උතුරේ දෙමළ තරුණයකුට පහරදුන් බවට රජයේ බුද්ධි අංශ නිලධාරීන් වෙත චෝදනා එල්ල වී තිබේ.
දෙමළ මාධ්‍ය කිහිපයක්ම වාර්තා කර තිබුනේ යාපනය, වඩමාරච්චියේ වෙත්තිලෙයිකර්නිහි පදිංචි දෙමළ තරුණයකුට පෙබරවාරි 19 සිකුරාදා හවස් යාමයේ බුද්ධි අංශ නිලධාරීන් බවට විශ්වාස කෙරෙන කිහිප දෙනකු විසින් පහර දී ඇති බවයි.
පහර කෑමට ලක් වූ බව පැවසෙන තරුණයාගේ යටිකය ඡායාරූපයක්ද එම වෙබ් අඩවි විසින් පල කර තිබුනි. එම ඡායාරූපයේ දැක්වෙන්නේ කලවා ප්‍රදේශයේ තැලුම් ලකුණු සේ දිස්වන අඳුරු පැහැති පැල්ලම්ය.
උතුරෙන් ලැබෙන මාධ්‍ය වාර්තාවල දැක්වෙන පරිදි සිය රාජකාරි නිමවී නිවසට පැමිණෙමින් සිටි තරුණයාගෙන් බුද්ධි අංශ නිලධාරීන් විමසා ඇත්තේ ඔහු කොහේ සිට පැමිණෙන්නේද යන්නයි.
පාරේ ගමන් කිරීම වැරදිදැයි එහිදී තරුණයා ප්‍රශ්න කළ අයගෙන් විමසා තිබේ.
එවිට තරුණයා පරීක්ෂා කිරීමට අවශ්‍ය බව පැවසූ බුද්ධි අංශ සාමාජිකයන් ඔහු අසල තිබු කනත්තකට ගෙනගොස් පහර දී ඇති බව උතුරේ මාධ්‍ය වාර්තා වැඩි දුරටත් සදහන් කරයි.
පහරකෑමට ලක්වු තරුණයාගේ මව විසින් ඔහුව යාපනය ශික්ෂණ රෝහලට ඇතුලත් කර තිබේ.
පළාත් බද මාධ්‍යවේදීන් පවසන්නේ තමාට පහර දුන්නේ බුද්ධි අංශ නිලධාරීන් පිරිසක් යැයි තරුණයා තම ඥාතීන් සමග කියා ඇති බවයි.
එම පහරදීම සම්බන්ධයෙන් ශ්‍රී ලංකා පොලීසියට හෝ මානව හිමිකම් කොමිෂන් සභාවට පැමිණිලි කිරීමට ඥාතීන් මැලිකමක් දක්වන බව පළාත් බද වාර්තාකරුවෝ වැඩි දුරටත් පවසති.
හම්පහ මිරිස්වත්තේ කඩ හිමියකුට හමුදා නිලධාරියකු පහර දෙන වීඩියෝවක් සමාජ මාධ්‍ය ජාල ඔස්සේ ප්‍රචාරය වීමෙන් පසු පරීක්ෂණයක් ආරම්භ කර ඇති බව යුද හමුදාව කියා තිබුනත් වෙත්තිලකර්නි පහර දීම සම්බන්ධයෙන් රජයේ ආරක්ෂක අංශ කිසිදු නිල ප්‍රකාශයක් කළ බවක් වාර්තා වී නැත.
Facebook Comments
