දේශීය වෙදකම පිළිබදව උපාධිය ලබා වසර පහකට අධික කාලයක් ගතවී ඇතත් තවමත් රැකියා ලබා දී නොමැති බවට චෝදනා කරමින් උතුරේදී විරෝධතාවයක් දියත් කර තිබේ.
පළාත් බද මාධ්‍යවේදීන් පවසන්නේ නොවැම්බර් මස 05 වැනි සිකුරාදා උතුරු පළාත් ආණ්ඩුකාර කාර්යාලය ඉදිරිපිටදී එම විරෝධතාවය දියත් වු බවයි.
“මැතිවරණ පොරොන්දුව කතාවට විතරද ?, දේශිය වෙදකම රජයට එපාද ? උපාධිධාරීන්ගේ උපාධිය ගෙදරම නිශ්ශබ්ධ වෙයිද ?, සියලුම අංශ සදහා රැකියා සැපයීම සම්බන්ධයෙන් රජය අපව ප්‍රතික්ෂේප කරන්නේ ඇයි?” ආදී සටන් පාඨ සිංහල, දෙමළ හා ඉංග්‍රීසි බසින් ප්‍රදර්ශනය කරමින් ඔවුන් විරෝධතාවය දියත් කර තිබුනි.
දේශීය වෙදකම පිළිබදව උපාධිය ලබා සිටින විරෝධතාකරුවන් පෙන්වා දෙන්නේ ශ්‍රී ලංකාව තුළ 1500 ට අධික පිරිසකට එලෙස රැකියා ලබා දීමට රජය තවමත් අසමත්ව සිටින බවයි.
යාපනයේ පමණක් දේශිය වෙදකම පිළිබදව උපාධිය ලැබු 200 ක පමණ පිරිසක් රැකියා විරහිතව සිටින බව ඔවුන් අවධාරණය කරති.
උද්ඝෝෂකයන් රජයෙන් ඉල්ලා සිටින්නේ වහාම තමන්ට පත්වීම් ලබා දෙන ලෙසයි.
කෘෂිකර්මාන්තය සදහා කාබනික පොහොර ප්‍රවර්ධනය කරමින් සිටින ආණ්ඩුව දේශීය වෙදකම පිළිබදව නොසලකන්නේ ඇයිදැයි ඔවුන් ප්‍රශ්න කළ බව පළාත් බද මාධ්‍යවේදින් වැඩි දුරටත් සදහන් කරයි.
Facebook Comments
