ඖෂධ වර්ග කිහිපයක මිල පහලට

මහාචාර්ය සේනක බිබිලේ ඖෂධ ප්‍රතිපත්තියට අනුව තවත් අත්‍යාවශ්‍ය ඖෂධ වර්ග 25 ක මිල අඩු කරන බව සෞඛ්‍ය, පෝෂණ හා දේශීය වෛද්‍ය අමාත්‍යවරයා පවසයි.

ඒ අනුව ජිවිත ආරක්ෂක ප්‍රතිජීවක, දියවැඩියා ඖෂධ හා උපකරණ, පුරස්ථී ග්‍රන්ථි රෝග ඖෂධ, ඇදුම හා ශ්වසන අපහසුතා සදහා භාවිත කරන ඖෂධ, වේදනා නාශක, ස්නායු ගත රෝග සහ මිල අධික පිළිකා ඖෂධ වර්ග 10 ක මිල මෙලෙස අඩු කරන බව අමාත්‍ය දොස්තර රාජිත සේනාරත්න කියා සිටි.

සෞඛ්‍ය අමාත්‍යවරයා විසින් 2016 වසරේ දී අත්‍යාවශ්‍ය ඖෂධ වර්ග 48 ක මිල අඩු කර රෝගී ජනතාවට විශාල සහනයක් ලබා දුන් අතර එහිදී විවිධ වෙළෙද නාමයන්ගෙන් යුත් ඖෂධ 272 ක මිල අඩු වී ඇති බවයි රජයේ නිල වෙබ් අඩවිය පවසන්නේ.

මෙම මිල අඩු කිරිමට ප්‍රථම සැළකිය යුතු රෝගීන් සංඛ්‍යාවක් ඖෂධ වල ඉහළ මිල ගණන් නිසා වෛද්‍යවරුන් විසින් නියම කරනු ලබන ඖෂධ මිල දී නොගන්නා බව හෙළී වී තිබුණ බවයි රජය කියා සිටින්නේ.

කෙසේ වෙතත් ඖෂධ මිල අඩු කිරීමත් සමග රෝගීන් විශාල සංඛ්‍යාවක් වෛද්‍යවරුන් නියම කරන ඖෂධ භාවිත කිරීමට පෙළඹී ඇත.

තත්ත්වයෙන් උසස් වෙළෙද නාමයන්ගෙන් යුත් ඖෂධ මිල පාලනය කිරීම නිසා සියයට 600 ක ප්‍රතිශතයක් දක්වා අලෙවිය වැඩිවීමත් සමග මෙම ගුණාත්මක ඖෂධවල අලෙවිය වැඩි වී තිබෙන බවයි රජය නිවේදනය කරන්නේ.

ඖෂධ මිල අඩු කිරීම තුලින් ඖෂධ මිල දී ගැනීමට වැය වූ මුදලින් රෝගීන් වෙත ලැබුනු සමස්ත ඉතිරිය ආසන්න වශයෙන් රුපියල් බිලියන 4.4 ක් වන බව ජාතික ඖෂධ නියාමන අධිකාරිය ඇස්තමේන්තු කර ඇත.