පොලිස්පතිවරු දෙන්නෙක් සමග තවත් ඉහල පුටු මාරුවක්

0

වත්මන් පොලිසිපතිවරයා රාජකාරියේ නිරතව සිටියදීම ජනාධිපතිවරයා විසින් වැඩ බලන පොලිස්පතිවරයකු පත් කර ඇත.

වැඩ බලන පොලිස්පතිවරයා ලෙස ජනාධිපති මෛත්‍රීපාල සිරිසේන විසින් 29 සඳුදා ජ්‍යෙෂ්ඨ නියෝජ්‍ය පොලිස්පති සී.ඩී. වික්‍රමරත්න පත් කල බව ජනාධිපති මාධ්‍ය අංශය නිවේදනය කළේය.

පාස්කු ඉරිදා ප්‍රහාර මාලාවත් සමඟ වත්මන් පොලිස්පති පුජිත් ජයසුන්දර හට සිය ධුරයෙන් ඉල්ලා අස්වන ලෙසට ජනපති කරන ලද ඉල්ලීම ඔහු විසින් ප්‍රතික්ෂේප කරන ලද බවට මාධ්‍ය වාර්තා කර තිබුණි.

නව වැඩ බලන පොලිස්පතිවරයා පත් කිරිමත් සමඟම පොලිස්පතිවරයා අනිවාර්ය නිවාඩු යැවීමට ජනපති මෛත්‍රීපාල සිරිසේන විසින් කටයුතු කර ඇති බවයි ජනාධිපති ලේකම් කාර්යාල ආරංචි මාර්ග පවසන්නේ.

මේ අතර ආරක්ෂක අමාත්‍යාංශයේ උපදේශකවරයෙකු ලෙස හිටපු පොලිස්පති එන්.කේ. ඉලංගකෝන් පත් කර ඇති අතර නව ආරක්ෂක ලේකම් ලෙස හිටපු යුද හමුදාපති ජනරාල් එස්.එච්.එස්. කෝට්ටේගොඩ පත් කර ඇත.

ඊට අමතරව නව අගවිනිසුරුවරයා ලෙස ජයන්ත ජයසූරිය හා සොලිසිටර් ජනරාල් ජනාධිපති නීතිඥ දප්පුල ද ලිවේරා වැඩබලන නිතිපතිවරයා ලෙස පත් කරන ලද බවයි ජනාධිපති මාධ්‍ය ඒකකය වැඩි දුරටත් නිවේදනය කරන්නේ.

පාස්කු ප්‍රහාර මාලාවෙන් දින දෙකකට පසු ජනාධිපතිවරයා ප්‍රකාශ කර තිබුනේ “පැය විසිහතරෙන්” සියලුම ආරක්ෂක ප්‍රධානින් වෙනස් කරන බවයි.

Facebook Comments