බදුල්ල දෙමළ බාලිකා විද්‍යාලයේ විදුහල්පතිවරිය දණ ගැස්සු සිද්ධියට චෝදනා ලබා සිටින ඌව පළාත් ප්‍රධාන අමාත්‍යවරයා ඇතුළු පිරිස අත්අඩංගුවට ගන්නා ලෙස බල කරමින් ප්‍රදේශ කිහිපයක ගුරුවරුන් කළු පටි පැලඳ විරෝධතා පවත්වා තිබේ.
සිද්ධියට විරෝධය පල කරමින් අනුරාධපුර දිස්ත්‍රික්කයේ විදුහල්පතිවරු සහ ගුරුවරු පිරිසක් අනුරාධපුර ඩී.එස්.සේනානායක වට රවුමේද බදුල්ල දෙමළ බාළිකා විදුහලේ සේවකයන් හා දෙමාපියන් එක්ව ඌව පළාත් සභාව ඉදිරිපිටදී ද 22 සඳුදා විරෝධතා පවත්වා ඇත.
අදාළ සිද්ධියට විරෝධය පල කරමින් දිවයින පුරා උද්ඝෝෂණ ව්‍යාපාරයක් ආරම්භ කරන බවත් එහි පළමු උද්ඝෝෂණය අනුරාධපුරයෙන් ආරම්භ කල බව සංගමයේ ලේකම් ජෝෂ්ප් ස්ටාලින් කියා සිටියේය.
විදුහල්පතිනිය හට විවිධ චෝදනා එල්ල කරමින් මෙම සිද්ධිය යට ගැසිමට ප්‍රධාන අමාත්‍යවරයා කටයුතු කරන බව සහ ප්‍රධාන අමාත්‍යවරයා වහාම අත් අඩංගුවට ගත යුතු බවත් එසේ නොවුන හොත් සමස්ථ ගුරු ප්‍රජාවම එක්ව දැවැන්ත වෘත්තිය ක්‍රියා මාර්ගයක් ගන්නා බව ලංකා ගුරු සංගමයේ සභාපති ප්‍රියන්ත ප්‍රනාන්දු අනුරාධපුර පැවති විරෝධතාවයේදී අනතුරු ඇඟවීය.
මේ අතර දණගැස්වී යැයි කියන බදුල්ල දෙමළ බාලිකා විද්‍යාලයේ විදුහල්පතිවරිය අද ස්ථානීය පරීක්ෂණයක් සඳහා ඌව මහ ඇමැතිවරයාගේ නිල නිවසට කැඳවාගෙන ගිය බව පොලිසිය කියයි.
පැය 3 පමණ කාලයක් තමා මුහුණ දුන් සිද්ධිය සම්බන්ධයෙන් විදුහල්පතිනිය පොලිසය වෙත ප්‍රකාශයක් ලබා දුන් බව ද පොලිසිය පවසයි.
Facebook Comments
