පාස්කු ඉරිදා දින කතෝලික දේවස්ථාන හා තරු පන්තියේ හෝටල් කිහිපයක් ඉලක්ක කරගෙන එල්ල කරන ලද මරාගෙන මැරෙන බෝම්බ ප්‍රහාර පිලිබඳව පරීක්ෂණ සඳහා ජාත්‍යන්තර පොලිස් සහාය හිමිව තිබේ.
ශ්‍රී ලංකාවේ ආරක්ෂක අංශ වලට සහාය වීම සඳහා පරීක්ෂණ හදිසි ප්‍රතිචාර කණ්ඩායමක් පත් කර ඇති බව ඉන්ටර්පෝල් නිවේදනය කරයි.
අපරාධ පරීක්ෂණ විශේෂඥයන්, පුපුරණ ද්‍රව්‍ය විශේෂඥයන්, ත්‍රස්ත මර්දන නිළධාරීන් සහ දත්ත විශ්ලේෂකයන් ඇතුලු නිළධාරීන්ගෙන් මෙම පිරිස සමන්විත බවයි සඳහන් වන්නේ.
අවශ්‍ය වුවහොත් ඩිජිටල් වෝහාරික විශේෂඥයන්, ජෛවමිතික විද්වතුන්, වීඩියෝ සහ ඡායාරූප විශේෂඥයන්ද ශ්‍රී ලංකාවට එවීමට සූදානම් බවයි ඉන්ටර්පෝල් ආයතනය නිවේදනයේ කරන්නේ.
ප්‍රහාරයට සම්බන්ධ පුද්ගලයන් ගැන දත්ත තමන් සතුව ඇත්දැයි සොයා බැලීමට මේ වන විටත් කටයුතු කර ඇති බව ද ජාත්‍යන්තර පොලිසිය නිකුත් කරන ලද නිවේදනයේ දැක්වේ.
ඉන්ටර්පෝල් සතුව ජාත්‍යන්තර ජාලයක් පවතින බැවින් මෙම ප්‍රහාරයේ සැකකරුවන්ට ජාත්‍යන්තර සබඳතා ඇතිදැයි සොයා විමර්ශන ක්‍රියාවට නංවන බවයි ජාත්‍යන්තර පොලිසිය වැඩි දුරටත් නිවේදනය කරන්නේ.
Facebook Comments
