නව ව්‍යවස්ථාවක් ඇති කිරීම සම්බන්ධයෙන් මල්වතු නායක හිමියන්ද තමන් දරන අදහස වෙනුවෙන් පෙනී සිටින බව වාමාංෂික නායකයෙකු පවසයි.
බලය බෙදන නමුත් රට නොබෙදන ව්‍යවස්ථාවක් රටට අවශ්‍ය වන බව මල්වතු පාර්ශවයේ මහා නායක අතිපූජ්‍ය තිබ්බටුවාවේ ශ්‍රී සිද්ධාර්ථ සුමංගල හිමිපාණන් වහන්සේ පැවසූ බව නව සම සමාජ පක්ෂ නායකය ආචාර්ය වික්‍රමබාහු කරුණාරත්න 3 අඟහරුවාදා උන්වහන්සේ බැහැ දැකිමෙන් අනතුරුව මාධ්‍ය වෙත ප්‍රකාශ කළේය.
උන්වහන්සේ නව ව්‍යවස්ථාවක් වෙනුවෙන් එඩිතරව පෙනී සිටිම නව සම සමාජ පක්ෂ නායකයා මහත් සේ අගය කරන ලදී.
හැට දෙලක්ෂයේ ජනතා සම්මුතිය මැයෙන් සිවිල් සංවිධාන සහ දේශපාලන පක්ෂ එක්ව සංවිධානය කරන සත්‍යග්‍රහයක් නුවර දී පැවැත්වීමට පෙර එහි සංවිධායකයන් මල්වතු පාර්ශවයේ මහා නායක අතිපූජ්‍ය තිබ්බටුවාවේ ශ්‍රී සිද්ධාර්ථ සුමංගල හිමිපාණන් වහන්සේ හමුවී නව ව්‍යවස්ථාව සම්බන්ධයෙන් උන්වහන්සේ දැනුවත් කර තිබේ.
රට බෙදීම
රට දෙකඩ කරනවා යැයි ඇතමුන් ප්‍රකාශ කරන්නේ බලය බෙදීම, රට බෙදීම යැයි වරදවා අවබෝධ කර ගනිමින් ඇතැයි උන්වහන්සේ සදහන් කළ බව ආචාර්ය වික්‍රමබාහු කරුණාරත්න වැඩි දුරටත් කියා සිටියේය.
භික්ෂුන් වහන්සේ විනයෙහි පිහිටුවීම සම්බන්ධයෙන්ද මල්වතු මහ නාහිමියන් මෙහිදි ප්‍රකාශ කළ බව පැවසු ආචාර්ය වික්‍රමබාහු බෞද්ධ කටයුතු අමාත්‍යංශය හරහා භික්ෂුන් ලියාපදිංචි කිරිම වැදගත් කම පෙන්වා දුන් බව සඳහන් කළේය.
පසුගිය ආණ්ඩු මෙන් වත්මන් යහපාලන රජයද භික්ෂුන් ලියාපදිංචිය සම්බන්ධ අණ පනත් මඟ හරිමින් සිටින බව මල්වතු පාර්ශවයේ මහා නායක හිමියන් සිවිල් සංවිධාන නියෝජිතයන් හට පෙන්වා දී ඇති අතර එයද ඉදිරියේදී සටන් පාඨයක් ලෙස ගෙන යාමට සිවිල් සංවිධාන නියෝජිතයන් උන්වහන්සේ හට පොරොන්දු වු බව නව සම සමාජ පක්ෂ නායකයා ආචාර්ය වික්‍රමබාහු කරුණාරත්න කියා සිටියේය.
Facebook Comments
