අනන්‍යතාවයට බාධා වන මුහුණු ආවරණ තහනම්

අනන්‍යතාව තහවුරු කර ගැනීමට බාධාවක් වන ලෙස මුහුණ ආවරණය කිරීම හදිසි අවස්ථා නියෝග යටතේ තහනම් කිරීමට ජනාධිපතිවරයා පියවර ගෙන ඇත.

අදාළ තහනම 29 සඳුදා සිට ක්‍රියාත්මක බවයි ජනාධිපති මාධ්‍ය ඒකකය නිවේදනය කරන්නේ.

මෙහිදී අනන්‍යතාව තහවුරු කිරීමේ මූලික නිර්නායකය වන්නේ පුද්ගලයෙකුගේ මුහුණ පැහැදිළි ලෙස නිරාවරනය කිරීමේ අවශ්‍යතාවය බව එම නියෝගය තුළින් තව දුරටත් පැහැදිළි කර තිබෙන බව එම නිවේදනයේ සඳහන්.

රටේ ජාතික ආරක්ෂාව මෙන්ම කිසිදු ජන කොටසක් අපහසුතාවයට පත් නොවන සාමකාමී සහ සහජීවනයෙන් යුත් සමාජයක් ඇති කිරීම වෙනුවෙන් ජනාධිපතිවරයා විසින් මෙම තීරණයට එළඹී බවයි ජනපති මාධ්‍ය ඒකකය පෙන්වා දෙන්නේ.

මේ අතර ජාතික තව්හීඩ් ජමාත් සංවිධානය (National Thawheed Jammath – NTJ) සහ ජමාතෙයි මිල්ලතු ඊබ‍්‍රාහිම් ෆි සෙයිලානි (Jamathei Millathu Ibraheem- JMI) සංවිධානය ශ‍්‍රී ලංකාව තුළ තහනම් සංවිධාන ලෙස ප‍්‍රකාශයට පත් කිරීමට කටයුතු සලසා ඇති බව ද ජනපති මාධ්‍ය අංශය පසුගියදා නිවේදනය කළේය.

එමෙන්ම මෙරට කි‍්‍රයාත්මක වන සෙසු අන්තවාදී සංවිධානවල කි‍්‍රයාකාරකම් ද හදිසි අවස්ථා නියෝග යටතේ තහනම් කිරීමට නියමිත බව ද එම නිවේදනයේ වැඩි දුරටත් සඳහන්ව තිබුණි.