ආගමික අයිතීන් වෙනුවෙන් පෙනී සිටින මානව හිමිකම් නිතිඥයෙකු වන ලක්ෂාන් ඩයස්ට එරෙහිව අධිකරණ ඇමති විජේදාස රාජපක්ෂ විසින් අඩන්තේට්ටම් කිරීමට දරන උත්සාහය වහාම නවතා දැමීමට රජය පියවර ගත යුතු බවට ජාත්‍යන්තර මානව හිමිකම් සංවිධානයක් අවධාරණය කරයි.
නීතිවේදි ලක්ෂාන්ගේ නීතිඥ බලපත්‍රය ආහෝසි කරන බවට තර්ජනය කිරීම මඟින් ආණ්ඩුව තර්ජනය කර ඇත්තේ ඔහු ඇතුළු මානව හිමිකම් ක්‍රියාධරයන්ගේ සරණ පතා සිටින ආන්තික වූ කණ්ඩායම් සියල්ලටම බවයි හියුමන් රයිට්ස් වෝච් සංවිධානයේ ආසියා කලාපීය අධ්‍යක්ෂ බ්‍රැඩ් ඇඩම්ස් නිවේදනයක් නිකුත් කරමින් පෙන්වා දෙන්නේ.
අධිකරණ ඇමතිවරයා විසින් නීතිඥ ලක්ෂාන් ඩයස් නීතිඥ ධුරයෙන් පන්නා දමන බවට කල තර්ජනය සම්බන්ධව ආණ්ඩුව පියවරක් නොගන්නේ නම් එය ජාතයන්තර වශයෙන්ද ආණ්ඩුවට බලපානු ඇති බවටයි එම සංවිධානය අනතුරු අඟවා සිටින්නේ.
නීතිඥවරයාට කල තර්ජනාත්මක ප්‍රකාශයට එරෙහිව ආණ්ඩුව විසින් ගන්නා ක්‍රියාමාර්ගය සම්බන්ධයෙන් ආණ්ඩුවට හිතවත් විදේශිය රටවල් හොඳින් බලා සිටින බව ශ්‍රි ලංකා රජයට දැනුම් දෙන ලෙසට හියුමන් රයිට්ස් වෝච් සංවිධානය විදේශිය රටවලින් ඉල්ලා සිටි.
ක්‍රිස්තියානි ආගමික ස්ථාන වලට එරෙහිව පහරදීම් සම්බන්ධව රූපවාහිනි වැඩසටහනක කල ප්‍රකාශයක් සම්බන්ධව නීතිඥ ලක්ෂාන් ඩයස් විසින් පැය 24 ක් ඇතුළත රටේ ජනතාවගෙන් ප්‍රසිද්ධියේ සමාව ගත යුතු බව පැවසු අධිකරණ ඇමති විජේදාස රාජපක්ෂ නොඑසේ නම් ඔහු නීතිඥ ධුරයෙන් නෙරපන බවට ප්‍රසිද්ධ ප්‍රකාශයක් කළේය.
Facebook Comments
