ජනතාවගේ ජීවන බර අඩු කිරීම සඳහා රටේ ආර්ථික කළමනාකරණයේ වගකීම තමා අතට ගන්නා බව ජනාධිපතිවරයා කියා තිබේ.
පසුගිය වසර තුන පුරා එක්සත් ජාතික පක්ෂයට රටේ ආර්ථික කළමනාකරණයට ඉඩ දී තිබුණත් මෙම වසරේ සිට එම වගකීම තමා අතට ගන්නා බව ජනාධිපති මෛත්‍රීපාල සිරිසේන 20 සෙනසුරාදා කෑගල්ලේ පැවති සන්ධානයේ මැතිවරණ ප්‍රචාරක රැළියක් අමතමින් කියා සිටියේය.
මීට තෙමසකට පෙර ජාතික ආර්ථික සභාව පත් කළ බව පැවසූ ජනාධිපතිතුමා ඒ හරහා රටේ ආර්ථිකය ඉදිරියට මෙහෙයවමින් ජනතාවට සහන ලබාදීමට කටයුතු කරන බව ද ප‍්‍රකාශ කළේය.
දේශිය කර්මාන්ත, දේශීය නිෂ්පාදන සහ දේශීය ආයෝජන සියල්ල ආරක්ෂා කරමින් රටේ ජාතික ආර්ථිකය ශක්තිමත් කිරීමේ වගකීම තමා භාරගන්නා බව කී ජනාධිපතිවරයා රට හැර නොගොස් මාතෘභූමිය ගොඩනැගීමට එක්වන ලෙසට දේශීය කර්මාන්තකරුවන්ගෙන් සහ ආයෝජකයින්ගෙන් ඉල්ලීමක් ද කරන ලදී.
ස්වාභාවික සම්පත්වලින් අනූන අපේ රට ලෝකයේ දියුණු රාජ්‍යයක් බවට පත්කිරීමට කිසිදු බාධාවක් නොමැති අතර ඇති එකම බාධාව දූෂිත දේශපාලනය බව මෙහිදී අවධරණය කල ජනාධිපති මෛත්‍රීපාල සිරිසේන දූෂිත දේශපාලනයට තිත තැබීමේ ගමන තමා මෙම පෙබරවාරි 10 වෙනිදා පළාත් පාලන මැතිවරණයත් සමග ආරම්භ කරන බවද වැඩි දුරටත් කියා සිටියේය.
Facebook Comments
