එකොළහක් ඉස්සු අයට රැකවරණය දුන් හැටි කියන්න ආරක්ෂක සෙන්පති වෙනත් දිනයක් ඉල්ලයි

0

පුද්ගලයන් පිරිසක් අතුරුදහන් කිරීම සම්බන්ධයෙන් සැක කෙරෙන නාවික හමුදා නිලධාරියකුට උසාවියෙන් වසං වී සිටීමට උදව් කිරීමේ චෝදනාවට ලක්ව සිටින ශ්‍රී ලංකාවේ සේවයේ නියුතු ඉහලම ආරක්ෂක සෙන්පතියා ඒ සම්බන්ධව ප්‍රකාශයක් ලබා දීමට රහස් පොලිසියෙන් වෙනත් දිනයක් ඉල්ලා තිබේ.

රාජපක්ෂ පාලන සමයේ කොළඹ සහ ඒ අවටින් පැහැරගනු ලැබූ 11 දෙනකු නාවික හමුදා කඳවුරු වල රඳවා ගෙන වධහිංසා කොට අතුරුදහන් කිරීම සම්බන්ධයෙන් අවශ්‍යව සිටි ලුතිනන් කොමදෝරු චන්දන ප්‍රසාද් හෙට්ටිආරච්චිට අධිකරණයෙන් වසං වී සිටීමට ආරක්ෂක මාණ්ඩලික ප්‍රධානී අද්මිරාල් රවින්ද්‍ර විජේගුණරත්න අනුබල දුන් බවට රහස් පොලිසිය විසින් අධිකරණයට වාර්තා කරනු ලැබීය.

දෑවුරුද්දකට වැඩි කාලයක් යුක්තිය මගහැර සිටි වරෙන්තුකරුවකු වන සැකකරු අගෝස්තු 14 දා කොළඹදී අත් අඩංගුවට ගැනීමට පෙර රහසිගතව විදේශගත කිරීම සඳහාද හිටපු නාවික හමුදාපති වශයෙන් සිටි අද්මිරාල් වරයා ආධාර කළ බව රහස් පොලිසිය විසින් දැනුම් දී තිබුනි.

එම කරුණු විමසා බැලීමෙන් අනතුරුව ආරක්ෂක මාණ්ඩලික ප්‍රධානි අද්මිරාල් රවි විජේගුණරත්න අත් අඩංගුවට ගෙන අධිකරණය හමුවට පැමිණවීමට කොළඹ කොටුව මහේස්ත්‍රාත් ලංකා ජයරත්න රහස් පොලිසියට අවසර ලබා දෙන ලදී.

සිද්ධිය සම්බන්ධව ප්‍රකාශයක් ලබා ගැනීමට ආරක්ෂ මාණ්ඩලික ප්‍රධානියා 10 සඳුදා රහස් පොලිස් මුලාස්ථානයට කැඳවා තිබුණද රාජකාරී අවශ්‍යතාවක් මත විදෙස් ගත වීම නිසාවෙන් අද දිනයේ පැමිණිය නොහැකි බවට අද්මිරාල් වරයා රහස් පොලිසියට දන්වා තිබේ.

කෙසේ වෙතත් ප්‍රකාශයක් ලබා දීමට අද්මිරාල් රවින්ද්‍ර විජේගුණරත්න වෙනත් දිනයක් රහස් පොලිසියෙන් ඉල්ලා ඇති බවට ආරක්ෂක මාණ්ඩලික ප්‍රධානී කාර්යාලය සඳහන් කල බවයි වැඩි දුරටත් මාධ්‍ය වාර්තා කරන්නේ.

Facebook Comments

wedding people