ඝාතනයට ලක්වූ හතළිහකට අධික දෙමළ මාධ්‍යවේදීන්ට වසර ගණනක් ගතවීත් යුක්තිය ඉටු නොවීමටත්, පාස්කු ඉරිදා සමූහඝාතන වලට මග පෑදීමටත් එකම හේතුව රාජ්‍ය ඔත්තු සේවාවේ නොසැලකිල්ල බව දෙමළ දේශපාලකයකු පවසයි.
බුද්ධි අංශ නිලධාරීන් නිසියාකාර සිය රාජකාරිය කළේ නම්, මාධ්‍යවේදීන් ඝාතනය කළ අපරාධකරුවන් අල්ලා ගැනීමට මෙන්ම, පාස්කුවේ සිය ගණනක් බැතිමතුන්ගේ මරණ වලක්වා ගන්නටත් ඉඩ තිබුනු බව ඊපීආර්එල්එෆ් සංවිධානයේ නායක සුරේෂ් ප්‍රේමචන්ද්‍රන් ප්‍රකාශ කළේ ටැමිල්නෙට් පුරෝගාමී කතුවර ධර්මරත්නම් සිවරාම් ඝාතනයේ 14 වැනි අනුස්මරණය යාපනය මාධ්‍ය සමාජය විසින් යාපනයේ පවත්වන ලද අවස්ථාවේදීයි.
මරා දමන ලද සහ වධහිංසාවට ලක්වූ මාධ්‍යවේදීන් සම්බන්ධයෙන් ආණ්ඩුවලින් යුක්තිය ඉල්ලා සිටීම ඊපීආර්එල්එෆ් නායකයා විසින් හඳුන්වන ලද්දේ “බිහිරන්ට හක් පිඹීමක්” ලෙසිනි.
ඝාතන සහ පැහැරගැනීම් ඇතුළු පීඩාවලට රට තුලදී ලක්වූ මාධ්‍යවේදීන් පිළිබඳව ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) විසින් සම්පාදනය කරන ලද 44 දෙනකුගේ නම් රැගත් ලැයිස්තුවක් අගමැති රනිල් වික්‍රමසිංහට භාර දෙන ලද්දේ බලයට පත්වී මාස හතරක් ගතවෙද්දීය.
තාරකී සිවරම් මරා දමා දාහතර අවුරුද්දක් ගතවීත් අපරාධකරුවන් කිසිවකුත් අල්ලා, නඩු පවරා, දඬුවම් කර නැත.
Facebook Comments
