විදේශ රට වලදී මියගිය හා වධහිංසාවට ලක්වුවන්ට වන්දි

විදේශ රටවල සේවයේ නියුතු ව සිටියදී මියගිය හා හිංසනයට ලක්වූ ශ්‍රී ලාංකිකයන්ගේ පවුල්වල සාමාජිකයන් සඳහා වන්දි මුදල් හා ‍හිඟ වැටුප් ලබාදීම ඊයේ (20) විදේශ කටයුතු අමාත්‍යංශයේදී සිදු කෙරුණී.

මෙහිදී අදාළ පවුල්වල සාමාජිකයන් 39 දෙනෙක් වෙනුවෙන් රුපියල් මිලියන 72ක මුදලක් විදේශ කටයුතු අමාත්‍යවරයා වෙතින් ප්‍රදානය කරන ලද අතර විදේශ කටයුතු අමාත්‍යාංශය මගින් මෙම වසරේ සංවිධානය කිරීමට යෙදුණු පස්වන වන්දි මුදල් බෙදාදීමේ උත්සවය මෙය වේ.

විදේශ රටවල සේවය නියුතුව සිටියදී මියගිය ශ්‍රී ලාංකික ශ්‍රමිකයන්ගේ පවුල්වල සාමාජිකයන් වෙත සිය කණගාටුව පළකළ අමාත්‍ය මංගල සමරවීර ජාතික ආර්ථිකයට විදේශ විනිමය ලබාදෙමින් ජාතික ආර්ථිකය ශක්තිමත් කිරීමෙහිලා ඔවුන් දැක්වූ දායකත්වය ඇගයීමට ලක් කළේය.

මෙම වන්දි මුදල් රැස්කර ගැනී‍මේදී සවුදි ආරාබිය, කටාර් රාජ්‍යය, කුවේට්, එක්සත් අරාබි එමීර් රාජ්‍යය, ලෙබනනය, ඕමානය හා ජෝර්දානය යන රාජ්‍යයන්හි ශ්‍රී ලංකා තානාපති කාර්යාලවල සහාය විදේශ කටයුතු අමාත්‍යාංශයට ලැබී ඇත.

ශ්‍රී ලංකා දූත මණ්ඩල විසින් මේ සම්බන්ධයෙන් පියවර ගනිමින් නිරන්තරයෙන් සිදු කරන ලද පසු විපරම් කටයුතු හා නෛතික ක්‍රියාමාර්ගවල ප්‍රතිඵලයක් වශයෙන් මෙම වන්දි මුදල් රැස්කර ගැනීමට හැකිවී ඇති බවයි අමාත්‍යවරයා පෙන්වා දෙන්නේ.

පසුගිය වසරේ පවුල් 143ක් අතර රුපියල් මිලියන 210ක පමණ මුදලක් වන්දි මුදල් ලෙස බෙදා දීමට වි‍දේශ කටයුතු අමාත්‍යාංශය සමත්වී ඇති අතර මේ වන විට මෙම වසර තුළ පමණක් රුපියල් මිලියන 274ක මුදලක් පවුල් 155ක් අතර බෙදා දීමට විදේශ කටයුතු අමාත්‍යංශය සමත්ව ඇත.

පසුගිය වසර 5ක කාලසීමාව සලකා බැලීමේදී, වන්දි මුදල් ප්‍රදානය කිරීමෙහිලා වැඩිම අගයක් වාර්තා කරමින් විදේශ කටයුතු අමාත්‍යාංශයේ ‍කොන්සියුලර් අංශය 2016 වසරේ රුපියල් මිලියන 346ක මුදලක් වන්දි මුදල් ලෙස ප්‍රදානය කර තිබේ.

විදේශ කටයුතු අමාත්‍ය මංගල සමරවීර, විදේශ රැකියා ඇමතිනී තලතා අතුකෝරාළ හා විදේශ කටයුතු නියෝජ්‍ය අමාත්‍ය ආචාර්ය හර්ෂ ද සිල්වා යන අමාත්‍යවරුන්ගේ සහභාගීත්වයෙන් මෙම වන්දි ලබා දීම සිදු විය.