යුද පීඩිත වන්නියෙන් මතුවූ අලුත්ම සමූහ මිනීවලේ විමර්ශන කටයුතු දින නියමයක් නැතිව කල් ගොස් තිබේ.
ජලනල එලීම සඳහා අගල් හැරීමේදී අහම්බයෙන් අනාවරණය වූ කොක්කුතොඩුවායි සමූහ සුසානයේ කැනීම් සම්බන්ධ වගකීම පැවරී ඇති පුරාවිද්‍යා දෙපාර්තමේන්තුවේ නිලධාරීන් අධිකරණය හමුවේ පෙනී නොසිටීම නිසා ඔවුන්ට ඒ පිළිබඳ වියදම් ඇතුළු වාර්තාවක් අගෝස්තු 8 වැනිදා ලබාදෙන ලෙස මුලතිව් දිසා විනිසුරු ටී ප්‍රදීපන් විසින් ජුලි 7 දා නියම කරන ලදී.
ඒ අනුව, සති තුනකට ඉහතදී හිස්කබල් ඇතුළු මානව අස්ථි කොටස් සොයාගන්නා ලද ස්ථානයේ කැනීම් පිළිබඳ තීරණ ගැනීම තවත් මාසයකට කල් ගොසිනි.
මුලතිව් අධිකරණ වෛද්‍ය නිලධාරී කනගසභාපති වාසුදේවගේ යෝජනාවක් පරිදි යාපනය විශ්ව විද්‍යාලයේ පුරාවිද්‍යාව පිළිබඳ හිටපු මහාචාර්ය පරමු පුෂ්පරත්නම් සහ වෝහාරික පුරාවිද්‍යාඥ මහාචාර්ය රාජ් සෝමදේවගේ සහාය සුසානය කැනීම සඳහා ලබා ගැනීමට විනිසුරුවරයා විසින් නිර්දේශ කරන ලද බව නීතිඥ වී එස් නිරංජන් මාධ්‍යවේදීන්ට කියා සිටියේය.
විමර්ශන කටයුතු සඳහා ජාත්‍යන්තර විශේෂඥයන් හවුල් කර නොගැනීමට ඉකුත් බ්‍රහස්පතින්දා පැවති ඉහල පෙලේ සාකච්ඡාවකදී තීන්දු කිරීම යුද පීඩිත ප්‍රදේශවාසීන්ගේ බලවත් කනස්සල්ලට හේතුවී තිබේ.
යුද්ධාවසානයේ රජයේ හමුදාවට භාරවීමෙන්ද, පැහැරගනු ලැබීමෙන්ද අනතුරුව අතුරුදහන් කරන ලද සමීපතමයන්ගේ ඉරණම හෙළි කරගැනීම සඳහා දෙමළ ජනතාව ඉකුත් පහළොස් වසරකට ආසන්න කාලයක් තිස්සේ ඉල්ලා සිටින්නේ ජාත්‍යන්තර මැදිහත්වීමකි.
Facebook Comments
