ශ්‍රී ලංකාවේ විවිධ ජාතීන් අතර සංවාදයක් නොමැති වීම විමුක්ති කොටි නායක ප්‍රභාකරන් මතු වීමට හේතුව බව කොටින්ට එරෙහිව යුද වැදුන හිටපු ජනාධිපතිවරියක් කොළඹ සංහිඳියා වැඩසටහනක් අමතමින් කියා සිටි.
ආගම් හතරකට අයත් ප්‍රධාන ජාතීන් හතරක් ජීවත් වුවද ඔවුන් එකිනෙකා කිසි දිනක කතා නොකර ඇති බවට කී හිටපු ජනපතිනිය එය මෙරට යුද්ධයක් ඇති වීමට හේතු වු එක් ප්‍රධානතම හේතුවක් බව කියා සිටියේ ජාතික සමගිය හා සංහිඳියා කාර්යාංශය විසින් පවත්වනු ලබන “සහෝදර පාසල්” ශිෂ්‍ය කඳවුරෙහි 9 වැනි අදියරයෙහි අවසන් උත්සවය අමතමිනි.
“භයානක යුද්ධය ඇති වීමට ප්‍රධානතම හේතුව මේ බෙදී වෙන්වී ජිවත් වීම එකිනෙකාගේ භාෂාවල් කතා කරන් නොහැකි වීම” යැයි හිටපු ජනපතිනි චන්ද්‍රිකා බණ්ඩාරනායක කුමාරතුංග තරයේ විශ්වාසය පල කළේය.
සිංහල බහුතරය ජිවත් වන ප්‍රදේශ වලට මෙන් දෙමළ ජනතාව ජිවත් වන උතුරු නැගෙනහිරට සංවර්ධනය ගලා නොගිය බව සත්‍යයක් යැයි පිළිගත් දෙවරක්ම මෙරට විධායක ජනාධිපතිධුරය දැරූ චන්ද්‍රිකා බණ්ඩාරනායක කුමාරතුංග දෙමළ ජනයා වෙනම රටක් ඉල්ලා සිටීම යුක්ති සහගත බව වැඩි දුරටත් කියා සිටියාය.
Facebook Comments
