මහින්ද රාජපක්ෂ ප්‍රමුඛ ජාතිවාදී බලවේග තම දුර්වලතාව ප්‍රදර්ශනය කර තිබෙන අවස්ථාව ප්‍රයෝජනයට ගේන බලය බෙදන ව්‍යවස්ථාවක් ගෙන ඒම කඩිනම් කරන ලෙස බලය ඒ වෙනුවෙන් වෙහෙසෙන වාමාංශික නායකයෙකු යහපාලන රජයට බල කර සිටී.
ආණ්ඩු බලය අතට ගන්නා බවට වහසි බස් දොඩමින් මහින්ද රාජපක්ෂ පෙරටු කරගෙන කොළඹ පැමිණි ජනකායට ඔවුන් කඳවුරු ලා සිටි භුමියේ පිහිටි ලේක්හවුස් ආයතනය හෝ අත්පත් කරගැනීමට නොහැකිවීම ජනබල උද්ඝෝෂණයේ අසාර්ථක භාවය මැනවින් පෙන්නුම් කරන්නක් බවයි නව සම සමාජ පක්ෂ නායකයා පවසන්නේ.
“අපිට බල කරන්න වෙනවා වහාම දැන් ව්‍යවස්ථාව පාර්ලිමේන්තුවට ගේන්න ඒකට විරුද්ධව හිටපු බලකායත් නිශ්ප්‍රභා වෙලා තියෙනවා. ඒ අයගේ ඇත්ත සත්‍ය හෙළිදරව් වෙලා තියෙනවා. කිසිම විරෝධයක් නැතිව බලය බෙදන ප්‍රජාතන්ත්‍රවාදීව ජනාධිපති ක්‍රමය අහෝසි කරන ව්‍යවස්ථාව ඉක්මනින් ක්‍රියාත්මක කළ යුතුයි කියන බලපෑම තමයි අපිට කරන්න තියෙන්නේ,” යැයි ආචාර්ය වික්‍රමබාහු කරුණාරත්න කොළඹදී මාධ්‍යවේදීන් හමුවේ කියා සිටියේය.
නගරයේ ජනතා සහාය
“නගරයේ දැවෙන ප්‍රශ්න කතා නොකර ජාතිවාදය අවුස්සන්න ගියොත් නගරයේ ඉන්න ජනතාවගේ සහාය ලබා ගන්න බෑ,” යි කී ආචාර්ය වික්‍රමබාහු ලක්ෂ සංඛ්‍යාත ජනකායක් “ජනබලය කොළඹට” සඳහා පැමිණි බවට රාජපක්ෂ හිතවාදීන් කරන ප්‍රකාශ වල කිසිදු සත්‍යයක් නැති බවත් උපරිම වශයෙන් සහභාගි වූ පිරිස 86,000 ක් පමණ වන බවට විද්‍යාත්මකව විශ්ලේෂණය කර ඇති බව පැවසීය.
ගැටුමකින් තොර ලංකාවේ පළමු හර්තාලය ලෙස “ජනබලය කොළඹට” හැඳින්වූ නව සම සමාජ පක්ෂ නායකයා ආචාර්ය වික්‍රමබාහු කරුණාරත්න එහි අසාර්ථකත්වය මගින් ආණ්ඩුව ශක්තිමත් වීම නිසා ජනතාවගේ ඉල්ලීම් වෙනුවෙන් බලපෑම් කිරීමේ හැකියාව දුර්වල වී තිබෙන බවට බිය පල කළේය.
Facebook Comments
