බංකොලොත් රාජ්‍ය අතරට ශ්‍රී ලංකාවත් වැටීම පිළිබඳ බිය පල කරන හිටපු අග්‍රාමාත්‍යවරයකු රටේ ආර්ථික තත්වය පිළිබද සැබෑ තොරතුරු ජනතාව හමුවේ හෙලිදරව් කරන ලෙස රජයෙන් ඉල්ලා තිබේ.
ණය ගෙවීමට බැරිවී බංකොලොත් වන ඊළඟ රටවල් පහ අතරට ශ්‍රී ලංකාව අයත් විය හැකි බවට ලෝක මුල්‍ය දර්ශක පුරෝකථනය කරන බවයි එක්සත් ජාතික පක්ෂයේ නායක රනිල් වික්‍රමසිංහ පවසන්නේ.
ඔහු ඒ බව සදහන් කළේ සමාජ මාධ්‍යජාලා හමුවේ විශේෂ ප්‍රකාශයක් කරමිනි.
” මේ අනුව අපේ රට පවතින්නේ ඉතාම අනතුරුදායක තත්වයක. ෆිච් දර්ශකය ගිය මාසයේදී ශ්‍රී ලංකාව ඝෘණ තත්වයට පහත දමා තිබෙනවා.මුඩීස් සහ මෝර්ගන් ස්ටැන්ලි දර්ශක ශ්‍රී ලංකාව පහත දැමීම ගැන සලකා බලමින් යනවා. 2018 වසරේ මේ දර්ශක තුනේම ස්ථාවර තත්වයක් ලබා ගෙන සිටි අප අද අස්ථාවර තත්වයකට ඇද වැටී තියනවා.”
දකුණු ආසියානු රටවල් අතුරින් වැඩිම පීඩාවකට ලක්වී ඇත්තේ ශ්‍රී ලංකාවේ ආර්ථිකය යැයි දි ඉකොනමිස්ට් සගරාව පෙන්වා දී ඇති බවයි හිටපු අගමැති රනිල් වික්‍රමසිංහ වැඩි දුරටත් පවසන්නේ.
ණය ගෙවීමට සීයට සීයක්
2019 වසරේදී ශ්‍රී ලංකාව ගෙවිය යුතු ණය දළ දේශීය නිෂ්පාදනයෙන් සියයට අසු හතක් වු නමුත් මේ වසර අගදී එය සියයට අනු තුනක් පමණ වෙතැයි බලාපොරොත්තු වන බව පෙන්වා දෙන එක්සත් ජාතික පක්ෂයේ නායකයා අවධාරණය කරන්නේ 2021 වන විට එය සියයට සීයක්ම වන බවයි.
“2023 වෙද්දී අපි ගෙවිය යුතු ණය ප්‍රමාණය ඇමරිකානු ඩොලර් බිලියන 10 ක්. මේ වසරේ පමණක් ඩොලර් බිලියන 3 ක් ගෙවන්නට තියනවා. මේ අවුරුද්දේ ඔක්තෝබර් මාසයේ එක් දිනයක් තුලදී පමණක් ඩොලර් බිලියනයක් ගෙවිය යුතු වෙනවා.”
මුල්‍ය කළමනාකරණ පනත අනුව රටේ ආර්ථික සැලසුම් හා මුල්‍ය කටයුතු පිළිබද වාර්තාව ආණ්ඩුව විසින් කාලානුරූපීව ඉදිරිපත් කළ යුතු නමුත් එය සිදුවී නැති බවට චෝදනා කරන හිටපු අගමැතිවරයා ආණ්ඩුවට අවධාරණය කරන්නේ මේ පසුබිම මත රටේ වර්තමාන මුල්‍ය සහ මුදල් තත්වය පිළිබදව විස්තර වාර්තාවක් ඉදිරිපත් කිරීම රජයේ වගකීමක් වන අතර එම වාර්තාව පදනම් කරගෙන නව ආර්ථික රාමුවක් සකස් කර ගත යුතු බවයි.
සමාජ මාධ්‍ය ඔස්සේ ඔහු වැඩි දුරටත් රජයෙන් ඉල්ලා සිටියේ රටේ ආර්ථික තත්වය පිළිබද සැබෑ තොරතුරු ජනතාව හමුවේ හෙලිදරව් කරන ලෙසයි.
Facebook Comments
