හමුදා ලොක්කන් උස්තැන් වලට දැමීම ගැන විරෝධය පළවේ (VIDEO)

0
195
Ivory Agency Sri Lanka
HailHost
wedding people

රටේ ජීවන වියදම අහස උසට වැඩි වී ඇති මොහොතක ජනතාවට සහන නොදී හමුදා නිලධාරීන් ඉහළ තනතුරු සඳහා පත් කරමින් සිටින්නේ මැතිවරණයෙන් පසු ඇති විය හැකි ජනතා නැගිටීම් මර්දනය සඳහා බවට සිවිල් සමාජ ක්‍රියාධරයෝ අනතුරු අඟවති.

“අද හැම කෙනෙක්ම දන්නවා ජීවන වියදම අහස උසට වැඩි වෙලා තියනවා. භාණ්ඩ මිල වැඩි වෙලා තියනවා. සේවා ගාස්තු වැඩි වෙලා තියනවා. ආණ්ඩුවට ආර්ථික කළමණාකරණයක් නෑ. ආණ්ඩුව ඒ වෙනුවට රට හමුදාකරණය කරමින්, හමුදා නිලධාරීන් මර්මස්ථානවලට වලට යොදවමින් ඉදිරියේදී ඇති විය හැකි නැගිටීම් වලට උත්තර දෙන්න සැලසුම් කරමින් ඉන්නවා.”

සිවිල් සංවිධාන හා වෘත්තිය සමිති එකමුතුවේ සම කැඳවුම්කරු මෙන්ම එක්සත් ජාතික පක්ෂයේ හිටපු ජාතික ලැයිස්තු පාර්ලිමේන්තු මන්ත්‍රී සමන් රත්නප්‍රිය එම චෝදනාව එල්ල කළේ ජුලි 28 අඟහරුවාදා කොටුව දුම්රිය පොළ ඉදිරිපිට පැවැති විරෝධතාවයක් අතරතුරදී මාධ්‍ය වෙත අදහස් දක්වමිනි.

කෝවිඩ් 19 ආසාදිතයන් සම්බන්ධයෙන් රජය ඉදිරිපත් කරන ගණන් හිලව් අසත්‍ය බවටද ඔහු වැඩි දුරටත් කියා සිටියේය.

මිලිටරී කරණය වහා නවතනු, ජීවන වියදම පහත හෙලනු, අත්‍යාවශ්‍ය ආහාර ද්‍රව්‍ය මිල පහත හෙලනු, රාජ්‍ය සේවක වැටුප් හා දීමනා කප්පාදුව නවතනු ආදී මුලික සටන් පාඨ පෙරටු කරගනිමින් පැවැති විරෝධතාවයේදී වෘත්තීය සමිති නායකයා වැඩි දුරටත් අවධාරණය කළේ හමුදා නිලධාරීන් ආර්ථික මර්මස්ථාන වලට පත් කරමින් ආණ්ඩුව ජනතාව මර්දනය කිරීමට ඉදිරියේදී සුදානම් වන බව ඉතා පැහැදිලි කරුණක් බවයි.

සිංහල-දෙමළ පුරාවස්තු

එක්සත් ජාතික පක්ෂයේ කලුතර දිස්ත්‍රික් ලැයිස්තුවෙන් මෙවර පාර්ලිමේන්තු මැතිවරණය සදහා තරග වදින මහාචාර්ය වික්‍රමබාහු කරුණාරත්න එහිදී චෝදනා කළේ සිංහල බලය වැඩි කර ගැනීම සඳහා ජාතිවාදය අවුස්සමින් බලයට පත් වත්මන් ආණ්ඩුව සිංහල ජාතියේ වංශ කතාවත් අතුගා දැමීමට කටයුතු කරමින් සිටින බවයි.

“අර බුවනෙකබාහු රජතුමාගේ මණ්ඩපය අතු ගාලා දාලා, කඩලා විනාශ කරලා දාලා කට උත්තර නැති වෙන තැනට පත් උනා. මේකෙන් පෙනෙනවා මේ රටේ ඉතිහාසය ගැන මේ ගොල්ලන්ට තිබෙන උවමනාව කුමක්ද කියලා. බොරුවට සිංහලේ සිංහලේ කිව්වට සිංහල ජාතියේ වංශ කතාවත් අතුගාලා දාන්න ලැස්ති කණ්ඩායමක් තමයි කියලා දැන් ඔප්පු වෙලා තියනවා,” යි මහාචාර්යවරයා වැඩි දුරටත් සඳහන් කළේය.

ඒ අතර උතුරු නැගෙනහිර දෙමළ ජනතාවගේ පුරාවස්තු විනාශ කර දැමීමට එරෙහිව එම පළාත් වල පවරා ඇති නඩු දකුණේ විමසා සිංහලයන්ට වාසිදායක ලෙස තීන්දු ලබාගනීමේ සැලසුමක් පවතින බවට අතුරුදහන් වුවන් සොයා බැලීමේ කමිටුවේ ප්‍රධාන ලේකම් සුන්දරම් මහේන්ද්‍රන් ප්‍රකාශ කළේය.

දෙමළ පුරාවස්තු විනාශය ගැන හඬක් නැගීමට දේශපාලකයන් ඉදිරිපත් නොවීම ගැන මානව හිමිකම් ක්‍රියාධරය සිය කනගාටුව පළකර සිටියේය.

Facebook Comments

HailHost