ඇතැම් විශ්ව විද්‍යාලවල සිසුන් කුලී පදනම මත විශ්ව විද්‍යාලයෙන් පිටත නිවාස ලබා ගෙන වධකාගාර පවත්වාගෙන යමින් නවක සිසුන්ට ශාරීරික හා ලිංගික හිරිහැර සිදු කරන බවට හෙළිව ඇතැයි උසස් අධ්‍යාපන හා සංස්කෘතික කටයුතු අමාත්‍යවරයා පවසයි.
මෙරට ක්‍රියාත්මක වන නවක වදය අප්‍රිකාවේ ගෝත්‍රික ජනතාව අතරවත් දකින්නට නැති ම්ලේච්ඡ ලිංගික හිංසනයක් බවට පත් ව තිබෙන බවත් මේ නිසා විශ්වවිද්‍යාල හැර යන සිසුන් මෙන්ම සිය දිවි නසා ගැනීමට උත්සහ දරන සිසුන් ද සිටින බවයි ආචාර්ය විජයදාස රාජපක්ෂ ඇමැතිවරයා පෙන්වා දෙන්නේ.
නව වදය ලබා දෙන සිසුන් හට මානසික වෛද්‍ය ප්‍රතිකාර ලබා දීමට කටයුතු කර තිබෙන බව කී ඇමැතිවරයා, නවක වදය සම්බන්ධයෙන් දැනුම් දීමට විශ්වවිද්‍යාල ප්‍රතිපාදන කොමිසන් සභාව දුරකතන අංකයක් හදුන්වා දී තිබෙන බවත් එහි නියාමක ව්‍යාපෘතියක් ලෙස ඌව වෙල්ලස්ස විශ්වවිද්‍යාලයේ හදිසි ඇමැතුම් ඒකකයක් ඇති කර තිබෙන අතර ඉදිරියේදී එය සෑම විශ්වවිද්‍යාලයකම ස්ථාපිත කරන්නට කටයුතු යොදන බව ද කියා සිටියේය.
නවකවදය පිටුපස සිටින්නේ දේශපාලන වශයෙන් බංකොලොත් වූ සහ රටටත් විනයක් වු දේශපාලන කණ්ඩායමක් බව පවසන ඇමැතිවරයා අහිංසක දරුවන් බිලි බා ගෙන සල්ලි වියදම් කරමින් සිදු කරන දේශපාලනයක් මේ පසුපස තිබෙන බවයි අවධාරණය කරන්නේ.
සිසුන්ගේ විනය නොහදා විශ්වවිද්‍යාල සංවර්ධනය කිරීම හා පවත්වාගෙන යාම ඉතා අසීරුවී තිබෙන බැවින් නවකවදය සම්බන්ධයෙන් අනුකම්පා විරහිතව කටයුතු කරන්නට සිදුව තිබෙන බවයි උසස් අධ්‍යාපන හා සංස්කෘතික කටයුතු අමාත්‍ය ආචාර්ය විජයදාස රාජපක්ෂ වැඩි දුරටත් ප්‍රකාශ කරන්නේ.
Facebook Comments
