අතුරුදහන් වුවන්ගේ ඥාතීන්ට ආණ්ඩුව කරපු උදව්වක් ගැන OMP දන්නේ නෑ

0

කොවිඩ් 19 වසංගතය හමුවේ රජය විසින් ආර්ථික ගැටලුවලට මැදිව සිටින අතුරුදහන් වූවන්ගේ පවුල්වල සමාජිකයන්ගේ සුභ සිද්ධිය වෙනුවෙන් කවර නම් ක්‍රියා මාර්ගයන් ගනු ලැබුවේ දැයි නොදන්නා බව අතුරුදහන් වු තැනැත්තන් පිළිබඳ කාර්යාල (OMP) පවසයි.

කොරෝනා ව්‍යසනයෙන් පීඩවට පත්ව සිටින පිරිස් වෙත රජය විසින් බෙදනු ලබන රුපියල් 5000 දීමනාව, අතුරුදහන් වූවන්ගේ පවුල්වල සාමාජිකයන්ට ලබා දෙන ලෙස බලධාරීන්ගෙන් කරන ලද ඉල්ලීමට මාසයකට වැඩි කලක් ගතවීත් කිසිදු ප්‍රතිචාරයක් ලැබී නැතැයි එම කොමිසමේ සභාපතිවරයා ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ’ (JDS) කරන ලද විමසීමකට පිළිතුරු ලෙස කියා තිබේ.

“හරිම කණගාටුයි මෙහෙම සිද්ධ වෙන එක ගැන. අපිට නිල වශයෙන් තවමත් දැන ගන්නට නෑ එහෙම සහනාධාර ලැබෙන බවක්. අඩුම තරමින් අපේ කාර්යාලය යවපු ලිපියටවත් තවම පිළිතුරක් ලැබිලා නෑ. දැන් මාසයකට වැඩියි ඒ ලිපිය යවලා.”

අගමැති මහින්ද රාජපක්ෂ වෙත පසුගිය අප්‍රේල් 7 වන දින ලිපියක් යොමු කරන OMP කාර්යාලයේ සභාපති ජනාධිපති නීතිඥ සාලිය පීරිස් යවන ලද ලිපියෙන් ඉල්ලා ඇත්තේ රජය විසින් අඩු ආදායම් ලාභීන් වෙත ලබා දීමට සැලැසුම් කොට ඇතැයි ප්‍රකාශයට පත් කොට තිබෙන සහනාධාර අතුරුදහන් වූවන්ගේ පවුල්වල සමාජිකයන් වෙත ද ලබා දීමට කටයුතු කරන ලෙසයි.

පවතින වසංගත තත්ත්වය හමුවේ අතුරුදහන් වූවන්ගේ පවුල්වල සාමාජිකයන් දැඩි ආර්ථික දුෂ්කරතාවයන්ට ගොදුරුව ඇති බවට විශ්වාසය පල කරන සභාපතිවරයා, ඔහුගේ ලිපිය මගින් අවධාරණය කර ඇත්තේ එම පවුල්වල සාමාජිකයන් සීමිත යැපුම් මාර්ගයන් ද අහිමිව දිවි ගෙවන බවයි.

කෙටි කාලීන විසඳුම් ලෙස අතුරුදහන් වූවන්ගේ පවුල් වෙත වියලි ආහාර ලබා දීමට කටයුතු කිරීම සුදුසු බවට OMP කාර්යාලය විසින් අගමැතිවරයාට යවන ලද ලිපියෙන් නිර්දේශ ඇති අතර අතුරුදහන් වුවන්ගේ පවුල්වල තොරුතුරු ග්‍රාම නිලධාරීන් සතුවන බැවින් ඔවුන් මගින් පහසුවෙන් එම කාර්යය සිදුකළ හැකි බව ද OMP කාර්යාලයේ සභාපති ජනාධිපති නීතිඥ සාලිය සිහිපත් කර දී ඇත.

එහෙත් අතුරුදහන් වු අයගේ පවුල්වල සාමාජිකයන් දහස් ගණනින් සිටින උතුරේ කිසිදු ග්‍රාම නිලධාරියකුගෙන් හෝ ප්‍රාදේශීය බලධාරීන්ගෙන් හෝ රජය ඒ සම්බන්ධ කිසිදු තොරතුරක් රැස් කරගෙන නැති බවට තමන් කළ විමසුමක දී දැන ගන්නට ලැබන බවයි JDS සංවිධානය පවසන්නේ.

“ආණ්ඩුව, අතුරුදහන් වු අයගේ පවුල්වලට කිසිම මුදලක් තාම දීලා නෑ. වියලි ආහාර දීලත් නෑ. එහෙම දීලා තියෙනවා කියනවා නම් ඒක බොරුවක්. අනෙක ඔය කාර්යාලයේ කවුරුත් අපෙන් එහෙම තොරතුරු අරගෙනත් නෑ. අපිට එහෙම ලියුමක් ගැන දැනුම් දීලත් නෑ,” යි නම සඳහන් නොකරන ලෙස ඉල්ලා සිටි අතුරුදහන් වූවන්ගේ උද්ඝෝෂණ ව්‍යාපාරයේ ඉදිරිපෙළ ක්‍රියාකාරි සාමාජිකාවක් එම සංවිධානයට කියා තිබේ.

අතුරුදහන් වු අයගේ පවුල් වලට ආධාර කොරෝනා ආධාර ලබා දෙන ලෙසට රජය හෝ අතුරුදහන් වු තැනැත්තන් පිළිබඳ කාර්යාලය හෝ මේ දක්වා නිල වශයෙන් තමන් වෙතින් කිසිදු විමසීමක් හෝ ආධාර මුදල් ලබා දීමක් පිළිබඳව දැනුම් දීමක් හෝ සිදුකර නොමැති බව ප්‍රදේශයේ ග්‍රාම නිලධාරින් කිහිප දෙනකු වෙතින් තහවුරු කර ගන්නා ලද බව ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ’ (JDS) වැඩි දුරටත් වාර්තා කරයි.

Facebook Comments

wedding people