සිය ධුරයෙන් විශ්‍රාම ගැනීමට පෙර මරණ දණ්ඩනය ක්‍රියාත්මක කිරිම ජනාධිපතිවරයාගේ අපේක්ෂාව වී තිබේ.
හතලිස් වසරක් තිස්සේ නවතා දමා තිබු මරණීය දණ්ඩනය ක්‍රියාත්මක කිරීමට ජාත්‍යන්තර හා දේශීය වශයෙන් නැගෙන විරෝධතා නොතකා සිය අනුමැතිය ලබා දුන් බව ජනපති මෛත්‍රීපාල සිරිසේන පසුගිය ජුනි මාසයේ මාධ්‍ය ආයතන ප්‍රධානින් හමුවේ පැවසීය.
එහෙත් ජනාධිපතිවරයාගේ මාරාන්තික තීරණය අත්හිටුවන ලෙස ඉල්ලා ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සම් ගොනු කිරිම හේතුවෙන් මරණීය දණ්ඩනය ක්‍රියාත්මක කිරීම ඇණ හිට තිබුනි.
ශ්‍රේෂ්ඨාධිකරණය විසින් මරණ දඬුවම දීමට තමන් ගත් තීරණය අනුමත කලහොත් ධුරයෙන් විශ්‍රාම යාමට පෙර එල්ලුම් ගහ ක්‍රියාත්මක කරන බව ජනාධිපතිවරයා අවධාරණය කළේය.
“තව දවස් කීපයකින් ආපහු ඒ නඩු දිනේ තියෙනවා. ඉතින් මම දන්නෙ නෑ ශ්‍රේෂ්ඨාධිකරණ විනිසුරු තුමන්ලා මොන තීන්දුවක් ගනීද කියලා. මරණීය දණ්ඩනය දෙන්න බැහැ කියලා ශ්‍රේෂ්ඨාධිකරණයෙන් තව කල් දාලා හරි එහෙම දෙයක් කලොත් මරණීය දණ්ඩනය දෙන එක කරන්න මට බැරුව යනවා. හැබැයි ශ්‍රේෂ්ඨාධිකරණය මරණීය දණ්ඩනයට මට ඉඩ දීලා ඒ නඩුව අවසන් කලොත් මම මගේ නිල කාලය යන්න කලින් මරණීය දණ්ඩනය දීලයි මම යන්නේ.” යි ජනපති පැවසීය.
ශ්‍රී ලංකා මානව හිමිකම් කොමිසම, ශ්‍රී ලංකාවේ යුරෝපා සංගමය සහ ප්‍රබල තානාපති කාර්යාල කිහිපයක්ම මරණ දණ්ඩනය ක්‍රියාත්මක කිරීමට ගත් තීරණය ආපසු හරවන ලෙසට පසුගිය වසරේ ජනාධිපතිවරයාගේ ලිඛිතව ඉල්ලා තිබුනි.
Facebook Comments
