රටේ ජනතාවගේ ඉඩම් අයිතිය පිළිබඳ ගැටලුවේදී දේශපාලන පක්ෂ බේදයකින් තොරව සියලුදෙනාට සමාජ සාධාරණත්වය ඉටුවිය යුතු බව ජනපිති අවධාරණය කරයි.
එය ජනතාව වෙත ක්‍රියාත්මක වන්නේ රුපියල් ශතවලට මුල්තැන දෙමින් සහ දූෂිත සහ වෙනත් අවිනීත අන්දමින් නම් රජයක් ලෙස ඉඩම් පිළිබඳ කුමන ප‍්‍රතිපත්තියක් අනුගමනය කළද පළක් නොවන බව ජනාධිපති මෛත්‍රීපාල සිරිසේන 30 සිකුරාදා පොළොන්නරුව දිස්ති‍්‍රක්කයේ ගොවි ජනතාවට නීත්‍යානුකූල ඉඩම් ඔප්පු 1053 ක් ප‍්‍රදානය කිරීමේ උත්සවයේදී කියා සිටියේය.
ඉඩම් අයිතිය පිළිබඳ කතාකිරීමේදී අපේ රටේ ඉතිහාසය පුරා දක්නට ඇත්තේ කඳුළු වැටෙන සිදුවීම් බව මෙහිදී පැවසූ ජනාධිපතිතුමා ඉඩම් පිළිබඳ කටයුතු කරන ආයතන පිළිබඳ ජනතාව තුළ ප‍්‍රසාදයක් නොමැති බවත් මෙම තත්ත්වයන් වහා වෙනස් විය යුතු බවත් කියා සිටියේය.
එමෙන්ම ඉඩම් නිරවුල් කිරීම පිළිබඳ තීන්දු ලබාදීමේදී මෙන්ම ඉඩම් ඔප්පු ලබාදීම පිළිබඳ කටයුතු වලදී වඩා සාධාරණ සහ නිවැරදි තීන්දු ලබාදීමේ අවශ්‍යතාවය අවධාරණය කළ ජනපති එය එසේ නොවුණහොත් සමස්ත පරම්පරාවකටම අසාධාරණයක් සිදුවන බව ද වැඩි දුරටත් කියා සිටියේය.
කෙසේ වෙතත් හමුදා විසින් අත්පත් කර ගෙන සිටින තම පාරම්පාරික ඉඩම් ඉල්ලා වසරකටත් වැඩි කාලයක් උතුරේ ජනතාව විරෝධතාවයේ නිරතව සිටින අතර යුද්ධය හේතුවෙන් උන්හිටි තැන් අහිමිව සිටි හතලිස් දහසකට වැඩි පිරිසෙන් මෙතෙක් නැවත පදිංචි කර ඇත්තේ හාර දහසකටත් අඩු පිරිසක් බවයි රජයේම වාර්තා පෙන්වා දෙන්නේ.
Facebook Comments
