කොළඹ වරායේ සිට මුතුරාජවෙල දක්වා ඉන්ධන ප්‍රවාහණය කෙරෙන නලයක හටගත් තෙල් කාන්දුව හේතුවෙන් පරිසරයට සිදුව ඇති හානියට අදාලව ලංකා ඛණිජතෙල් සංස්ථාවට එරෙහිව නඩු පැවරීමට සමුද්‍රිය පරිසර ආරක්ෂණ අධිකාරිය තීරණය කර තිබේ.
ඉන්ධන නලයක 09 ඉරිදා සිදුවු කාන්දුව හේතුවෙන් දැවිතෙල්වලට සමාන ඉන්ධන ටොන් 10කට අධික ප්‍රමාණයක් මුහුදට එකතුවී ඇති බවයි සමුද්‍රිය පරිසර ආරක්ෂණ අධිකාරියේ සාමාන්‍යාධිකාරී ආචාර්ය ටර්නි ප්‍රදීප් කුමාර පෙන්වා දෙන්නේ.
මෙම කාන්දුව හේතුවෙන් ජලජ ජීවින්ට මෙන්ම වෙරළට හානි සිදු වන බවයි ඔහු පවසන්නේ.
කොළඹ වරායේ සිට මුතුරාජවෙල තොග ගබඩා පර්යන්තයට ඉන්ධන ප්‍රවාහනය කෙරෙන බෝයාවේ නලයකින් 09 ඉරිදා පෙරවරුවේ සිට ඉන්ධන කාන්දුවක් සිදුවූූ අතර මේ වන විට එය යථා තත්වයට පත් කර ඇත.
කෙසේ වෙතත් එම නලයෙන් කාන්දු වූ ඉන්ධන මුහුදු ජලයට එක්වීම හමුවේ වත්තල උස්වැටකෙයියාව ආශ්‍රිත මහුදට සහ එම මුහුදු වෙරලේ කිලෝමීටර 3 ක පමණ ප්‍රදේශයක දැඩි සමුද්‍රිය දූෂණයක් සිදුව තිබේ.
නාවික හමුදාව සහ සිවිල් සංවිධාන ඇතුලු 500කට අධීක පිරිසක් සමග එක්ව මුහුදු වෙරලට ගොඩගසා ඇති තෙල් තට්ටු ඉවත් කරමින් සිටින බව සමුද්‍රිය පරිසර ආරක්ෂණ අධිකාරියේ සාමාන්‍යාධිකාරී ආචාර්ය ටර්නි ප්‍රදීප් කුමාර වැඩි දුරටත් පැවසීය.
Facebook Comments
