අපේ යෝජනා විස්සේ නැහැ – විමල්ගේ පක්ෂය අගමැතිට ලියයි

0

විසිවෙනි සංශෝධන පනත් කෙටුම්පතට අදාළව තම පක්ෂය විසින් ඉදිරිපත් කළ කිසිදු සංශෝධන යෝජනාවක් කාරක සභා අවස්ථාවට ඇතුළත් කරන බවට නීතිපතිවරයා විසින් අධිකරණයට දැනුම් දුන් යෝජනාවලියට ඇතුලත් නොවීම ගැන ජාතික නිදහස් පෙරමුණ සිය කනස්සල්ල පළ කර තිබේ.

සංශෝධනයට ඇතුලත් විය යුතු බවට මේ සම්බන්ධයෙන් පැවැති සාකච්ජාවලදී තම පක්ෂය මූලික කරුණු 3ක් පෙන්වා දුන් බවත්, එම කරුණු 3 නීතිපතිවරයා විසින් අධිකරණයට ලබා දුන් වාර්තාවේ හෝ කමිටු අවස්ථාවේ සිදු කිරීමට නියමිත සංශෝධනවලට හෝ ඇතුළත්ව නොමැති බවයි ජනිපෙ දේශපාලන මණ්ඩලය වෙනුවෙන් එහි ප්‍රධාන ලේකම්, එස්. විජයසිරි විසින් අගමැති මහින්ද රාජපක්ෂ වෙත ලිපියක් යොමු කරමින් කියා සිටින්නේ.

”යෝජිත 20 වැනි ආණ්ඩුක්‍රම ව්‍යවස්ථා කෙටුම්පතට ඇතුළු කොට ඇති යම් ප්‍රතිපාදන පිළිබඳව අප පක්ෂයේ නායකත්වය සහ සෙසු පක්ෂ නායකයන් මෙන්ම පොදු මහජනතාව විසින් ඉදිරිපත් කළ විරෝධතා පිළිබඳව සංවේදී වීම පිළිබඳව පළමුවෙන්ම අප පක්ෂයේ ප්‍රණාමය ඔබතුමාට පිළිගැන්විය යුතුය.

ඒ අනුව ඔබතුමා විසින් පත් කරන ලද කමිටුවට අප පක්ෂයේ නායක විමල් වීරවංශ සහෝදරයා විසින් ඉදිරිපත් කරන ලද මූලික විරෝධතා පිළිබඳව යම් එකඟතාවකට පැමිණීමට උත්සාහ කිරීම ද අපගේ ඇගයීමට ලක් වේ.

නමුත් නීතිපතිවරයා විසින් රජයේ යෝජනා ලෙස අධිකරණයට ඉදිරිපත් කරන ලද සහ පාර්ලිමේන්තු විවාදයේ කාරක සභා අවස්ථාවේ දී සංශෝධනය කිරීමට නියමිත බවට සඳහන් කළ යෝජනාවලිය තුළ අප පක්ෂයේ නායකයා විසින් ඉදිරිපත් කළ සංශෝධන කිසිවක් අඩංගු නොවන බව කනගාටුවෙන් සඳහන් කළ යුතුය.

අප පක්ෂයේ නායක විමල් වීරවංශ සහෝදරයා විසින් ඔබතුමා වෙත ඉදිරිපත් කළ සහ නීතිපතිවරයාගේ යෝජනා තුළ අඩංගු නොවූ සංශෝධන අතුරින් ප්‍රධාන ත්‍රිත්වයක් ඉතා තීරණාත්මකව වැදගත් වේ.”

දේශපාලන වගකීම ගන්නේ නෑ

ඒවා පිළිබඳව ප්‍රබල මහජන විරෝධයක් ගොඩනැගී ඇති අතර එම විරෝධයන් නොසලකා කටයුතු කිරීම මගින් අපගේ ආණ්ඩුවේ ජනවරමේ ආධ්‍යාත්මයට සහ ආණ්ඩුවේ ප්‍රතිරූපයට බලවත් අගතියක් සිදුවන බවයි එම ලිපියෙන් පෙන්වා දී ඇත්තේ.

1. සමාගම් රෙජිස්ට්‍රාර් යටතේ ලියාපදිංචි කොට ඇති රජයට බහුතර කොටස් හිමි සමාගම් විගණකාධිපතිවරයාගේ විගණනයෙන් නිදහස් කිරීම.

2. මහජනයාගේ දැනගැනීම පිණිස ගැසට් කිරීමෙන් තොරව හදිසි පනත් සම්මත කිරීම.

3. ද්විත්ව පුරවැසි බාධකය පාර්ලිමේන්තු මන්ත්‍රීවරුන්ගෙන් ඔබ්බට තානාපතිවරුන් සහ රජයේ ප්‍රධාන උසස් නිලතලවලට ද පැනවීම වෙනුවට එම බාධකය සම්පූර්ණයෙන්ම ඉවත් කිරීම. යන කරුණු වෙනස් විය යුතු බවට තම පක්ෂය යෝජනා කරන ලද බව ජනිපෙ අගමැති මහින්ද රාජපක්ෂ වෙත යවන ලිපියෙන් නැවත සිහිපත් කර දී ඇත.

ආණ්ඩුවක් ලෙස එම වැරදි නිවැරදි කළ යුතු බව පෙන්වා දෙන ජාතික නිදහස් පෙරමුණ එය ජනවරම ආරක්ෂා කිරීම සඳහා පක්ෂය විසින් ගනු ලබන දේශපාලන ස්ථාවරය බවයි අවධාරණය කරන්නේ.

ආණ්ඩුව සමස්තයක් ලෙස එම දේශපාලන ස්ථාවරය නොසලකා කටයුතු කරන්නේ නම් එහි දේශපාලන වගකීම තම පක්ෂය විසින් බාර නොගන්නා බවටද එම ලිපියෙන් අනතුරු අඟවා තිබේ.

එහෙත් ආණ්ඩුවට සහ රටට එරෙහිව පවතින සතුරු වටලෑම පිළිබඳව ගැඹුරු අවබෝධයකින් යුතුව 20 වැනි ව්‍යවස්ථා සංශෝධනයට අදාළව ආණ්ඩුව ආරක්ෂා කිරීමේ දේශපාලන ස්ථාවරයක් ගන්නා බවද එම ලිපියේ වැඩි දුරටත් සඳහන් කර ඇත.

Facebook Comments

wedding people