රනිල් පොළොන්නරුවේදී එජාපයට බලය ඉල්ලයි

0
Ivory Agency Sri Lanka
wedding people

ප්‍රාදේශීය සභා මට්ටමේ සහ පළාත් සභා මට්ටමේ ඇතැම් ප්‍රශ්න තවමත් විසඳීමට නොහැකි වී තිබෙන්නේ ඒවායේ සම්පූර්ණ බලය එක්සත් ජාතික පක්ෂය සතුව නොමැති නිසාවෙන් බව අගමැතිවරයා පවසයි.

එක්සත් ජාතික පක්ෂය රටේ දේශපාලනයේ ඉහළම තලයේ ආණ්ඩු බලය ලබා ගෙන තිබෙන ද ඊට පහලින් ඇති ප්‍රාදේශීය සභාවත් මැද කොටස වන පළාත් සභාවෙත් බලය ලබා ගත හොත් බිම් මට්ටමේ ප්‍රශ්න විසඳිය හැකි බවට අගමැති රනිල් වික්‍රමසිංහ කියා සිටියේ පොළොන්නරුව හිඟුරක්ගොඩ, ගෝල්ඩන් ‍ෆ්ලවර් හෝටලයේදී පසුගියදා පැවැති එක්සත් ජාතික පක්‍ෂ ක්‍රියාකාරීන්ගේ හමුවකදීය.

පළාත් සභාවලත්, ප්‍රාදේශීය සභාවලත් ජයග්‍රහණය ලබා ගැනීම හරහා එම කොටස් මහ ආණ්ඩුව සමග එකට එකතු කරගනිමින් ක්‍රියා කිරීම තුළින් කෘෂිකර්මාන්තය වෙනුවෙන් දැනට ලැබෙනවාටත් වඩා හොඳ ප්‍රතිඵල ලබා ගත හැකි වනු ඇති බවට අගමැතිවරයා විශ්වාසය පළ කරයි.

“ප්‍රාදේශීය සභා සහ පළාත් සභාවල බලය තහවුරු කර ගැනීමට එක්සත් ජාතික පක්‍ෂයට හැකි වුවහොත් කෘෂිකර්මාන්තය නඟාසිටුවීම වෙනුවෙන් අපට ඇති වැඩපිළිවෙළ සාර්ථක කර ගැනීමට හැකි වෙනවා. එම ජයග්‍රහණ ලබාගැනීම වෙනුවෙන් අප වෙහෙසිය යුතු” යි කී අගමැති වික්‍රමසිංහ ” ප්‍රාදේශීය සහ පළාත් සභා ජයග්‍රහණ කිරීම මගින් මහජනතාවට තවත් ආධාර උපකාර ලබාදීමට අපට හැකි වෙනවා. ප්‍රාදේශීය සභා පළාත් සභා ජයග්‍රහණය මගින් අප වැඩකටයුතු ආරම්භ කළ යුතුයි. ආණ්ඩුවේ ව්‍යුහය තුළ ඒවායේ බලය තහවුරු කර ගත යුතු” යැයි සිය පක්ෂිකයන් හමුවේ කියා සිටියේය.

දුක් විඳි අයට සලකන්න බලය ගන්න

ආණ්ඩුවට සම්බන්ධව සතුටක් සහ අසතුටක් යන කරුණු දෙකම ජනතාව අතර තිබෙන බව සඳහන් කරන අගමැතිවරයා බලයට පත්වී මේ තරම් කෙටි කාලයක් තුළ සියලූ දේට පිළියම් ලබා දිය නොහැකි බව අවබෝධ කර ගත යුතු බවද පෙන්වා දුනි.

ආර්ථිකය ගොඩගැනීමේ කාර්යය අප අත්හැරියා නම් අපට රටේ බලය අහිමි වී යන බව පෙන්වා දුන් අගමැති රනිල් වික්‍රමසිංහ කෙසේ හෝ ආර්ථිකය ගොඩගැනීමේ කාර්ය සාර්ථකව ඉටු කරගැනීමට හැකි වූ නිසාවෙන් සහ සිංහල, දෙමළ, මුස්ලිම් භේදයකින් තොරව කටයුතු කළ නිසාත් දේශපාලන බලය තවමත් තමන් සතුව ඇති බව අවධාරණය කළේය.

පක්‍ෂයට අපහසුම අවදියේ පක්‍ෂයත් සමග සිටි අයවලුන් සම්බන්ධයෙන් ඉදිරියේදී විශේෂ සැලකිල්ලක් දක්වන බව මෙන්ම එම සියලුම කාර්යන් වඩාත්ම සාර්ථකව හා පහසුවෙන් සිදුකිරීමට නම් ප්‍රාදේශීය සභා හා නගර සභා එක්සත් ජාතික පක්ෂය සතු කරගත යුතු බව අගමැතිවරයා වැඩිදුරටත් කියා සිටියේය.

Facebook Comments