සිවරාම් ඝාතනය ගැන හෝඩුවාවක්

ටැමිල් නෙට්’ වෙබ් අඩවියේ ප්‍රධාන සංස්කාරක තරාකී සිවරාම් හෙවත් ධර්මරත්නම් සිවරාම් මහතාගේ ඝාතනය සම්බන්ධයෙන් ප්‍රබල හෝඩුවාවන් අනාවරණය කර ගැනීමට අපරාධ පරීක්ෂණ දෙපාර්තමේන්තුව සමත්ව ඇති බව පොලිස් මූලස්ථාන ආරංචි මාර්ග සඳහන් කර සිටීයි.

ඒ, පසුගිය පාලන සමයේ සිදුවූ අභිරහස් ඝාතන හා අතුරුදහන් කිරීම් සම්බන්ධයෙන් සැකපිට අත්අඩංගුවට ගෙන සිටින හමුදා බුද්ධි සාමාජිකයින් ගෙන් ප්‍රශ්න කිරීමේදීය.

2005 වසරේ අප්‍රේල් මස 28 වන දින, බම්බලපිටිය පොලිස් ස්ථානය ඉදිරිපිටදී, පුද්ගලයන් 4 දෙනෙකු විසින් සිවරාම් මහතාව සුදු වෑන් රථයකින් පැහැර ගෙන යනු ලැබූ අතර ඔහුගේ ප්‍රාණය නිරුද්ධ සිරුර ඊට පසු දින පාර්ලිමේන්තුව ආසන්නයේ කිඹුලා ඇල ප්‍රදේශයේදී සොයා ගන්නා ලදී.

දේශපාලන විශ්ලේෂකයෙක් 

1959 අගෝස්තු 11වන දින මඩකලපුවේදී උපන් ධර්මරත්නම් සිවරාම්, ජනමාධ්‍යවේදියෙකු, ලේඛකයෙකු මෙන්ම ප්‍රවීන යුධපුවත් විශ්ලේෂකයෙකු සහ ප්‍රකට දේශපාලන විශ්ලේෂකයෙකු විය.

1982 ගාන්ධියන් ව්‍යාපාරයෙන් තම දේශපාලන දිවිය ආරම්භකල සිවරාම් ප්ලොට්, ඩීපීඑල්එෆ් වැනි දේශපාලන සංවිධානවල ක්‍රියාකාරිකයෙක් විය.

ජනමාධ්‍යවෙිදියෙකු ලෙස ධර්මරත්නම් සිවරාම් හෙවත් තාරකී ප්‍රධාන ධාරාවේ මෙන්ම අන්තර්ජාලය පදනම් වූ ප්‍රවෘත්ති මාධ්‍යන් හි දේශපාලන සහ දේශපාලන විශ්ලේෂකයෙකු ලෙස ක්‍රියාකාරී විය.

‘මහසෝන් කල්ලිය’ 

ධර්මරත්නම් සිවරාම් මහතාගේ ඝාතනයේ වගකීම එකල ‘මහසෝන් කල්ලිය’ නැමති සංවිධානයකින් භාර ගන්නා ලද අතර එකී මහසෝන් කල්ලිය යනු කවුරුදැයි මේ වන විට රහස් පොලිසිය අනාවරණය කර ගෙන තිබේ.

එකී අනාවරණය සඳහා උපකාරී වී ඇත්තේ ධර්මරත්නම් සිවරාම් මහතාගේ ජංගම දුරකතනයයි.

ධර්මරත්නම් සිවරාම් මහතා ඝාතනය කිරීමෙන් අනතුරුව එකී ඝාතක කණ්ඩායම ඔහු හා සම්බන්ධතා පවත්වන පුද්ගලයන් පිළිබඳව වැඩි දුරටත් දැන ගැනීම සඳහා මාසයකට ආසන්න කාලයක් ජංගම දුරකතනය ක්‍රියාත්මකව තබාගෙන ඇත.

එකී ඝාතක කල්ලිය යන එන සියලු ස්ථාන කරා මෙම ජංගම දුරකතනයද රැගෙන ගොස් ඇති අතර එම ක්‍රියාව නිසා රහස් පොලිසියට මිනීමරුවන් කවුදැයි යන්න පහසුවෙන්ම අදුනා ගැනීමට හැකිවී තිබේ.

හමුදා බුද්ධි අංශයක් 

මෙම පැහැරගෙන යාම හා ඝාතනය හමුදා බුද්ධි අංශයක මෙහෙයවීම මත සිදුවී ඇති බව මේවනවිට අනාවරණය වී ඇත.

එකී බුද්ධි අංශය මේ සඳහා උපයෝගී කරගෙන ඇත්තේ එල්.ටි.ටි.ඊ. සංවිධානයට එරෙහිව එකල ක්‍රියාත්මක සන්නද්ධ ගරිල්ලා කණ්ඩායමක සාමාජිකයන්ය.

ඔවුන් 1988 මාලදිවයින් ආණ්ඩුව පෙරලීම සඳහා මෙහෙයුමක් දියත් කළ කණ්ඩායමේ සාමාජිකයන් බව පැවසෙන අතර, එම මෙහෙයුමට සම්බන්ධව සිටි පීටර් නැමැත්තෙකු ප්‍රශ්න කිරීම සඳහා ළඟදීම අත්අඩංගුවට ගැනීමට නියමිතව ඇත.

පොලිස්පතිවරයා ගෙන් ඉල්ලීමක් 

සිවරාම්, ලසන්ත වික්‍රමතුංග සහ නිමලරාජන් මයිල්වාගනම් ඇතුළු පසුගිය යුගයේ ඝාතනයට ලක් වූ මාධ්‍යවේදීන් පිළිබඳ පරීක්ෂණවල තත්වය සම්බන්ධයෙන් තමන් දැනුවත් කරන ලෙස සහ එම පරීක්ෂණ කඩිනම් කරන ලෙසත්, ප්‍රගීත් එක්නැලිගොඩ මාධ්‍යවේදියා අතුරුදහන්වීම පිළිබඳ පරීක්ෂණවල ප්‍රගතිය කවරේද යන්නත් විමසමින් ‘මාධ්‍ය නිදහස සඳහා වූ ක්‍රියාකාරී කමිටුව’ පොලිස්පතිවරයා ගෙන් ඉල්ලීමක් කර තිබිණ.

මේ සම්බන්ධයෙන් පැමිණිලි කිරීම සඳහා මේවනවිට ජිනීවා නුවරට ගොස් සිටින ‘මාධ්‍ය නිදහස සඳහා වූ ක්‍රියාකාරී කමිටුවේ’ ජාතික සංවිධායක ෆ්‍රෙඩී ගමගේ මහතා, නව රජය බලයට පත්වීමට පෙර ප්‍රකාශ කල පරිදි මාධ්‍යවේදී සිවරාම් වැනි ඝාතනයට ලක්වූ මාධ්‍යවේදීන්ට යුක්තිය ඉටුකිරීමට අපොහොසත්වී ඇතැයි චෝදනා කරයි.

(Srilanka mirror)