දිගින් දිගටම ත්‍රස්ත මර්දන හා විමර්ශන කොට්ඨාශය වෙත කැදවා ප්‍රශ්න කළත් දෙමළ ජනයාගේ අයිතීන් දිනා ගැනීම වෙනුවෙන් සිදු කරන අරගලය අත් හැරීමට සුදානම් නොමැති බව උතුරේ දේශපාලන ක්‍රියාධරයෙක් අවධාරණය කර තිබේ.
සමාජ මාධ්‍ය ඔස්සේ පනිවිඩයක් තබමින් කරච්චි ප්‍රාදේශිය සභාවේ හිටපු සභාපති අරුනාචලම් වේලමාලිගිදන් ඒ බව සදහන් කර ඇත්තේ දෙසැම්බර් 28 වැනිදා යළිත් වරක් ත්‍රස්ත මර්දන හා විමර්ශන කොට්ඨාශය (CTID) ට කැදවා තිබීම සම්බන්ධයෙන් දැනුම් දෙමිනි.
පැවැති රජයන් යටතේ ක්‍රියාත්මක වු මර්දනය නව රජය යටතේත් බලාපොරොත්තු නොවු බවයි එම පනිවිඩය මගින් ඔහු සදහන් කර ඇත්තේ.
“2013 වසරේ ත්‍රස්තවාදය වැළැක්වීමේ පනත මගින් අත්අඩංගුවට ගෙන මාස 13ක් සිරගත කිරීමෙන් පසු සෑම රජයක් යටතේම සෑම වසරකම කිහිප වතාවක්ම ත්‍රස්තවාදය වැළැක්වීමේ පනත යටතේ ප්‍රශ්න කිරීම සඳහා මා කැඳවා තිබෙනවා. පහුගිය පාලන වෙනසෙන් පස්සේ සාමකාමීව ජීවත් වෙන්න පුළුවන් තත්වයක් ඇති වෙයි කියලා මම බලාපොරොත්තු වුණා. කොහොම උනත් ලබන 28 වැනිදා ත්‍රස්ත මර්දන ඒකකයේ පරීක්ෂණවලට එන්න කියලා නියෝගයක් ලැබිලා තියෙනවා. අපේ ජනතාව වෙනුවෙන් කරන දේශපාලන ගමනේ කුරුසිය දරාගන්න අපි සූදානම්.”
ත්‍රස්ත මර්දන හා විමර්ශන කොට්ඨාශය (CTID) යේ කිලිනොච්චි ඒකකයට දෙසැම්බර් 28 වැනිදා උදෑසන 9 ට පැමිණෙන ලෙස කිලිනොච්චි ඒකකයේ ස්ථානාධිපතිවරයාගේ අත්සනින් අරුනාචලම් වේලමාලිගිදන්ට නිකුත් කර තිබෙන පොලිස් 256 පනිවිඩ පෝරමයේ එම කැදවීමට හේතුවක් දක්වා නොමැත.
අරුනාචලම් වේලමාලිගිදන් පවසන්නේ පාර්ලිමේන්තු මන්ත්‍රී ශිවඥානම් ශ්‍රී ධරන්ගේ කිලිනොච්චි කාර්යාලයේ පුපුරණ ද්‍රව්‍ය තිබී සොයා ගැනීමත් සමග 2013 ජනවාරි 13 වැනිදා තමන් අත්අඩංගුවට ගෙන වසරකට වැඩි කාලයක් සිර බත් කෑ බවයි.
නිදහස ලැබීමෙන් පසු, දෙමළ ජනයාගේ අයිතීන් වෙනුවෙන් පෙනී සිටීම නිසා පසුගිය සමයේ අවස්ථා ගණනාවකදීම ත්‍රස්ත මර්දන හා විමර්ශන කොට්ඨාශය හමුවේ ප්‍රකාශ ලබා දීමට සිදු වු බවයි ඔහු වැඩි දුරටත් පවසන්නේ.
Facebook Comments
