ශිෂ්‍යයන්ට හා පාසලේ වුවමනාවට ගුරුවරු ලබාදීම වෙනුවට දේශපාලනයට අවශ්‍ය ලෙස ගුරුවරු ලබාදීමට අධ්‍යාපන අමාත්‍යාංශය ගෙන තිබු ක්‍රියාමාර්ගය නවතා දමන බවට අගමැතිවරයා ප්‍රකාශ කර තිබේ.
එම නොපුහුණු ගුරුවරු බඳවා ගැනීමෙන් මෙරට අධ්‍යාපන ක්ෂේත්‍රයට විශාල හානියක් සිදුවු බව අගමැති රනිල් වික්‍රමසිංහ සඳුදා ගාල්ල, ගිංතොට සහිරා විද්‍යාලයේ නව ගොඩනැගිලි 3 ක් විවෘත කිරීම සහ තවත් නව ගොඩනැගිල්ලකට මුල්ගල තැබීම වෙනුවෙන් පැවති උත්සවයේදී කියා සිටියේය.
“පාසල් දියුණු කිරීම සඳහා ගොඩනැගිලි හා අනෙකුත් සාධකවලට අමතරව පුහුණු ගුරුවරු අවශ්‍ය වනවා. නමුත් අවාසනාවකට මෙන් මේ රටේ අධ්‍යාපන අමාත්‍යාංශය ක්‍රියා කර තිබුණේ ශිෂ්‍යයන්ට හා පාසලේ වුවමනාවට ගුරුවරු ලබාදීමට නොව, දේශපාලන වුවමනාවන්ට අනුව ගුරුවරු ලබාදීමටයි.” අගමැතිවරයා පවසයි.
තමන් අධ්‍යාපන අමාත්‍ය ධුරය දරන සමයේ සෑම පාසලකටම පුහුණු ගුරුවරු ලබා දීමට වැඩසටහන් ගණනාවක් ක්‍රියාත්මක බව පැවසු අගමැතිවරයා දේශපාලකයින් අඛණ්ඩව එම වැඩසටහන ක්‍රියාත්මක නොකල බවට චෝදනා කළේය.
“සෑම පාසලකටම පුහුණු ගුරුවරු ලබා දීමට තීරණය කළා. ඒ සඳහා වැඩසටහන් ගණනාවක් අප ඇති කළා. විභාග ක්‍රමයකට අනුව එම ගුරුවරු බඳවා ගත්තා සේම, ගුරුවරු පුහුණු කිරීම සඳහා අධ්‍යාපන පීඨ ඇති කළා. ඒ වගේම ජාතික අධ්‍යාපන ආයතන ඇති කළා. මේ අනුව 1985 – 86 වන විට ක්‍රමානුකූලව ගුරුවරු බඳවා ගෙන ඔවුන්ට විධිමත් පුහුණුවක් ලබා දීමට අප ක්‍රියා කළා.”
“නමුත් අවාසනාවකට මෙන් ඒ වැඩසටහන අඛණ්ඩව ක්‍රියාත්මක නොකර දේශපාලන වාසියට ක්‍රියා කළ නිසා අද නොපුහුණු ගුරුවරු රැසක් පාසල්වල සිටිනවා. මෙය ඒ ගුරුවරුන්ගේ වරදක් නොවෙයි. අධ්‍යාපන අමාත්‍යාංශය දේශපාලනීකරණය වූ නිසා මේ තත්ත්වය ඇති වුණා. ඒ දේශපාලන ක්‍රියාදාමයේ විපාක අද මේ රට අත්විඳිනවා.” යි අගමැති රනිල් වික්‍රමසිංහ පැවසීය.
අධ්‍යාපනයේ ප්‍රමිතිය ඇති කිරීම සඳහා අලූත් නීති ගෙන ඒමට බලාපොරොත්තු වන බව මෙන්ම තවත් වසර 5 කින් පාසල්වලට බඳවා ගත හැක්කේ පුහුණුව ලැබූ ගුරුවරු පමණක් බවද අගමැති රනිල් වික්‍රමසිංහ වැඩි දුරටත් අවධාරණය කළේය.
Facebook Comments
