
එක්ස් සමාජ මාධ්‍ය ජාලයේ පෝස්ටුවක් පළ කරමින් ශ්‍රී ලංකා ජනාධිපතිවරයා නිවේදනය කර තිබුනේ ඔවුන්ගේ සාකච්ඡාව අතරතුරදී ‘නීති විරෝධී මසුන් ඇල්ලීම නැවැත්වීම’ පිළිබඳවද සාකච්ඡා වූ බවයි.
නීති විරෝධී මසුන් ඇල්ලීමේ ක්‍රම හේතුවෙන් පෝක් සමුද්‍ර සන්ධිය කලාපයට සිදුව ඇති පාරිසරික හානිය පිළිබඳව ඉන්දියානු අගමැතිවරයා සමග කළ සාකච්ඡාවේදී ඔහු සිය කනස්සල්ලද පළ කර තිබුනි.
“ධීවර කටයුතු පිලිබඳ හයවැනි ඒකාබද්ධ ක්‍රියාකාරී කණ්ඩායම විසින් මෑතකදී නිකුත් කළ නිගමනය පිළිගනිමින්, තිරසාර විසඳුමක් වෙනුවෙන් ධීවරයන්ගේ ගැටලුව විසඳීම සඳහා සහයෝගයෙන් කටයුතු කරන ප්‍රවේශයක ඇති අවශ්‍යතාව ද අපි සාකච්ඡා කළෙමු. රටවල් දෙකේම තහනම් කර ඇති මසුන් ඇල්ලීමේ ක්‍රමයක් වන බොටම් ට්‍රෝලිං ක්‍රමය හේතුවෙන් ඇති වී ඇති නැවත පිළිසකර කළ නොහැකි පාරිසරික හානිය හඳුනාගනිමින්, මෙම ක්‍රමය භාවිතය නතර කිරීමටත්, නීති විරෝධී, වාර්තා නොවන සහ නියාමනය නොකළ මසුන් ඇල්ලීම වැළක්වීමටත් පියවර ගන්නා ලෙසත් මම ඉල්ලා සිටිමි.”
ජනාධිපතිවරයාගේ ඉන්දියානු සංචාරය පිළිබඳ දැනුම්වත් කිරීම සඳහා රජයේ ප්‍රවෘත්ති දෙපාර්තමෙන්තුවේ දෙසැම්බර් 20 වැනිදා පෙරවරුවේ පැවති විශේෂ ප්‍රවෘත්ති සාකච්ඡාකදී විදේශ කටයුතු අමාත්‍ය විජිත හේරත් සදහන් කර තිබුනේ දකුණු ඉන්දියානු ධීවරයන් මෙරට මුහුදු සීමාවේ සිදුකරන අනවසර ධීවර කටයුතු සම්බන්ධයෙන්ද මෙම සංචාරයේදී විශේෂයෙන් සාකච්ඡා වු බවයි.
දීර්ඝ කාලයක් තිස්සේ මුහුණදෙන මෙම ගැටලුව සඳහා ස්ථිරසාර විසඳුමක් ලබා දීමට කඩිනමින් මැදිහත් වීමට දෙපාර්ශවයම එකඟ වී ඇති බව ඔහු තව දුරටත් පවසා තිබුනි.
උතුරු පළාත් ආණ්ඩුකාර නාගලිංගම් වේදනායගම් සමග පැවැති සාකච්ඡාවට එක්ව සිටි උතුරේ එක්සත් ධීවර සංගම් එකතුවේ ප්‍රකාශක අන්නලිංගම් අන්නරාසා එම සාකච්ඡා හමාර වීමෙන් පසු පළාත් බද මාධ්‍යවේදීන් හමුවේ දෙමළ ජනතා නියෝජිතයන්ගෙන් ඉල්ලා තිබුනේ ධීවර ප්‍රශ්නය සාමකාමීව විසදාගැනීමට ධීවර ප්‍රජාව සුදානම් බව තමිල්නාඩු මහ ඇමැතිවරයාට ලිඛිතව දැනුම් දෙන ලෙසයි.
“අපිව නියෝජනය කරන, උතුරු පළාත නියෝජනය කරන දිස්ත්‍රික් හතරේම පාර්ලිමේන්තු මන්ත්‍රීලාගෙන් අපි ඉල්ලීම් කරන්නේ මේ ධීවර ප්‍රශ්නය සාමකාමීව සහ එකමුතුව විසදීමට ධීවර ප්‍රජාව සුදානම් බව, පාර්ලිමේන්තු මන්ත්‍රී ශ්‍රීධරන් වේවා, ගජේන්ද්‍රකුමාර් පොන්නම්බලම් වේවා, රවිකරන් වේවා, සෙල්වම් වේවා ඔයාලාගේ ලිපි ශිර්ෂයෙන් ලිඛිතව තමිල්නාඩු මහ ඇමතිට ලියන්න.”
ඉන්දීය ධීවර යන්ගෙන් මෙරට ධීවර පවුල් පනස් දාහකගේ ජීවිකාවට සිදු වන බලපෑම නතර කිරිම සදහා මැදිහත් වන ලෙස ඔහු වැඩි දුරටත් උතුරේ දෙමළ ජනතා නියෝජිතයන්ගෙන් ඉල්ලා තිබුනි.
“උතුරු පළාත නියෝජනය කරන, දිස්ත්‍රික් හතර නියෝජනය කරන පවුල් 50000 ක් සහ මිනිස්සු දෙලක්ෂයක් වෙනුවෙන් මේ දෙමළ ජාතික මට්ටමේ කටයුතු කරන පක්ෂ හා නායකයන් අපි ඉල්ලා සිටිනවා මේ ප්‍රශ්නයට විසඳුමක් ඇති කරන්න කියලා. ”
පළාත් බද වාර්තාකරුවන් පවසන්නේ උතුරු පළාතේ ධීවර සංගම් නියෝජිතයන් ආණ්ඩුකාරවරයා සමග පැවැත්වු සාකච්ඡාව සදහා ජාතික ජලජ සම්පත් පර්යේෂණ හා සංවර්ධන නියෝජිතායනතනය (නාරා) , ධීවර හා ජලජ සම්පත් දෙපාර්තමේන්තුව, ඉඩම් කොමසාරිස් කාර්යාලය, යන ආයතන වල නියෝජිතයන්ද එක්ව සිටි බවයි.
Facebook Comments
