මුළු ශරීරයම ආවරණය වන පරිදි අඳින ඕනෑම ඇඳුමක් තාවකාලිකව තහනම් කිරීම සම්බන්ධයෙන් කරන ලද යෝජනාවට අගමැතිවරයා සහ මුදල් අමාත්‍යවරයා විරුද්ධ වු බවට පළ වන මාධ්‍ය වාර්තා අසත්‍ය බව අධිකරණ හා බන්ධනාගාර ප්‍රතිසංස්කරණ අමාත්‍යංශය පවසයි.
එම යෝජනාවට අගමැති රනිල් වික්‍රමසිංහ හෝ මංගල සමරවීර අමාත්‍යවරයා කිසිඳු විරෝධයක් නොදැක්වු බව පවසන තලතා අතුකෝරාළ ඇමැතිනිය ඒ සම්බන්ධව මුස්ලිම් පුජකවරුවන් දැනුවත් කරන ලෙස ඔවුන් ඉල්ලා සිටි බවයි පෙන්වා දෙන්නේ.
“අග්‍රාමාත්‍යතුමාගේ අදහස වුයේ සාමාන්‍යයෙන් මුස්ලිම් ජනතාවට බලපාන දෙයක් නිසා මේ තීරණය ක්‍රියාත්මක කරන්න පෙර මුස්ලිම් පූජකතුමන්ලා දැනුවත් කරන්න කියලා. ඒ අනුව ඒ කටයුතු මා විසින් කරන්නට යෙදුනා.නොයෙකුත් අය පටු දේශපාලන වාසි ගන්න මේ සම්බන්ධයෙන් අගමැතිතුමා මුදල් ඇමතිතුමා දිගින් දිගටම විවේචනය කරමින් නොයෙකුත් මාධ්‍ය හරහා නැති මතයක් ගොඩ නගන්නට උත්සාහ කරනවා,” යි ඇමැතිවරිය අවධාරණය කළාය.
විවිධ ජාතීන් වෙසෙන රටක් ලෙස එක් ජාතියකට අදාළ තීන්දු තීරණ වලට එළඹීමට පෙර ඔවුන් දැනුවත් කිරිම රජයේ වගකීම වන බැවින් අගමැති රනිල් වික්‍රමසිංහ එසේ සඳහන් කළ බවයි අධිකරණ හා බන්ධනාගාර ප්‍රතිසංස්කරණ ඇමැතිනී තලතා අතුකෝරාළ වැඩි දුරටත් පැවසුවාය.
Facebook Comments
