ප්‍රගීත් වෙනුවෙන් නැගෙනහිර මාධ්‍යවේදීන්ගෙන් විරෝධතාවක්

එකොලොස් වසරක් තිස්සේ බලහත්කාරයෙන් අතුරුදහන් කර සිටින මාධ්‍යවේදී ප්‍රගීත් එක්නැලිගොඩට යුක්තිය ඉටු කරන ලෙස රජයට බලකරමින් නැගෙනහිර පළාතේදී විරෝධතාවයක් පැවැත්වීමට දෙමළ මාධ්‍යවේදී සංවිධාන කිහිපයක් කටයුතු සංවිධානය කර තිබේ.

 

ඝාතනයට ලක් වු සෙසු මාධ්‍යවේදීන්ද වෙනුවෙන් යුක්තිය ඉල්ලා සිටින ඔවුන් 2021 ජනවාරි 29 සිකුරාදා උදෑසන 9 විරෝධතාවය පැවැත්වීමට සැලසුම් කර ඇත්තේ මඩකලපුව මහත්මා ගාන්ධි උද්‍යානය ඉදිරිපිට දීය.

විරෝධතාවය සංවිධානය කරනු ලබන්නේ නැගෙනහිර පළාත් දෙමළ මාධ්‍යවේදී සංවිධානය, මඩකලපුව දිස්ත්‍රික් දෙමළ මාධ්‍යවේදී සංවිධානය හා මාධ්‍ය සේවක වෘත්තිය සමිති සංධානයේ මඩකලපුව ශාඛාවයි.

පොලිස් මත්ද්‍රව්‍ය නාශක අංශයේ කලක් සේවය කළ පොලිස් පරීක්ෂක නියෝමාල් රංගජීව කොළඹ මහාධිකරණ පරිශ්‍රයේ දී 2020 වසරේ ජුලි 10 වනදා මව්බිම පුවත්පතේ ඡායාරූප මාධ්‍යවේදී අකිල ජයවර්ධනට අමානුෂික ආකාරයෙන් සැලකීම පිළිබදව විරෝධය පාමින් මඩකලපුව මහත්මා ගාන්ධි උද්‍යානය ඉදිරිපිට දී ජුලි 11 සෙනසුරාදා දින විරෝධතාවයක් පැවැත්වීමටත් නැගෙනහිර පළාත් දෙමළ මාධ්‍යවේදී සංගමය සහ මඩකලපුව දිස්ත්‍රික් දෙමළ මාධ්‍යවේදීන්ගේ සංගමය කටයුතු කර තිබුනි.

ඝාතනයට හා පැහැරගැනීමට මෙන්ම විවිධ හිංසනයන්ට ලක් වන දකුණේ සිංහල මාධ්‍යවේදීන් වෙනුවෙන් දකුනේ මාධ්‍ය සංවිධාන විදී බැසීමට මැලිකමක් දක්වද්දීත්, ඔවුන් වෙනුවෙන් නැගෙනහිර දෙමළ මාධ්‍යවේදීන් හඩ නගන්නේ තමන්ට ද මරණ තර්ජන එල්ල වී තිබියදීය.

2020 වසරේ ජනවාරි මාසයේදී මඩකලපුව දිස්ත්‍රික් දෙමළ මාධ්‍යවේදීන්ගේ සංගමයේ මාධ්‍යවේදීන් හට මරණ තර්ජන කරමින් අත්පත්‍රිකා තොගයක් මඩකලපුව දෙමළ මාධ්‍ය සංගම් මුලස්ථානයට රහසේ ගෙනත් දමා තිබුනි.

සන්ඩේ ලීඩර් පුවත් පතේ හිටපු කතෘ ලසන්ත වික්‍රමතුංගගේ නැගෙනහිර අනුස්මරණ අවස්ථාවක ගන්නා ලද ඡායාරූපය එම අවස්ථාවට සහභාගී වු මාධ්‍යෙවේදීන්ගේ මුහුණු රවුම් කර ඔවුන්ට තර්ජනය එල්ල කර තිබුනි.

“පරිස්සම් වෙන්න, පරිස්සම් වෙන්න මේ ඉන්නේ පිටරට ඉන්නට කොටින්ගෙන් සල්ලි ලැබෙන වාර්තාකරුවන්. ඔවුන්ට ලඟදීම මරණ දඬුවම ලබා දෙනවා,” යි එම තර්ජනාත්මක අත් පත්‍රිකා වල සඳහන් කර තිබේ.

ස්වාධීන රූපවාහිනියේ වාර්තාකරු ක්‍රිෂ්ණකුමාර්, ලංකා ශ්‍රී ආයතනයේ සෙල්වකුමාර් නිලන්තන්, සිරස රූපවාහිනියේ පුන්‍යමුර්ති සසිකරන්, ශක්ති නාළිකාවේ කුහර්ෂ සුපෝජන් හා නල්ලතම්බි නිත්‍යනාදන් මෙන්ම තිනකුරල් පුවත් පතේ වඩිවෙල් ශක්තිවේල් සහ සුබ්‍රමනියම් කුනලිංගම් මෙසේ තර්ජනයට ලක්ව සිටින මාධ්‍යවේදීන් වේ.

ශ්‍රී ලංකාවේ මාධ්‍ය නිදහසට තර්ජන හා බලපෑම් වැඩි වශයෙන් එල්ල වු මාසයක් ලෙස සලකමින් ‘කලු ජනවාරිය’ලෙසින් ජනවාරි මස සැමරීමට ශ්‍රී ලංකාවේ මාධ්‍ය සංවිධාන වසර කිහිපයක සිට කටයුතු කරමින් සිටී.

2009 වසරේ ජනවාරි 06 දා සිරස දෙපානම මාධ්‍ය ආයතනයට එල්ල වූ බෝම්බ ප්‍රහාරය, 2009 වසරේ ජනවාරි 8 දින රත්මලාන අත්තිඩිය ප්‍රදේශයේදී සන්ඩේ ලීඩර් පුවත්පතේ කර්තෘ ලසන්ත වික්‍රමතුංග ඝාතනය හා 2010 වසරේ ජනවාරි 24 වැනිදා මාධ්‍යවේදී ප්‍රගීත් එක්නැගිගොඩ පැහැරගෙන ගොස් බලහත්කාරයෙන් අතුරුදහන් කිරීම ආදී මෙරට මාධ්‍ය සහ මාධ්‍යවෙීදීන් වෙත එල්ල වූ තවත් බොහෝ ප්‍රහාරයන්ගෙන් ඉලක්ක කරගනිමින් මාධ්‍ය නිදහසේ ‘කලු ජනවාරිය’ මෙරට මාධ්‍ය සංවිධාන විසින් සමරනු ලැබිණි.