අලුත් ත්‍රස්ත නීති හඳුන්වා දෙමින් මුස්ලිම් සහ දෙමළ ජාතිකයන්ට එරෙහිව ශ්‍රී ලංකාවේ ආණ්ඩුව ගන්නා පියවර සංහිඳියාව හානිකර බවට එක්සත් ජාතීන්ගේ සංවිධානයේ බලවත් දෝෂ දර්ශනයට ලක්වී තිබේ.
අද ආරම්භ වුනු මානව හිමිකම් මණ්ඩලයේ 47 වැනි සැසිවාරය අමතමින් ශ්‍රී ලංකාව කෙරෙහි ජගත් ප්‍රජාවගේ අවධානය යොමුකර සිටි එක්සත් ජාතීන්ගේ මානව හිමිකම් ප්‍රධානී, රජය විසින් පුද්ගලයන් හා සංවිධාන සිය ගණනක් තහනම් කිරීම ගැනද විවේචනයක් ඉදිරිපත් කළාය.
“ශ්‍රී ලංකාවේ මුස්ලිම්වරුන් ඉලක්ක කරගත් බව හැඟී යන පරිදි ආණ්ඩුව විසින් ගෙන ඇති තවත් පියවර සහ යුද්ධයෙන් මළ’වුන් සැමරීමේ සන්දර්භය තුල දෙමළ ජනතාවට අඩන්තේට්ටම් කිරීම ගැන මම කනස්සල්ලට පත්ව සිටිමි,” යි මහකොමසාරිස් මිෂෙල් බැෂලේ කියා සිටියාය.
ජනාධිපති ගෝඨාභය රාජපක්ෂ විසින් පසුගිය මස අගදී අතුරුදහන් වූ තැනැත්තන් පිලිබඳ කාර්යාලයට (OMP) යුද සමයේ පොලිස්පති ජයන්ත වික්‍රමරත්න ද, හානිපුරණ කාර්යාලයට මේජර් ජෙනරාල් පාලිත ප්‍රනාන්දු ද පත් කිරීම මානව හිමිකම් ප්‍රධානීගේ නොසතුටට හේතුවී තිබුණි.
“අතුරුදහන් වූ තැනැත්තන් පිලිබඳ කාර්යාලයට සහ හානිපුරණ කාර්යාලයට මෑතදී කරන ලද පත්වීම් කෙරෙහි මගේ අවධානය යොමුවී තිබෙන අතර, අතීතයේ සිදුවූ අපරාධ සම්බන්ධ විමර්ශන අධෛර්යමත් කිරීම සඳහා ගන්නා පියවර පීඩිතයන්ගේ විශ්වාසයට තවත් අනතුරේ හෙලයි. ත්‍රස්තවාදයට සහාය පල කරන බවට චෝදනා කරමින් දෙමළ සහ මුස්ලිම් කණ්ඩායම් හා පුද්ගලයන් 300 කට වැඩි ප්‍රමාණයක් ලැයිස්තු ගත කළ සහ/ හෝ තහනම් කළ මෑත ත්‍රස්තවිරෝධී රෙගුලාසි ද සංහිඳියාව නගා සිටුවීමට උපකාරී වන්නක් නොවේ.”
සතියකට ඉහතදී යුරෝපා සංගමය විසින් සම්මත කරගන්නා යෝජනාවකින් දැනට රටේ පවත්නා ත්‍රස්ත මර්දන නීතිය අකුලා ගන්නා ලෙස ඉල්ලා සිටි අතර එසේ නොකළොත් ශ්‍රී ලංකාවට ලබාදී ඇති GSP+ වරණීය බදු සහනය ඉවත් කිරීමේ අනතුරු ඇඟවීමද කරන ලදී.
හිතුමතේ අත්අඩංගුවට ගත හැකි නීති සම්මත කරගැනීම සහ පොලිස් අත් අඩංගුවේ සිදුවන මරණ ද මහකොමසාරිස් බැෂලේ මානව හිමිකම් මණ්ඩලයේ අවධානයට යොමු කළාය.
“අන්තවාදී මතවාද දුරු කිරීමේ අරමුණ සහිතව අවුරුදු දෙකක් දක්වා කාලයක් පුද්ගලයන් අත්තනෝමතික ලෙස නඩු නැතිව රඳවා තබා ගැනීමට අවසර දෙන නීති දැන් ක්‍රියාත්මක වේ. පොලිස් අත් අඩංගුවේ දී මෙන්ම පොලිසිය සහ අපරාධ කල්ලි චුදිතයන් අතර ගැටුම් වලින් දිගටම සිදුවන මරණ මාලාව ගැනද මම සටහන් කරන්නෙමි. ඒවා සම්බන්ධයෙන් අංග සම්පූර්ණ, කඩිනම් සහ ස්වාධීන විමර්ශනයක් සිදුකළ යුතුව පවතී.”
අවුරුද්දක් තරම් කෙටි කාලයක් තුල පොලිස් අත් අඩංගුවේ සිදුවූ බවට වාර්තා වූ මරණ ගණන අඩුම වශයෙන් 11කි. එහි මෑතම ගොදුර වූ මඩකලපුවේ චන්ද්‍රන් විධුෂන් ගේ සිරුර අධිකරණ නියමයෙන් ගොඩගෙන දෙවැනි මරණ පරීක්ෂණයක් සඳහා ගෙනයන ලද්දේත් මහකොමසාරිස්වරියගේ ප්‍රකාශය කෙරුණු අද දවසේය. පොලිසිය භාරයේ සිටියදී මියගිය පිරිස සම්බන්ධ පරීක්ෂණ වාර්තාවක් පසුගිය මාසයේ අවසානයට පෙර සපයන ලෙස ශ්‍රී ලංකාවේ මානව හිමිකම් කොමිසම විසින් පොලිස්පති චන්දන වික්‍රමරත්නගෙන් ඉල්ලා තිබුනත්, අද වනතුරුත් එය දුන් බවක් දැනගන්නට නැත.
බරපතල මානව හිමිකම් උල්ලංඝන සම්බන්ධ වගඋත්තරදායකත්වයෙන් ශ්‍රී ලංකාව බැඳ තැබීම සඳහා ඉකුත් මානව හිමිකම් මණ්ඩලයේදී මහකොමසාරිස් කාර්යාලයට ලැබුණු වරම අත්කරගෙන තිබෙන ප්‍රගතිය ඉදිරි සැප්තැම්බර් සමුළුව හමුවේ ඉදිරිපත් කරන බවත් මිෂෙල් බැෂලේ දැනුම් දුන්නාය.
අවසන් යුද භූමියේ සිදුවූ බවට චෝදනා නැගෙන යුද අපරාධ සහ මානව වර්ගයාට එරෙහි අපරාධ සම්බන්ධයෙන් යුක්තිය ඉටු කිරීමට ශ්‍රී ලංකාවේ ආණ්ඩුව පියවර නොගැනීම නිසා අනාගතයේ ඒ සම්බන්ධයෙන් තොරතුරු හා සාක්ෂි රැස් කිරීම ඇතුළු කටයුතු කිරීමට එක්සත් ජාතීන්ගේ මානව හිමිකම් කොමිසම විසින් මහකොමසාරිස් කාර්යාලයට බලය පවරා තිබේ. එම තොරතුරු යොදා ගනිමින් විදේශ රටවල නඩු වැටීමේ අවදානමට ශ්‍රී ලංකාවේ හමුදා හා දේශපාලන බලධාරීන් මුහුණ පා සිටී.
Facebook Comments
